Պատրաստ ենք ամեն գնով պաշտպանել մեր երկրի յուրաքանչյուր միլիմետրը. ՀՀ պաշտպանության նախարար

«Էսկալացիայի վտանգը երբեք էլ չի դադարել»:

Այս մասին այսօր լրագրողների հետ ճեպազրույցի ժամանակ հայտարարեց պաշտպանության նախարար Սուրեն Պապիկյանը և հավելեց, որ դրա մասին մշտապես հայտարարել են՝ հաշվի առնելով նաև հարևան երկրի ղեկավարի հայտարարությունները, այդ թվում՝ ագրեսիվ հռետորաբանությունը:

«Ինչ վերաբերում է ՀՀ սահմաններին թշնամու կուտակումներին, այս պահին կուտակումներ արձանագրված չեն, բայց սա չի ենթադրում, որ մեր աչալրջությունը պիտի պակասեցնենք: Քանի որ խոսում ենք՝ պատրա՞ստ ենք, թե՞ չէ, չստացվի այնպես, որ մենք պատերազմի մասին ենք խոսում կամ պատրաստվում ենք պատերազմի: Մենք չենք շեղվում մեր խաղաղության օրակարգից, բայց դա չի նշանակում, որ մեր երկրի սահմանները կամ տարածքային ամբողջականությունը սակարկելի է»,- շեշտեց Պապիկյանը՝ հավելելով, որ պատրաստ են ամեն գնով պաշտպանել մեր երկրի յուրաքանչյուր միլիմետրը:

Անդրադառնալով երեկ ասուլիսի ժամանակ վարչապետի 5-րդ շարասյան պատճառով պատերազմում պարտվելու հայտարարություններին՝ նա ասաց, որ ամենօրյա դեզիմֆորմացիան է եղել սխալ տեղեկությունների տրամադրումը, այդ թվում՝ տեղեկություններ, որոնց հրապարակումը եղել է հօգուտ թշնամու:

«Օրինակ՝ երեկ հայտարարություն եմ կարդում, որ հակառակորդի ռազմական տեխնիկան Տավուշում է: Ո՞րն է սրա նպատակը, եթե դա չի ուղղորդվում այլ երկրից, ընդ որում՝ կապ չունի՝ որ երկրից: Կապ չունի՝ 5-րդ շարասյունը կամ դրան աջակցողները ինչ պաշտոն են զբաղեցնում, ընդդիմադի՞ր են, թե՞ ոչ, սովորական քաղաքացինե՞ր են, գո՞ւցե լրագրող են: Ամեն դեպքում, դրա հետ կապված տեղի են ունենում նախաքննական և քննչական գործողությունների փուլ: Երբ դատարանը կունենա որոշումներ, բոլորիս համար պարզ կդառնա, թե ովքեր են այն մարդիկ, որոնք ներսից թուլացրել են մեր բանակը»,- նկատեց Պապիկյանը:

Դիտարկմանը՝ մեր բանակի թույլ կողմերը ներկայացելով՝ զինվորների ոգին ենք կոտրում, նախարարն արձագանքեց. «Համաձայն չեմ, որ մեր մեջ առկա արատներն ու բացերը բարձրաձայնելը մեզ թուլացնում է: Ընդհակառակը, մենք պիտի իմանանք՝ ինչ խնդիրներ ունենանք, այդ խնդիրները արմատախիլ անենք ու շարժվենք առաջ: Ինչ վերաբերում է ոգուն ու տրամադրվածությանը, այստեղ մեծ դեր ունի հասարակությունը. բանակը հասարակության մի մասն է»:

Նրա խոսքով՝ մեր բանակը սպառազինված է այնքանով, ինչքանով հնարավորություն ենք ունեցել ձեռք բերել միջոցներ: Ամենօրյա ռեժիմով զբաղվում են դրանով:

Խոսելով բանակում բարեփոխումների մասին՝ վերջինս ընդգծեց, որ խոսքը վերաբերում է պայմանագրայինների շարքերը համալրելուն, բանակը պրոֆեսիոնալ դարձնելուն:

«Վառ օրինակը «Պաշտպան հայրենյաց» ծրագիրն է, որի հարյուրավոր շահառուներ ունենք հիմա: Խոսքը վերաբերում է սպայակազմի համալրմանը: Մենք հիմա լուրջ աշխատանքներ ենք տանում Վազգեն Սարգսյանի անվան ռազմական համալսարանի և Ռազմաավիացիոն համալսարանի շարքերը համալրելու ուղղությամբ: Դրա շրջանակներում սոցիալական խնդիրներ ենք կարգավորում սպաների համար, այդ թվում՝ նաև սեփական տանիքի խնդիր ենք լուծում: Առաջիկայում ևս օրենսդրական փոփոխությունների մի խոշոր փաթեթ ԱԺ-ում կզեկուցվի: Հսկայական գործ է արվում, ամենակարևորՆ ատեստավորում է, որը ենթադրելու է, որ ատեստավորված պայմանագրայինները և սպաները ստանալու են բավականին բարձր աշխատավարձ: Պայմանագրայինների դեպքում՝ կրկնակի, երբեմն նաև՝ եռակի, սպաների դեպքում աշխատավարձը կբարձրական 80-100 տոկոսով՝ ատեստավորվելու դեպքում»,- նշեց նա:

Պաշտպանության նախարարը, անդրադառնալով մամուլում իր բնակարանի ձեռք բերման և գնի հետ կապված քննարկումներին՝ ասաց, որ պատրաստ է հայտարարագրով ներկայացնել, թե որտեղից իրեն այդքան գումար, որ բանկից է վերցրել վարկը, որքան կանխավճար է վճարել, այդքան աշխատավարձ ստանո՞ւմ է, թե՞ ոչ, ունեցե՞լ է իր հաշվի վրա այդքան գումար, թե՞ ոչ:

Վերջինս խոսեց նաև մամուլում իր հրաժարականի մասին լուրերի մասին:

«Ես չեմ պատրաստվում հրաժարական տալ և իմ առջև դրված խնդիրները կիսատ թողնել: Շարունակելու եմ իմ սկսած բարեփոխումները»,- շեշտեց Սուրեն Պապիկյանը: