Գառնի Երևան երթուղայինի գինը թանկացել է. մրցույթը շահած «Մուլտի տրանսպորտի» տնօրենի խոսքով՝ 10 տարի արժեքը չի փոխվելու

Այսօր առավոտյան Կոտայքի մարզի Գառնի համայնքի որոշ բնակիչներ բողոքի ակցիա են իրականացրել եւ պահանջել վերանայել իրենց համայնքը Երեւանի հետ կապող երթուղու սակագինը:

Բանն այն է, որ մինչ այս Գառնիի ուսանողների համար հատկացված հատուկ ուսանողական ավտոբուս է եղել, որը, սակայն, անհայտ պատճառներով այլեւս չի սպասարկում, իսկ երթուղայինը, որով հասնում են Երեւան, նախկին 300 դրամից դարձել է 500 դրամ:

Ուսանողներից ոմանք, «Հայկական ժամանակ»-ի հետ զրույցում ներկայացնելով խնդիրը, նշեցին, որ առայժմ չաշխատող ուսանողի համար օրական միայն տրանսպորտին 1000 դրամ տալը բավականին մեծ գումար է: «Մենք 1000 դրամ պետք է հատկացնենք միայն Երեւան հասնելուն եւ հետ վերադառնալուն, 200 դրամ էլ՝ Երեւանից համալսարան, ապա այդտեղից՝ ավտոկայան. սա մեզ համար ահռելի մեծ թիվ է: Գուցե շատերին թվա, թե 200 դրամի համար կռիվ են անում, բայց ամսվա կտրվածքով դա բավականին զգալի գումար է մեր ընտանիքների համար»,- ասաց Ս. Դ.-ն:

Ուսանողներից մեկն էլ, որը չցանկացավ ներկայանալ, նշեց՝ տնից երեք հոգի ուսանող են, ծնողներից մեկն էլ Երեւանում է աշխատում, ուստի այս գնային փոփոխությունն իրենց ընտանիքի վրա կլորիկ գումար է արժենում. «Գառնի գյուղից Երեւանում աշխատող մարդիկ շատ-շատ են: Առավոտյան, երբ կանգնում ենք կանգառում, անգամ տեղ չի լինում»:

Ուսանողները նաեւ հայտնեցին, որ այսօր, երբ հավաքված են եղել, իրենց է մոտեցել Գառնի համայնքի ղեկավար Տիգրան Պողոսյանը: Վերջինս խոստացել է հետամուտ լինել խնդրի՝ հօգուտ ուսանողների լուծմանը: Ուսանողները նաեւ ստորագրահավաք են իրականացնում, պահանջում վերանայել սակագինը. շուրջ 200 ստորագրություն արդեն կա:

Նրանք նաեւ հայտնեցին, որ դիմում-բողոք են գրել տարածքային կառավարման եւ ենթակառուցվածքների նախարարություն, սակայն, ըստ իրենց, շատ կոշտ պատասխան են ստացել, ասել են՝ առաջիկա 10 տարում այդ գինը փոփոխության չի ենթարկվելու: «Հանրային տրանսպորտի մասին գին են որոշում, բայց հանրությունը դրանից տեղյակ չէ»,- դժգոհեցին ուսանողները:

Համայնքի ղեկավար Տիգրան Պողոսյանն էլ մեզ հետ զրույցում հայտնեց, որ համայնքային բյուջեով նախատեսել են վաղվանից ուսանողական անվճար ավտոբուս հանձնել շահագործման: «Մի քանի օրից եւս մեկ ավտոբուս կբերվի, դրսից է ներկրվում: Ուսանողների համար նախատեսում ենք անվճար»,- ասաց համայնքի ղեկավարը: Նշենք, սակայն, Երեւանից Գառնի վերադարձը համայնքը չի կազմակերպելու:

«Պահանջներ կան, որ կոնկրետ ընկերություն պետք է սպասարկի համայնքը: Մրցույթ է եղել, հաղթող կազմակերպությանն է վերապահվել, սակագնի առումով մենք որեւէ միջամտություն անել չենք կարող»,- եզրափակեց համայնքի ղեկավարը:

Նկատենք՝ Կոտայքի մարզը այն եզակի մարզերի թվում է, որտեղ ամբողջովին ներդրվել է միասնական երթուղային ցանցը: Մրցույթում հաղթել է «Մուլտի տրանսպորտ» ՍՊԸ-ն: Կոտայքի մարզի միասնական երթուղային ցանցը սպասարկող օպերատորի ընտրության մրցույթը կայացել է 2021 թվականի հոկտեմբերի 29-ին:

«Մուլտի տրանսպորտ» ՍՊԸ-ի տնօրեն Արթուր Դալլաքյանն էլ, «Հայկական ժամանակ»-ի հետ զրույցում անդրադառնալով խնդրին, ասաց՝ գինը որոշվել է մրցութային կարգով, մարզային քննարկումներ են եղել, եւ որոշում է կայացվել: «Առաջիկա 10 տարում գնային փոփոխություն չի լինելու»,- նշեց Դալլաքյանը:

ՀՀ տարածքային կառավարման եւ ենթակառուցվածքների նախարարությունից էլ, ի պատասխան մեր հարցերի, ներկայացրել են հետեւյալ տեղեկատվությունը. «Ավտոմոբիլային տրանսպորտի մասին» ՀՀ օրենքի 11-րդ հոդվածի 5-րդ մասի համաձայն՝ երթուղու սպասարկումն իրականացվում է մրցույթում հաղթող կազմակերպության՝ մրցույթի ժամանակ առաջարկած փոխադրավարձով, բացառությամբ ներհամայնքային երթուղային ցանցը սպասարկող օպերատորի կողմից սպասարկվող երթուղիների, որոնց սպասարկումն իրականացվում է ավագանու սահմանած փոխադրավարձով»:

Պատասխանում նաեւ նշվում է, որ, ըստ օրենքի, մրցույթին մասնակցող կազմակերպությունները մասնակցության հայտին կից մեկ ուղևորի փոխադրավարձի մասին տեղեկատվությունը ներկայացնում են փակ ծրարով, որը բացվում է մրցույթի արդյունքները ամփոփելու ժամանակ։ Նվազագույն գին ներկայացրած մասնակիցը կամ մրցույթի միակ մասնակիցը ստանում է սակագնի գնահատման առավելագույն միավոր։

«Քանի որ Կոտայքի մարզի միասնական երթուղային ցանցի մրցույթին մասնակցության հայտ է ներկայացրել մեկ կազմակերպություն՝ «Մուլտի տրանսպորտ» ՍՊԸ-ն, հետեւաբար մրցութային կարգի պահանջներին համապատասխան հաղթող ճանաչվելու արդյունքում երթուղիների փոխադրավարձերը սահմանվել են փոխադրողի ներկայացրած սահմանաչափով»,- հավելել են ՏԿԵ նախարարությունից:

Նկատենք՝ նախարարությունը ավելի վաղ հրապարակել էր միասնական նոր երթուղային ցանցի սակագները: «Հայկական ժամանակ»-ի հետ զրուցում ՀՀ տարածքային կառավարման եւ ենթակառուցվածքների նախարարության ավտոմոբիլային տրանսպորտի քաղաքականության բաժնի պետ Ռուզաննա Այվազյանը, անդրադառնալով Կոտայքի մարզի միասնական երթուղային ցանցի սակագնի փոփոխությանը, հայտնել էր. «Ունենք նոր փոխադրող, նոր օպերատոր: Իսկ գործող օրենսդրության պահանջների համաձայն՝ փոխադրողի կողմից է ներկայացվում փոխադրամիջոցի համար նախատեսվող ուղեւորավճարը. փաթեթը ներկայացնում են, հետո ժյուրին ընտրում է ամենանպատակահարմար գներով ու պայմաններով առաջարկը»:

Նշենք, սակայն, որ միջմարզային երթուղիների սակագներում ընդհանուր առմամբ փոփոխություն չի եղել: