««Եվրատեսիլի» 8 հազար դրամ արժողությամբ տոմսը վերավաճառում են 30-50 հազար դրամով». քաղաքացիներն ահազանգում են

«Հայկական ժամանակ»-ի խմբագրություն է դիմել քաղաքացի՝ դժգոհություն հայտնելով, որ «Մանկական Եվրատեսիլ»-ի տոմսերի՝ նախապես մեծ թվաքանակ գնած անձինք դրանք սկսել են վերավաճառել կրկնակի, եռակի, երբեմն էլ անհավանական թանկ գներով:

Ըստ մեզ դիմած անձի՝ ռուսների մի խումբ կա, որոնք էլ հիմնականում ձեռք են բերել տոմսերի այդ մեծ թվաքանակը: «Տպարանից վերցնում են ու 8 հազար դրամ արժողությամբ տոմսերը վերավաճառում 30-50 հազար դրամով: Մի տղա կար՝ ինձ ասաց, որ 3 հազար դրամ արժողությամբ տոմսը 16 հազարով կտա»,- ասաց Ս. Մ.-ն:

Վերավաճառողների հետ աշխատող միջնորդ անձի հետ եւս կապ հաստատեցինք, որը մեզ ներկայացավ Սաշա անունով, իսկ խոսակցության ընթացքում, երբ փորձեցինք հասկանալ, թե ի պաշտոնե ո՞վ է, վերջինս ներկայացավ ամբողջական անուն-ազգանունով՝ Ալեքսանդր Գարգալոյան, ապա մանրամասնելով իր գործառույթը՝ նշեց. «Օպերային թատրոնի ֆիլհարմոնիայի տոմսերի վաճառքով ենք զբաղվում, դրա համար էլ իմ համարն են տալիս»:

Վերջինս նախ ճշտեց, թե ո՞ր օրվա համար ենք ուզում տոմսը՝ առաջի՞ն, թե՞ երկրորդ, ապա սկսեց թվարկել գները՝ 8, 12, 20, 30 հազար դրամ, իսկ միջոցառումը կանգնած նայելու համար պետք է վճարել 10 հազար դրամ: Առաջին օրվա համար ֆիքսված գներին ավելանում է գումարի 10 տոկոսը, այսինքն, եթե տոմսի արժեքը 8 հազար դրամ է, դառնում է 8 հազար 800 դրամ: Երկրորդ օրվա համար կրկնակի թանկ է, 8 հազար դրամ արժողությամբը՝ 16 հազար դրամ, 12-ը՝ 24 հազար դրամ եւ այդպես շարունակ:

Երբ ասացինք, որ 15 հատ տոմս ենք ուզում, զրուցակիցը նշեց, որ նախ պետք է հստակ ասենք, թե ինչ գնի տոմսեր ենք ուզում, որ կարողանա ճշտել, ապա հավելեց, որ հնարավորինս արագ պատասխանենք, քանի որ օտարերկրացիները շուտով գալիս են, ու դրանք էլ կսպառվեն: «Եթե մեծ քանակությամբ եք վերցնում, գուցե նաեւ առաքում անենք»,- ասաց նա:

«Իրազեկ եւ պաշտպանված սպառող» հասարակական կազմակերպության նախագահ Բաբկեն Պիպոյանը մեզ հետ զրույցում հայտնեց, որ սա համատարած խնդիր է աշխարհում: «Նմանատիպ խնդրի են բախվում Ֆուտբոլի աշխարհի առաջնություն կազմակերպող ու Չեմպիոնների լիգա ընդունող երկրները: «Այս պահին առաջարկը պահանջարկից քիչ է, ուստի որոշ մարդիկ փորձում են առիթից օգտվել»,- ասաց նա:

Ըստ Պիպոյանի՝ խնդիրը իսկապես առկա է, սակայն այն այնքան էլ լուրջ չէ, որ պետությունը կանխելու ուղղությամբ ռեսուրս ծախսի:

Պիպոյանը նաեւ նկատեց՝ չի բացառվում, որ կամայական ինչ-որ մեկը որոշի 4 տոմս գնել հարազատների համար, ապա տեսնելով, որ հնարավոր է այն վաճառել շուկայականից 4 անգամ ավելի թանկ գնով, որոշի վաճառել ու «Եվրատեսլ»-ին հետեւի հեռուստացույցով: «Այստեղ հարկային վարչարարություն կիրառելու անհրաժեշտություն էլ չկա, պետությունը չի կարող ասել՝ գնանք, այդ մի քանի հոգուց հարկ վերցնենք, որ մնացածը լսեն, էլ նման բան չանեն: Դա այն գումարը չէ, որ պետությունը դրա վրա գումար ծախսի»,- նշեց նա:

Զրուցակցի կարծիքով՝ սա մի իրավիճակ է, որ ամեն օր չի կարող լինել մեր երկրում: «Եվրատեսիլ»-ի նման մասշտաբային միջոցառումներ էլ ամեն տարի չէ, որ տեղի են ունենում Հայաստանում: Ըստ նրա՝ եթե նայենք աշխարհում տեղի ունեցող սպորտային ու մշակութային իրադարձությունները եւ սեւ շուկայում հայտնված տոմսերի աստղաբաշխական գները, այնքան էլ չենք զարմանա:

«Իհարկե, երեւույթը վատ է, տհաճ, բայց, հավատացեք, այս ոլորտում կարգավորելու ավելի լուրջ խնդիրներ կան: Հաճախ են Հայաստանում տարատեսակ պատճառներով համերգներ չեղարկվում, եւ միշտ չէ, որ մարդիկ կարողանում են տոմսի համար վճարած գումարը հետ ստանալ, քանի որ ընկերություններ կան՝ առանց երաշխիքի են գործել եւ այլն: Նմանատիպ խնդիրներ կան, որտեղ պետությունը լուրջ անելիք ունի»,- շեշտեց նա:

Պիպոյանը նաեւ նկատեց՝ «Մանկական Եվրատեսլ»-ի պարագայում ամենակարեւորը մարդկանց պետք է հորդորել հնարավորինս վստահ լինեն, որ իրենց գնած տոմսերը իրական են. «Այնպես չստացվի՝ օրը գա ու փաստի առաջ կանգնեն, գնան-տեսնեն իրենց տեղերում այլ մարդիկ են նստած, կամ իրենց գնած տոմսը պարզապես լավ կեղծված պատճեն է»:

Նշենք, որ ավելի վաղ Հանրային հեռուստաընկերությունը հաղորդագրություն էր տարածել, ըստ որի՝ շրջանառվում են «Մանկական Եվրատեսիլ»-ի վերավաճառված ու կեղծ տոմսեր:

«Մարզահամերգային համալիրում կատարվելու է տոմսերի նույնականացում եւ QR կոդերի ստուգում: Խնդիրներից խուսափելու համար Առաջին ալիքը հորդորում է տոմսերը գնել միայն tomsarkgh.am կայքից: Սահմանափակ քանակությամբ ֆան գոտու տոմսեր կվաճառվեն նաև Telcell-ով: Վաճառքի այլ աղբյուրներ չկան»,- ասված էր հաղորդագրության մեջ:

Նշենք, որ մինչեւ 5 տարեկան երեխաների մուտքն անվճար է:

Հիշեցնենք՝ Դեկտեմբերի 11-ին՝ ժամը 18:00-ին, Կարեն Դեմիրճյանի անվան մարզահամերգային համալիրում տեղի կունենա «Մանկական Եվրատեսիլ 2022» երգի մրցույթը: Հայաստանը կներկայացնի 14 տարեկան Նարեն: Այս տարվա մեր պատվիրակն ընտրվել է նախապես հայտարարված բաց մրցույթի արդյունքում, որին 100-ից ավելի հայտ էր ստացվել Հայաստանից եւ տարբեր երկրներից: Ներկա կլինի 16 պատվիրակություն: «Մանկական Եվրատեսիլ 2022-ի»-ի միջոցառման հաղորդավարներն են երգչուհիներ Իվետա Մուկուչյանը, Կարինա Իգնատյանը եւ դերասան, երգերի հեղինակ Գարիկ Պապոյանը: