Էդմոն Մարուքյանը ԲՀԿ-ին եւ «Հայկական վերածնունդ»-ին առաջարկում է կոալիցիա կազմել

«Այս պահին, պաշտոնապես առաջարկում ենք «Հայկական վերածնունդ» կուսակցությանը եւ ԲՀԿ-ին՝ միասին ձեւավորել տեղական իշխանություն Վանաձորի տեղական ինքնակառավարման մարմնում: Այդ կոալիցիայի արդյունքում կարող ենք ընտրել քաղաքապետ, ձեւավորել իշխանություն, սկսել համատեղ աշխատել»,- Վանաձորում՝ «Լուսավոր Հայաստան» կուսակցության կենտրոնական շտաբում հրավիրված ասուլիսի ընթացքում այս մասին հայտարարեց կուսակցության քաղխորհրդի անդամ Էդմոն Մարուքյանը:

Ինչպես տեղեկացրել ենք՝ հոկտեմբերի 2-ին Վանաձորում կայացած ընտրությունների նախնական արդյունքներով առաջին տեղում Հանրապետական կուսակցությունն է՝ 14.889 ձայնով: «Լուսավոր Հայաստանը» 10.899 ձայնով երկրորդ տեղում է: Անցողիկ շեմը հաղթահարել եւ ավագանու կազմում ընդգրկվելու հնարավորություն են ստացել նաեւ «Հայկական վերածնունդը» եւ ԲՀԿ-ն:

Այսպիսով, ՀՀԿ-ն ստանալու է 13 մանդատ, «Լուսավոր Հայաստանը»՝ 10, Հայկական վերածնունդը՝ 5, ԲՀԿ-ն՝ 3, ՀՅԴ-ն՝ 2 մանդատ:

Հիմք ընդունելով այս տվյալները՝ Մարուքյանը ընդգծեց, որ ԼՀ-ն, ՀՎԿ-ն եւ ԲՀԿ-ն իրենց ընդհանուր մանդատներով (18) կարող են առաջ անցնել ՀՀԿ+ՀՅԴ կոալիցիայից (15) եւ թույլ չտալ, որ կարուսել իրականացրած, փող բաժանած (նկատի ունի ՀՀԿ-ին) մարդիկ Վանաձորը կառավարեն:

«ՀՀԿ-ն եւ ՀՅԴ-ն միասին ունեն 15 մանդատ, որով հնարավոր չէ ընտրել քաղաքապետ, ԼՀ-ն, ԲՀԿ-ն եւ ՀՎԿ-ն ունեն 18 մանդատ եւ մենք 3-ով կարող ենք Վանաձորում ՀՀԿ-ին դարձնել ընդդիմադիր ուժ: Սա շատ կարեւոր հնարավորություն է»,- հայտարարեց Մարուքյանը:

ԲՀԿ-ին ու ՀՎԿ-ին նա հիշեցրեց, որ ժողովուրդն իրենց ձայն է տվել նրա համար, որ ընդդիմադիր են, ուստի ճիշտ չի դիտվի նրանց միանալը ՀՀԿ-ին եւ նրանց թեկնածուին սատարելը: Մարուքյանը հույս հայտնեց, որ բանակցությունները շուտով կսկսվեն.

«Մոտ 90 տոկոսվ վստահ եմ, որ մեր գործընկեևրներն ի պատասխան մեր առաջարկի կմիանան մեր առաջարկին եւ միասնական տեղական իշխանություն կձեւավորենք, ինչը կարող է հիմք հանդիսանալ նաեւ հետագա համագործակցության համար»:

Լրագրողների կողմից հարց հնչեց, թե միավորման դեպքում ո՞ր ուժն է առաջադրելու քաղաքապետի թեկնածու.

«10 մանդատ ունեցող քաղաքական ուժը, եթե առաջարկում է...պարզ է, մենք առաջարկում ենք, որ այդ ուժերը միանան մեզ: Եվ ավելին ասեմ, որ մինչ այս պահը ես առաջարկ չեմ լսել, որ այն ուժերից լինի եւ բնական է, որ այն ուժը պետք է առաջարկեր, որ ավելի շատ մանդատ է վերցրել: Սա քաղաքական մշակույթի հարց է: Այսինքն, մի ուժը, որ 3 մանդատ է տարել, նա որ հայտարարի, ասի 10 մանդատանոց ուժը թող միանա մեզ ու մեր առաջին համարը դառնա քաղաքապետ, կարծում եմ դա ճիշտ չի լինի»:

Լուսավոր Հայաստան կուսակցության նախագահը նշեց նաեւ, որ եթե իրենց առաջարկը չընդունվի՝ «Լուսավոր Հայաստանը» կունենա 10 մանդատանոց ընդդիմադիր խմբակցություն Վանաձորի տեղական ինքնակառավարման մարմնում, որոնք իրենց առջեւ դրված խնդիրները կլուծեն ամենօրյա ռեժիմով եւ ամեն բան կանեն, որ մինչեւ մյուս ընտրություններն իրենց ստացած 28 տոկս ձայնը դարձնեն 40 տոկոս կամ ավելին:

Լրագրողների մեկ այլ հարցին, թե հնարավո՞ր է բողոքարկեն ընտրությունների արդյունքները՝ Մարուքյանը պատասխանեց, որ դրա իմաստը չեն տեսնում:

«Վերահաշվարկի դիմում անիմաստ է տալը, բայց կաշառքի, կարուսելի վերաբերյալ հաղորդումներ կան, քննություն պետք է իրականացվի»,- ընդգծեց ԼՀ նախագահը՝ եւ հավելեց, որ իր ձայների 17-18 տոսկոսը ՀՀԿ-ն հավաքել է կաշառքի եւ կարուսելի միջոցով:

Հ.Գ. Ասուլիսի ընթացքում խոսեց նաեւ Վանաձորում «Լուսավոր Հայաստանի» ցուցակը գլխավորող Քրիստ Մարուքյանը: Նա վստահեցրեց, որ իրենց տրված բոլոր ձայները բոլոր տեղամասերում իրենք պահել են:

«Անկախ մեզ տրված 11 հազար քվեից, մենք զգացել ենք ամբողջ Վանաձորի աջակցությունը մեր կողքին եւ փոփոխությունների ցանկությունը: Պարտավորում ենք ունեցած հնարավորություններով լավագույնս կիրառել Վանաձորի զարգացման համար»: