Ընդդիմությունն իշխանափոխություն չի՞ ցանկանում

Հոկտեմբերի 2-ի ՏԻՄ ընտրություններում, հատկապես, Գյումրի եւ Վանաձոր քաղաքներում, իշխող Հանրապետական կուսակցության կոալիցիոն գործընկեր Դաշնակցությունը բավական վատ արդյունքներ գրանցեց: Եթե Վանաձորում ՀՅԴ-ն ստացել էր ընդամենը 2522 ձայն, որի արդյունքում ձեռք է բերել ավագանու երկու մանդատ, ապա Գյումրիում ստացել էր 2313 ձայն եւ ոչ մի մանդատ ձեռք չի բերել:

Ընդ որում, Շիրակի մարզը ղեկավարում է դաշնակցական մարզպետ Հովսեփ Սիմոնյանը, որը չէր կարողացել այնպես աշխատել, որ իր կուսակցության համար ընդամենը անցողիկ շեմը ապահովող ձայներ բերեր: Մինչդեռ 2013թ. Գյումրիի քաղաքապետի ընտրությունների ժամանակ նույն Սիմոնյանը ՀՅԴ-ի կողմից առաջադրված քաղաքապետի թեկնածու էր, պայքարում էր Սամվել Բալասանյանի դեմ, ստացել էր մոտ 10.000 ձայն: Իհարկե, չի բացառվում, որ այն ժամանակ Սիմոնյանը ստացել է ընդդիմադիր ընտրազանգվածի ձայները: Հիշեցնենք, ՀՅԴ-ն այն ժամանակ ընդդիմություն էր: Իսկ այս տարվա փետրվարից այդ կուսակցությունը իշխանության մաս է կազմում:

ՏԻՄ ընտրությունների ու արձանագրված արդյունքների շուրջ զրուցեցինք ՀՅԴ խորհրդարանական խմբակցության ղեկավար Արմեն Ռուստամյանի հետ:

- Պարոն Ռուստամյան, ի՞նչ հետեւություններ արեցիք ՏԻՄ ընտրությունների արդյունքներից:

- Մենք այդ երկու քաղաքներում էլ ընտրությունների արդյունքներից գոհ չենք: Կարծում եմ, որ շատ ավելին կարող էինք անել: Այդտեղ ընտրական գործընթացները մեղավոր չեն, մեղքը մեր մեջ պետք է փնտրենք: Մենք պետք է վերանայենք մեր քաղաքականությունը:

- Ձեր մարզպետ Հովսեփ Սիմոնյանը տարիներ առաջ քաղաքապետի ընտրությունների ժամանակ 4-5 անգամ ավելի շատ ձայն էր ստացել: Ինչո՞ւ այս անգամ կուսակցությունն այդքան քիչ ստացավ:

- Մենք պետք է հետեւություն անենք, դա նշանակում է, որ ամեն մեկը պետք է իր արածի համար պատասխան տա: Այդ թվում՝ նաեւ մեր մարզպետը: Խնդիր ունենք, այո, դժգոհություն կա այն իմաստով, որ մարզպետն այն պաշտոնյան է, որը պետք է կարողանար հեղինակություն ավելացնել մեր ունեցած հեղինակության վրա: Բարձրացներ, ճիգ գործադրեր, իր հեղինակությամբ նպաստեր ավելի մեծ արդյունքներ ունենալուն: Մենք բացարձակապես մարզպետի պաշտոնը չենք դիտարկել որպես ընտրական լծակ: Ընդհանրապես մեր պաշտոնյաների առաջ նման խնդիր դրված չէ, քանի որ վարչական լծակների կիրառումը հակաօրինական է: Այնուամենայնիվ, ամեն տեղ պետք է վերանայել մեր մոտեցումները, քանի որ յուրաքանչյուր պաշտոնյա ավելացնում կամ նվազեցնում է իր ներկայացրած կուսակցության հեղինակությունը:

- Կարո՞ղ է Հովսեփ Սիմոնյանին փոխելու խնդիր դնեք:

- Ամեն ինչ էլ հնարավոր է, չեմ բացառում, բայց առայժմ նման որոշում չկա: Մենք մանրամասն կվերլուծենք, կհասկանանք պատճառներն ու խնդիրները:

- ՀՀԿ խմբակցության ղեկավար Վահրամ Բաղդասարյանը հայտարարում է, որ այս ՏԻՄ ընտրությունները ինդիկատոր են 2017թ. խորհրդարանական ընտրությունների համար: Դրանք նույն նշանակությո՞ւնն ունեն նաեւ ձեզ համար:

- Ես համաձայն եմ, որ այդ ընտրությունները կապված են, բայց այդպես միանգամից չեն արտացոլում ընդհանուր վիճակը, քանի որ չհաջողվեց այն ամբողջությամբ համապետական դարձնել: Եթե այդպես լինի, ուրեմն խորհրդարանական ընտրությունների ժամանակ նույն պատկերը պետք է Ազգային ժողովում արձանագրվի, բայց այդպես չէ:

- Վանաձորի քաղաքապետարանի ավագանիում Դաշնակցությունը ՀՀԿ-ի հետ կոալիցիա՞ է կազմելու:

- Վանաձորում ընդդիմությունն ունի կոալիցիա կազմելու հնարավորություն: Թող կազմեն ու քաղաքապետ ընտրեն:

- Իսկ դուք ՀՀԿ-ի հետ չե՞ք կազմելու: Չէ որ ՀՀԿ-ն միանձնյա քաղաքապետ ունենալու շեմը չի հաղթահարել:

- Միասին էլ չի բավարարում, այնտեղ ավագանին պետք է քաղաքապետ ընտրի: Իսկ որպես կոալիցիոն գործընկեր՝ բնականաբար առաջին հերթին պետք է համագործակցենք ՀՀԿ-ի հետ: Եվ ես կարծում եմ, որ եթե ընդդիմությունը չկարողանա միավորվել, ՀՀԿ-ի հավանականությունն ավելի մեծ է, հաջողությունն ուղեկցելու է առավելագույն ձայներ ունեցող ՀՀԿ-ին:

- Իսկ ի՞նչ կարծիք ունեք Վանաձորում «Լուսավոր Հայաստան» եւ «Օրինաց երկիր» կուսակցությունների միջեւ այդ ուղղությամբ ընթացող բանակցությունների վերաբերյալ:

- Ժողովուրդը ընդդիմությանն այդքան ձայն է տվել, որ նրանք կարող են միավորվել ու քաղաքապետ ունենալ: Բայց եթե նրանք չեն կարողանա անել, դա արդեն խորը վերլուծության հարց է, թե արդյոք այս ընտրությունները քաղաքական էին այդ իմաստով: Եթե քաղաքական լինեին, ընդդիմություն-իշխանություն բաժանումը պետք է երեւար, եւ այդ բաժանման դաշտում կոալիցիան ձեւավորվեր:

- Միգուցե այդ կուսակցությունների ամբիցիաներն են խանգարում, որ չեն կարողանում միավորվել:

- Ուրեմն ինչ-որ ներքին պայմանավորվածություններ են եղել, կաշկանդված են մարդիկ, հավանաբար չեն կարողանում ինքնուրույն որոշում կայացնել:

- Ի՞նչ եք ակնարկում:

- Ուրեմն չեն կարողանում ինքնուրույն որոշում կայացնել, եւ եթե ինքնուրույն որոշում կայացնեին, Վանաձորում այդ դաշտը, ենթադրվում էր, որ պիտի միավորվի: Սա նշանակում է, որ իրենց որոշումները կայացնելիս այնքան էլ ազատ չեն: Ուրեմն այնքան էլ ինքնուրույն չեն: Եթե ինքնուրույն լինեին, որոշում կկայացնին եւ կհայտարարեն, որ ինքնուրույն են:

- Իշխանություննե՞րն են կաշկանդում, խանգարում այդ որոշման կայացմանը:

- Շատ պարզ տրամաբանություն է, չէ՞ որ նրանք Վանաձորում կարող են միանալ եւ ունենալ 50 տոկոսից ավելի ձայն: Եվ եթե քաղաքական ընտրություն է տեղի ունեցել, մարդիկ գնացել են եւ իշխանություններին հայհոյելով, վատաբանելով, քննադատելով՝ ընդդիմությանն ընտրել, ուրեմն սա շատ լավ առիթ էր, որ իրենց ձեռք բերած ձայները գումարեն ու հասնեն իշխանափոխության: Բա իշխանափոխությունն էլ ինչպե՞ս է տեղի ունենում: Ուրեմն իրենք իշխանափոխություն չեն ուզում անել: Իսկ եթե չեն ուզում իշխանափոխություն անել, ուրեմն կաշկանդված են ինչ-որ բանով: