Ադրբեջանի պրովոկացիաները մեզ ուղեկցելու են դեռ 2,5 տարի, հրադադարը պահպանող բլոկը պետք է հետևություններ անի. Քոչարյան

ՀՀ ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը կարծում է, որ Ադրբեջանի իշխանությունն իրականացնում է լավ պլանավորված պրովոկացիոն գործողություններ՝ լարվածություն ստեղծելով Արցախում և ակնկալելով, որ այդ լարվածությունը կտեղափոխվի նաև Հայաստան:

«Պետք է լինել սառնասիրտ և հիշել, որ մեր նպատակները մնում են նույնը: Անվտանգ կյանքի ապահովում Արցախի մեր հայրենակիցների համար և անվտանգության միջավայրի կառուցում Հայաստանի և Արցախի միասնական անվտանգային տարածքում»,- այսօր ԱԺ-ում ճեպազրույցների ժամանակ հայտարարեց նա:

Իսկ, թե ինչպե՞ս են ադրբեջանցիները հասել այդ տարածք, հարցին Քոչարյանը պատասխանեց, որ եղել է փոխհամաձայնեցված գործողություն. «Չեմ կարող ասել՝ ում միջև, բայց այդ համաձայնությունը եղել է: Չէին կարող դրոշներով բնապահպաններն աննկատ հասնել այդտեղ: Արցախի իշխանությունները պետք է կարողանան նման ռիսկերը կառավարել»:

Վերջինս նկատեց, որ խնդիրը լուծվել է խաղաղապահ ուժերի մասնակցությամբ, որոնք ունեն հենց նման լարվածությունները չեզոքացնելու խաղաղապահ առաքելություն:

«Սա գործընթաց է, և պետք է այնպես անել, որպեսզի չբերի ավելի խոշոր լարվածությունների, բայց նաև մեզ հնարավորություն տա մեր անվտանգային խնդիրները արագ լուծելու: Այսօր ներխուժում են բնապահպանական քողի ներքո, վաղը մեկ այլ բան կմտածեն: Ադրբեջանը միշտ էլ ունի ավելի մեծ ծրագրեր, այլ հարց է՝ ինչքանով ենք մենք պատրաստ դիմակայել այդ ծրագրերին: Եղել են ժամանակաշրջաններ, որ ոչ միայն դիմակայել ենք, այլ նաև շատ հեռու ենք հետ շպրտել: Ադրբեջանը նման քայլերով ստիպում է, որ Արցախը և Հայաստանն իրենց անվտանգային միջավայրը դարձնեն շատ ավելի գերակա, մեր անհաջողություններից դասեր քաղելու գործընթացն էլ լինի շատ ավելի արագ քայլերով»,- նշեց Անդրանիկ Քոչարյանը:

Նրա խոսքով՝ Ադրբեջանի պլանավորած պրովոկացիաները մեզ ուղեկցելու են դեռ 2,5 տարի, և մեր հրադադարը պահպանող ուժային բլոկը պետք է դրանից հետևություններ անի, գուցե նաև ադրբեջանական կողմին հեռու պահի նման մտադրություններից, որովհետև դա ոչ մի լավ բանի չի բերելու:

«Իրենց նպատակը միջանցքը փակելն է, սակայն մեր հայրենակիցներին անպաշտպան ոչ ոք չի կարող թողնել: Եթե Ադրբեջանը 90-ականների դասերը ուսումնասիրած լինի, վերլուծություն արած կլինի, թե հակամարտությունը ինչո՞ւ վերածվեց լայնամասշտաբ պատերազմի: Հենց այդպիսի գործողություններով: Սկսեցին շատ կրակել, մենք սկսեցինք շատ պաշտպանվել, երբ որ սկսեցին ավելի շատ կրակել, մենք սկսեցինք կանոնավոր բանակի արագ տեմպերով կառուցումը: Երբ որ վտանգն ավելի մեծացավ, մենք շատ ավելի արագ կազմակերպվեցինք և ստեղծեցինք այն կանոնավոր բանակը, որը պարտադրեց 94-ի հրադադարը: Ադրբեջանը չպետք է ուժի լեզվով հարաբերություններ կառուցի, քանի որ դա ոչ մի տեղ չի հասցնելու: Հաջողությունից հետո պետք է կայունություն ապահովել»,- նկատեց նա:

Վերջինս հավելեց. «Կուզեի մենք էլ դասեր քաղած լինեինք, թե 94-ի հրադադարից հետո ինչպես չպետք է մսխեինք մեր հաջողությունները: Իրենք դասեր քաղեցին՝ կառուցեցին այնպիսի բանակ, որ իրենց առջև դրված խնդիրը լուծեցին: Մենք հիմա պետք է մեր անվտանգային միջավայրը կառուցենք այնպես, որ նման պրովոկացիաներից հեռու պահենք թե՛ Արցախը, թե՛ Հայաստանը»:

Քոչարյանի դիտարկմամբ՝ մենք ամեն մի նման գործողությունից հետո պետք է գիտակցենք, որ մեզանից է կախված՝ նման գործողությունները կլինե՞ն շարունակական, թե՞ ոչ: «Մեր ազգաբնակչությունը պետք է լինի շատ ավելի զգոն և պատրաստված»,- շեշտեց նա:

Ավելլի վաղ հայտնել էինք, որ այսօր կրկին մի շարք անձինք, որոնց ադրբեջանական լրատվամիջոցները ներկայացնում են որպես հասարակական կազմակերպությունների ներկայացուցիչների, բլոգերների և էկոակտիվիստների, փակել են Շուշի-Ստեփանակերտ ավտոճանապարհը։