Թովմասյանը դատապարտում է երկրում բռնության դեպքերը, ակնկալում՝ իրավապահների օբյեկտիվ գնահատականը

«Հայկական ժամանակ»-ը ՀՀ Ազգային ժողովի մարդու իրավունքների պաշտպանության և  հանրային հարցերի մշտական հանձնաժողովի նախագահ, «Պատիվ ունեմ» խմբակցության պատգամավոր Թագուհի Թովմասյանից մեկնաբանություն է խնդրել ընդդիմադիր ուժերի գործողությունների և դրանց հետևանքով մայրաքաղաք Երևանում և մարզերում արձանագրվող բռնությունների վերաբերյալ: 

Վերջինս մեր հարցերին պատասխանել է գրավոր: Այն ներկայացնում ենք ստորև.

- Տիկին Թովմասյան, ըստ ՔԿ հաղորդագրության, ՀՀԿ և ՀՅԴ երիտթևերի ներկայացուցիչները Գյումրի այցելության ժամանակ ծեծի են ենթարկել 74, 56, 72 և 84 տարեկան քաղաքացիների: Ձեր գնահատականը այս դեպքի առնչությամբ՝ որպես ՀՀ ԱԺ մարդու իրավունքների պաշտպանության և հանրային հարցերի մշտական հանձնաժողովի նախագահ:

- Դատապարտում եմ բռնության ցանկացած գործողություն, ում կողմից էլ այն գործադրված լինի: Բայց լավ կլինի, որ իրավապահները պարզեն, թե ինչպես էին տարեց մարդիկ հայտնվել դեպքի վայրում եւ, ամենակարեւորը, ում ուղղորդմամբ։ Միայն այդ դեպքում հնարավոր կլինի վստահ ասել, որ գործն ամբողջությամբ եւ օբյեկտիվ քննվել է: Իրավապահները մեծ անելիք ունեն:

- Ձեր գնահատականը նաև վերջին օրերին հանրահավաքների ժամանակ ցուցարարների կողմից ընդդիմադիրների հայացքները չկիսող քաղաքացիների վրա հարձակումների վերաբերյալ, մասնավորապես՝ Արմեն Մարտիրոսյանի, Սոս Ջանիբեկյանի:

- Պիտի պատասխանեմ նույն սկզբունքով. այլախոհների նկատմամբ ցանկացած ոտնձգություն դատապարտում եմ, ում կողմից էլ այն գործադրված լինի: Եվ իրավապահները, որ փութաջանորեն քրգործ հարուցեցին բռնության փորձի հատկանիշներով, պետք է խորությամբ քննեն նաեւ հարցը, թե ինչ նպատակով եւ ում դրդմամբ են այլախոհները հայտնվում ցուցարարների տեսադաշտում: Ինչպես նաեւ պետք է պարզաբանվի՝ սադրանք չկա՞ արդյոք նրանց գործողություններում: Իրավապահների կողմնակալ մոտեցումը եւ քննությունը էլ ավելի կարող է խորացնել անարդարության մթնոլորտը Հայաստանում:

- Հանձնաժողովն այս դեպքերի վերաբերյալ որևէ հայտարարություն պատրաստվո՞ւմ է տարածել, և ի՞նչ քայլեր եք այս պահին իրականացնում՝ բռնության այս տեսակ դեպքերի շարունակականությունը կանխելու համար:

- Արդեն պատասխանեցի եւ ներկայացրի իմ վերաբերմունքը նմանօրինակ գործընթացների մասին: Իսկ խորհրդարանական հանձնաժողովը բաղկացած է 7 պատգամավորներից, կարող եք մյուսներից հարցնել իրենց տեսակետների մասին:

Հիշեցնենք, որ խորհրդարանական և արտախորհրդարանական ուժերը ապրիլի 23-ից սկսած՝ փողոցային պայքարի են դուրս եկել՝ գործող իշխանության հեռացման պահանջով: Դրանից մի քանի օր առաջ էլ՝ զատկական կիրակին դեռ չավարտված՝ ՀՀ ԱԺ «Պատիվ ունեմ» խմբակցության ղեկավար, «Հայրենիք» կուսակցության նախագահ Արթուր Վանեցյանը հայտարարեց, որ նստացույց է սկսում Ազատության հրապարակում: Մայիսի 1-ից սկսած՝ ընդդիմադիրների գործողությունները, ըստ իրենց, մտել են երկրորդ՝ ավելի վճռական փուլ. մինչ օրս նրանք ամենօրյա ռեժիմով իրականացնում են բողոքի անկանոն գործողություններ, կարճ ժամանակով փակում փողոցներ:

Այս օրերի ընթացքում, սակայն, բռնության գործադրման փաստացի օրինակներ են արձանագրվում փողոցներում. դրանցից առավել հնչողություն ստացածներն են «Անտարես» հրատարակչության տնօրեն Արմեն Մարտիրոսյանի վրա հարձակումը, երբ ընդդիմադիր ակտիվիստները փողոցում հարվածել էին նրան, տարբեր առարկաներ նետել վերջինիս ուղղությամբ: Մյուս դեպքը դերասան Սոս Ջանիբեկյանի նկատմամբ ոտնձգությունն էր, երբ վերջինիս ուղղությամբ ևս նետել էին ջրի շիշ և հնչեցրել սեռական բնույթի հայհոյանքներ, վիրավորանքներ: Առավել հնչողություն ստացած դեպքերից մեկն էլ Գյումրիում տեղի ունեցած միջադեպն էր, երբ ընդդիմադիր ակտիվիստները հարձակվել էին, ըստ ՔԿ հաղորդագրության, 74, 56, 72 և 84 տարեկան քաղաքացիների վրա, հարվածներ հասցրել նրանց: Նշենք, որ բոլոր դեպքերով հարուցվել են քրեական գործեր, կան ձերբակալվածներ:

Անյուտա Աթանեսյան