Ինձ շահագրգռեց ներկայացնել մի ծրագիր, որով Բրյուսովին կվերադարձվի իր նախկին բարի համբավը․ Դավիթ Գյուրջինյան

Եթե Բրյուսովի անվան պետական համալսարանում նոր ընտրություններ նշանակվեն, արդյո՞ք ՀՀ լեզվի կոմիտեի նախագահ Դավիթ Գյուրջինյանը կրկին կառաջադրի իր թեկնածությունը։

Լրագրողների այս հարցին Գյուրջինյանը այսօր հրավիրված ասուլիսի ժամանակ պատասխանել է՝ ինքը Բրյուսովում աշխատել է 25 երկար ու ձիգ տարիներ: Բրյուսով չէր գնացել դրսից իբրև հյուր:

«Ես այդտեղի դասախոս եմ եղել: Իմ և Հեքեքյանի գրած մի ձեռնարկ 8 անգամ տպվել և այդտեղ գործածվել է իբրև հայերենի ուսուցման հիմնական ձեռնարկ: Այնպես որ, ես օտար չեմ: Չգիտեմ՝ ինչ կլինի հետո, բայց Բրյուսովի ապագան, ճակատագիրն ինձ մտահոգում է»:

Հարցին՝ առաջադրվել էր սեփակա՞ն ցանկությամբ, թե՞ իշխանության առաջարկով, Գյուրջինյանն ասել է՝ ինքն իշխանության ներկայացուցիչներից մեկն է։

«Ինձ շահագրգռեց ներկայացնել մի ծրագիր, որով Բրյուսովին կվերադարձվի իր նախկին բարի համբավը, մի համալսարանի, որ կրթել է օտար լեզուների ուսուցիչների տասնամյակներ շարունակ և իր գործը մինչև վերջերս լավ է արել»,- նկատել է նա:

Այսինքն՝ կորե՞լ է բարի համբավը, լրագրողի ճշտող հարցին Դավիթ Գյուրջինյանն արձագանքել է՝ սպասում էր նման ընկալման՝ մանրամասնելով, թե ինչ նկատի ունի բարի համբավ ասելով։

«Բրյուսովի համալսարանը վերջին տարիներին դարձել է Բրյուսովի անվան պետական համալսարան, այլևս լեզվաբանական չէ, ոչ էլ լեզվահասարակագիտական է։ Այդ ուղղվածությունն այլևս չունի, ես դրա մտահոգությունն ունեմ»,- նշել է նա:

Նշենք, որ բուհի ռեկտորի ընտրության հետ կապված դատարան երկու հայց կա այս պահին ներկայացված: Մեկը ռեկտորի ընտրության ժամանակ առաջադրված թեկնածու, ՀՀ ԿԳՄՍՆ Լեզվի կոմիտեի նախագահ Դավիթ Գյուրջինյանն է ներկայացրել՝ պահանջելով չեղարկել Կարինե Հարությունյանի հետ աշխատանքային պայմանագիրը։ Մյուս հայցը ներկայացրել է բուհը, որպեսզի Կառավարությունը հաստատի ռեկտորի ընտրության արդյունքները։

Կրթական այս հաստատությունն ուշադրության կենտրոնում հայտնվեց 2022 թվականի հոկտեմբերի 12-ին, երբ պարզ դարձավ, որ ՀՀ կրթության, գիտության, մշակույթի և սպորտի նախարարությունը նախագծով նախատեսում է Բրյուսովի պետական համալսարանը և Ֆիզիկական կուլտուրայի ինստիտուտը միացնել Մանկավարժական համալսարանին։ Բրյուսովցիներն այս նախագծի հետ կապված մի քանի օր դասադուլ էին հայտարարել և իրականացնում ակցիաներ։ Որոշ ժամանակ անց՝ 2022 թվականի նոյեմբերի 9-ին, բուհը հայտարարեց ռեկտորի թափուր պաշտոնը զբաղեցնելու վերաբերյալ մրցույթ, չնայած այն հանգամանքին, որ 2022 թվականի հոկտեմբերի 13-ին ԿԳՄՍ նախկին նախարար Վահրամ Դումանյանը խոսել էր մրցույթի նպատակահարմար չլինելու մասին։ 2022 թվականի դեկտեմբերի 9-ին բուհի հոգաբարձուների խորհրդի կայացած նիստի ընթացքում գործող ռեկտոր Կարինե Հարությունյանը վերընտրվեց իր պաշտոնում։

Այնուհետև «Հայկական ժամանակ»-ը, հղում անելով իր աղբյուրներին, հայտնել էր, որ Վալերի Բրյուսովի անվան պետական համալսարանի ռեկտորը՝ Կարինե Հարությունյանը, պաշտոնավարման 4 տարվա ընթացքում մի շարք չարաշահումներ է թույլ տվել, որոնք լրջագույն վնաս են հասցրել կրթական հաստատությանը: 2022 թվականի դեկտեմբերի 22-ին էլ Պետական վերահսկողական ծառայությունը հաղորդագրություն էր տարածել՝ տեղեկացնելով համալսարանում հայտնաբերված տարաբնույթ խախտումների մասին: Նույն թվականի դեկտեմբերի 26-ին էլ ՀՀ դատախազությունը հայտարարել էր, որ Բրյուսովի անվան պետական համալսարանի ռեկտորի ընտրությունների ընթացքում կատարված խուլիգանության և հոգաբարձուների խորհրդի նիստի ընթացքում թույլ տրված կեղծիքների դեպքերի առթիվ նախաձեռնվել են քրեական վարույթներ։ 

Այնուհետև ՀՀ քննչական կոմիտեն հաղորդագրություն տարածեց՝ հայտնելով, որ մեղադրանք է առաջադրվել Վալերի Բրյուսովի անվան պետական համալսարանի ռեկտորի արդեն նախկին խորհրդական Գրիշա Թամրազյանին։ Նրա պաշտոնավարումը կասեցվել է:

Նշենք, որ հունվարի 11-ին լրացել է Երևանի Վ․ Բրյուսովի անվան համալսարանի վերընտրված ռեկտոր Կարինե Հարությունյանի պաշտոնավարման ժամկետը, նա արձակուրդ է մեկնել: