Էմանուել Մակրոնը վստահ հաղթանակ է տարել՝ երկրորդ ժամկետով վերընտրվելով Ֆրանսիայի նախագահի պաշտոնում

Ֆրանսիայի գործող նախագահ Էմանուել Մակրոնն ընտրությունների երկրորդ փուլում վստահորեն հաղթել է իր մրցակից Մարին Լը Պենին և կշարունակի գլխավորել ԵՄ երկրորդ ամենամեծ երկիրը ևս հինգ տարի։

Երեկ Ֆրանսիայում ընթանում էր նախագահական ընտրությունների երկրորդ և որոշիչ փուլը: Քվեաթերթիկների 100% հաշվարկից հետո հայտնի է դարձել, որ Մակրոնը հավաքել է ձայների 58,55%-ը, Լը Պենը՝ 41,45%-ը:

Այնուամենայնիվ, ընտրությունների ընդհանուր արդյունքը հիասթափեցնող է Մակրոնի կողմնակիցների համար, քանի որ առաջին փուլի քվեարկությունը ցույց էր տվել հասարակության պառակտումը և ծայրահեղ աջերի և ծայրահեղ ձախերի վերելքը, ինչը Մակրոնին սպառնում է Ազգային ժողովում մեծամասնության կորստով և հունիսին կայացած խորհրդարանական ընտրություններից հետո Կառավարության վերահսկողության ոչ լիարժեք հնարավորությամբ:

20 տարվա մեջ առաջին անգամ Ֆրանսիայի նախագահը իշխանության ղեկին կմնա երկրորդ ժամկետով, այլ ոչ թե թոշակի կանցնի իր առաջին ժամկետից հետո մի երկրում, որտեղ բարձր ղեկավարության հանդեպ հակակրանքը երկար ժամանակ ազգային հատկանիշ է, գրում է BBC-ն՝ նշելով, որ նրան մասամբ օգնել է այն, որ հակառակորդը Լը Պենի օդիոզ կերպարն էր, և շատ ֆրանսիացիներ երկրորդ փուլում ընտրեցին «չարյաց փոքրագույնը»։

Հիշեցնենք՝ Մակրոնը լիդեր էր նաև ընտրությունների առաջին փուլից հետո, որի արդյունքներով բողոքներ և վիճարկումներ չէին եղել: Բացի այդ, առաջին փուլից հետո Մակրոնի վարկանիշը գերազանցում էր 40 տոկոսը, ինչը չէր եղել Ժակ Շիրակի ղեկավարումից ի վեր:

Այնուամենայնիվ, ընթացիկ քարոզարշավի երկու այլ փաստեր ստվերում են Մակրոնի հաղթանակը:

Նախ՝ ֆրանսիացիների 28%-ը չի քվեարկել. 1969 թվականից ի վեր նման զանգվածային բոյկոտ երկրում չի եղել։ Եվ երկրորդ, երկրորդ փուլում Լը Պենի հետ տարբերությունը երկու անգամ կրճատվեց հինգ տարի առաջվա հաղթանակի համեմատ, և առաջին փուլում ընտրողների 30%-ը քվեարկեց երկու ծայրահեղ աջ թեկնածուների օգտին։

Հաղթանակի մասին տեղեկանալուց հետո Մակրոնը հանդես է եկել ելույթով, որում խոստովանել է, որ երկիրը պառակտված է, և հաղթական ելույթում խոստացել է լինել ողջ ժողովրդի նախագահը։

«Նրանց, ովքեր քվեարկել են իմ օգտին, բայց ոչ իմ գաղափարների, այլ ծայրահեղ աջերին իշխանությունից հեռու պահելու համար, ես պարտական եմ ձեզ, ես այլևս մեկ ճամբարի թեկնածու չեմ, ես բոլորի նախագահն եմ»,- ասել է նա:

Այսպիսով՝ Մակրոնը փաստացի հաստատել է փորձագետների այն ենթադրությունը, որ 44-ամյա նախագահը ստիպված կլինի հարմարեցնել իր անզիջում ոճը երկրորդ ժամկետի համար, դառնալ ավելի մեղմ և ավելի հաճախ փնտրել ավելի լայն աջակցություն, նախքան բուռն նախաձեռնություններով հանդես գալը՝ ինչպես երկրի ներսում, այնպես էլ եվրոպական քաղաքականության շրջանակներում:

Մակրոնը վերջին տարիներին դարձել է ԵՄ դե ֆակտո դեմքը այն բանից հետո, երբ բրիտանացիներն ընդունեցին Brexit-ը, իսկ Գերմանիայում՝ միության մնացած 27 երկրներից ամենամեծում, պաշտոնաթող եղավ Անգելա Մերկելը՝ 21-րդ դարի եվրոպական քաղաքականության գլխավոր ծանր հրետանին:

Մակրոնն իր ելույթում խոստացել է շարունակել իր ջանքերը՝ ամրապնդելու ԵՄ-ն՝ աշխարհի ամենամեծ քաղաքական միությունը, որն ունի մինչև կես միլիարդ բնակչություն և աշխարհի երկրորդ ամենամեծ տնտեսությունը ԱՄՆ-ից հետո:

Հիշեցնենք՝ ապրիլի 10-ին Ֆրանսիայում կայացել էր նախագահական ընտրությունների առաջին փուլը, որին մասնակցությունը, նախնական տվյալներով, կազմել էր գրեթե 75 տոկոս։ Բարձրագույն պետական պաշտոնի համար ի սկզբանե պայքարում էր 12 թեկնածու։

Առաջին փուլի արդյունքներով՝ 12 թեկնածուներից երկրորդ փուլ պետք է անցնեին միայն երկուսը՝ գործող նախագահ Մակրոնն ու նրա հիմնական մրցակից, «Ազգային համախմբման» թեկնածու, պատգամավոր Մարին Լը Պենը:

Նշենք, որ Ֆրանսիայում նախագահն ընտրվում է 5 տարի ժամկետով:

Ըստ երկրի օրենսդրության՝ եթե թեկնածուներից ոչ մեկը առաջին փուլում չհավաքի 50%-ից ավելի, ապա տեղի է ունենալու ընտրությունների երկրորդ փուլը։

Ֆրանսիական հինգերորդ Հանրապետության ավելի քան 60 տարիների ընթացքում ոչ մի նախագահական ընտրություն մեկ փուլով չի անցկացվել։