«Բոլսոնարուն կործանեց երկիրը». Բրազիլիայի նոր նախագահի խոսքերից հետո անկարգություններ են սկսվել, գրոհել են նախագահականը

Բրազիլիայի նախկին նախագահ Ժաիր Բոլսոնարոյի հարյուրավոր կողմնակիցներ ներխուժել են երկրի Ազգային Կոնգրես, ոստիկանությունը նրանց դեմ արցունքաբեր գազ է կիրառել։ Նրանք մտել են նաեւ Գերագույն դատարանի շենք ու նախագահական պալատ։ Հարձակումը տևել է մոտ երեք ժամ, որից հետո ոստիկանները բերման են ենթարկել մասնակիցներին։

Բրազիլիայի խորհրդարանի և կառավարության այլ շենքերի գրոհը տեղի է ունեցել երկրի նոր նախագահի՝ Լուլա դա Սիլվայի երդմնակալությունից մեկ շաբաթ անց։ Բոլսոնարոյին և նրա ծայրահեղ աջ քաղաքականությանը սատարող ցուցարարները հրաժարվում են ճանաչել նրա վերջին ընտրական պարտությունը։

Լուիս Ինասիո Լուլա դա Սիլվան, ով այս օրերին աշխատանքային այցով գտնվում է Սան Պաուլո նահանգում, ասել է, որ ցուցարարները կատարել են «վանդալիզմի և ֆաշիզմի գործողություններ»: Նրա խոսքով՝ երկրի պատմության մեջ նման նախադեպ չի եղել:

«Իսկական վանդալների նման նրանք ոչնչացնում են այն ամենը, ինչ տեսնում են իրենց առջև: Մենք կարծում ենք, որ անվտանգությունը պատշաճ կերպով չի ապահովվել: Եվ ես ուզում եմ ձեզ ասել, որ բոլոր մարդիկ, ովքեր դա արել են, կպատժվեն»,- ասել է Լուլան:

Լատինական Ամերիկայի երկրների ղեկավարներն իրենց զայրույթն ու աջակցությունն են հայտնել նախագահ Լուլային։ ԱՄՆ նախագահ Ջո Բայդենը նույնպես հարձակումն անվանել է «վրդովեցնող»։ 

Տեղական ժամանակով 18:30-ի սահմաններում իրավապահներին հաջողվել է վերականգնել վերահսկողությունը բոլոր երեք շենքերի վրա, հաղորդում է տեղական GloboNews հեռուստաալիքը։ Ռեպորտաժի կադրերում երևում է, թե ինչպես են ձեռնաշղթաներով օրինախախտներին դուրս բերում այնտեղից։

Սոցցանցերում շրջանառվող տեսանյութերը ցույց են տվել, որ Բրազիլիայի դրոշի գույներով հագած մարդկանց խմբերը, որոնք խորհրդանշում են աջակցությունը Բոլսոնարոյին, վազում են դեպի կառավարական շենքեր և մտնում դրանք, այդ թվում՝ նրանք հայտնվել են նախագահականում։

Կիրակի օրը Բոլսոնարոյի կոշտ կողմնակիցների խմբերը երթով շարժվել են դեպի Երեք ուժերի հրապարակ՝ երկրի մայրաքաղաք Բրազիլիայի կենտրոն։ Այնտեղ են Կոնգրեսի, Գերագույն դատարանի և նախագահական նստավայրի շենքերը։

Ցուցարարները, ճեղքելով ոստիկանական պատնեշները, կարողացել են մտնել խորհրդարանի շենք։ Կոնգրեսի շենքի ապակիներից մի քանիսը կոտրված են. հարձակման մասնակիցները մտել են նաև Սենատի նիստերի սենյակ, որտեղ սկսել են ցատկել աթոռների և նստարանների վրա։

Սոցցանցերում հայտնվել են խորհրդարանի մոտ արված տեսանյութեր։

Տեսանյութերից մեկում երևում է, թե ինչպես է ցուցարարների խումբը ձիուց քաշում ոստիկանին և հարձակվում նրա վրա:

Կառավարական շենքերի մոտ բողոքի ակցիաները շարունակվում են մեկ օրից ավելի։ Դրանց մասնակիցները բանակին կոչ են անում միջամտել իրավիճակին և պաշտոնանկ անել դա Սիլվային։

Նախագահն այս պահին աշխատանքային այցով գտնվում է Սան Պաուլո նահանգում:

Հոկտեմբերի վերջին ձախ ուժերը ներկայացնող Լուիս Ինասիո Լուլա դա Սիլվան նվազագույն հաշվով հաղթեց «բրազիլացի Թրամփին»՝ Ժաիր Բոլսոնարոյին, և երրորդ անգամ դարձավ երկրի նախագահ։

Համացանցում արդեն սկսել են համեմատել այն, ինչ կատարվում է Բրազիլիայում 2021 թվականի հունվարի 6-ին ԱՄՆ Կապիտոլիումի գրոհի հետ, այն բանից հետո, երբ ընտրություններում պարտված Դոնալդ Թրամփը երկար ժամանակ հրաժարվում էր ճանաչել քվեարկության արդյունքները։

Բրազիլիայում Բոլսոնարոյի հակառակորդները դեռ ընտրություններից առաջ վախենում էին, որ պարտության դեպքում չեն ճանաչի նրա իշխանությունը, և երկրում քաղաքացիական հակամարտություն կսկսվի։ 

Բոլսոնարոն չի միջամտել իշխանության փոխանցմանը և խոստացել պահպանել օրենքը։ Սակայն նրա կողմնակիցներն անմիջապես սկսել են փակել ճանապարհները ողջ երկրում՝ ի նշան քվեարկության արդյունքների բողոքի:

Նախկին նախագահի հազարավոր արմատական կողմնակիցներ սկսել են վրաններ տեղադրել ամբողջ երկրի ռազմակայաններում՝ պնդելով, որ ընտրությունների արդյունքները կեղծված են՝ զինվորականներին կոչ անելով հեղաշրջում իրականացնել։

Ինքը՝ նախկին նախագահը, լքել է երկիրը՝ հաստատվելով Ֆլորիդայում և լռում է կատարվածի մասին։

Երկրի նոր իշխանությունները հույս ունեին, որ այս անկարգությունները աստիճանաբար կմարեն։ Հունվարի սկզբին Լուլայի երդմնակալությունն առանց իրադարձությունների է անցել: Սակայն ցնցող իրադարձությունները, որոնք այժմ տեղի են ունենում մայրաքաղաքի կենտրոնում, ցույց տվեցին, որ այդ հույսերը ժամանակավրեպ էին։

Մեկ շաբաթ առաջ Կոնգրեսի անդամներին ուղղված ելույթում Լուլան հայտարարել էր, որ ավերված երկիր է ստանում, որտեղ Բոլսոնարոյի օրոք սովը վերադարձել է։ Նա մեղադրել էր իր նախորդին կրթության, առողջապահության և անտառային տնտեսության համար կառավարության ռեսուրսները խաթարելու և երկրում մարդու հիմնական իրավունքները ոտնահարելու համար:

Լուլան ասել էր, որ Բոլսոնարոն և նրա վարչակազմը պատասխանատու են «բրազիլական ցեղասպանության» համար, քանի որ անտեսել են կորոնավիրուսի համաճարակը, որը խլել է ավելի քան 680 հազար մարդու կյանք երկրում։

Մինչ իր մրցակցի երդմնակալությունը՝ Բոլսոնարոն թռչել է Ֆլորիդա՝ արցունքն աչքերին՝ իր կողմնակիցներին հրաժեշտ տալուց հետո։ Թռիչքից առաջ նա սոցցանցերում տեսանյութ էր հրապարակել, որում ասել էր՝ «ճակատամարտերը պարտված են, բայց պատերազմում չեն պարտվի»։