Ֆրանսահայության համար Մարսելը եղել է Ֆրանսիայի դարպասը. ավարտվել է Սփյուռքի գլխավոր հանձնակատարի այցը Մարսել

Աշխատանքային այցով Ֆրանսիայում գտնվող Սփյուռքի գլխավոր հանձանակատար Զարեհ Սինանյանը Մարսել այցի առաջին օրվա ընթացքում հանդիպել է Մարսելի և տարածաշրջանի ընտրված հայ պաշտոնատար անձանց հետ, մասնավորապես Մարսելի փոխքաղաքապետ Օդրի Գաթյանի, Բուկ Բել Էյրի սոցիալական հարցերով փոխքաղաքապետ Էդմոնդ Էութեջյանի, քաղաքային խորհրդի պատվիրակված խորհրդական Էրիկ Սեմերջեանի, Մարսելի մետրոպոլի, Մարսելի տարածաշրջանային, ինչպես նաև 13-րդ և 14-րդ շրջանների խորհրդականներ Ֆրանկ Օհանեսյանի և Լորենս Սեմերջյանի և այլոց հետ։

Այս մասին հաղորդագրություն է տարածել Հանձնակատարի գրասենյակը:

«Ինքս էլ եղել եմ ընտրված պաշտոնյա և շատ եմ գնահատում ձեր այդ դժվար որոշումը՝ զբաղվել քաղաքականությամբ։ Հանրային ծառայությունը զոհաբերություն է, և դուք ընտրել եք այդ ճանապարհը։ Ամեն քաղաքում հիացմունք ապրեցի՝ տեսնելով, թե որքան հայ է ներգրավված քաղաքական գործընթացներում»,-նշել է  Գլխավոր հանձնակատարը։

Պաշտոնյաները հարցեր են ուղղել Հայաստանում և Արցախում ընթացիկ վիճակի, մասնավորապես՝ անվտանգության խնդիրների վերաբերյալ, այնուհետ անդրադարձ կատարեցին Հայաստան-սփյուռք հարաբերություններին։

Զարեհ Սինանյանը նշելէ, որ Սփյուռքի գլխավոր հանձանակատարի գրասենյակն ապրում է այն սկզբունքով, որ խնդիրները հայաստանյան կամ սփյուռքյան չեն: Դրանք համահայկական խնդիրներ են։ Գլխավոր հանձնակատարը հայազգի պաշտոնյաներին սիրով հրավիրել է Հայաստան՝ քննարկելու սփյուռքի հետ աշխատանքի հայեցակարգի իրենց տեսակետները։

Անդրադարձ է կատարվել նաև երիտասարդական ծրագրերի ակտիվացմանը, Երևանի քաղաքապետարանի հետ աշխատանքի խորացմանը, միասնական քաղաքականության բացակայությանը վերաբերող հարցերին։

Երկրորդ օրվա ընթացքում Գլխավոր հանձնակատարը հանդիպել է Մարսելի քաղաքապետ Միշել Ռուբիրոլայի հետ։ «Ֆրանսահայության համար Մարսելը եղել է Ֆրանսիայի դարպասը»,-նշեց Գլխավոր հանձնակատար Զարեհ Սինանյանը՝ շնորհակալություն հայտնելով քաղաքապետին ջերմ ընդունելության համար։

Այնուհետ Զարեհ Սինանյանը ներկայացրել է իրավիճակն Արցախում՝ նշելով, որ Հայաստանը տարածաշրջանում ձգտում է խաղաղության։ «Ցեղասպանության ճանաչման գործընթացն ուղղակի պետք է կապվի Արցախի անկախության ճանաչմանը։ Եթե չլիներ Հայոց ցեղասպանության փաստի անպատժելիությունը, ականատես չէինք լինի Արցախյան վերջին պատերազմին»։

Պատերազմի օրերին Մարսելի քաղաքապետ Միշել Ռուբիրոլան մշտապես եղել է Արցախի կողքին՝ կոչ անելով քաղաքային խորհրդին ճանաչել Արցախի անկախությունը։ Այժմ Մարսելը նախապատրաստվում է նշել Երևանի հետ քույրացման 30-ամյակը։ «Սպասում ենք առաջարկներ հայկական կողմից, որպեսզի պատշաճ և ակտիվ տոնենք այս իրադարձությունը»,-ընդգծել է քաղաքապետը։

Պայմանավորվածություն է ձեռք բերվել Երևանի քաղաքապետարանի հետ քննարկել առաջարկներն ու համատեղ շարժվել առաջ։

Զարեհ Սինանյանը հանդիպել է մետրոպոլիտենի փոխնախագահ Դիդիե Փարաքյանի հետ։ «Ողջունում եմ Ձեր այցը Ֆրանսիա։ Հանձին ինձ՝ Դուք ունեք իրական ընկեր, իրական դաշնակից»,-նշեց պարոն Փարաքյանը։ Հանդիպման ընթացքում քննարկվել են մետորպոլիտենի և Հայաստանի միջև համագործակցության հնարավոր ուղղությունները։

Այնուհետ Գլխավոր հանձնակատարն այցելել է Մարսելի Սրբոց Թարգմանչաց Մայր եկեղեցի և Արամ քահանա Ղազարյանի ուղեկցությամբ ծանոթացել եկեղեցու պատմությանը։ Եկեղեցական խորհրդի ղեկավարության հետ հանդիպման ընթացքում քննարկվել են Մարսելի հայ համայնքին առնչվող խնդիրներ։

Եկեղեցուն կից Խաչատուր Աբովյանի անվան դպրոցում ևս այցելել է Գլխավոր հանձնակատարը: Այժմ դպրոցում ուսանում է 200-ից ավելի հայ աշակերտ։

Մարսել այցի ավարտին Գլխավոր հանձնակատարը հանդիպել է համայնքի ներկայացուցիչների հետ՝ ներկայացնելով Սփյուռքի գործերի գլխավոր հանձնակատարի գրասենյակի գործունեությունն ու ծրագրերը։ «Այսօր մենք շարժվում ենք 2 ուղղությամբ՝ հնարավորինս խորքային և լայն ներգրավել սփյուռքին հայաստանյան գործընթացներում և ակտիվացնել հայրենադարձության գործընթացը»,-նշել է Գլխավոր հանձնակատարը։

Գրասենյակի բոլոր ծրագրերը համայնքի ներկայացուցիչների մոտ հետաքրքրություն են առաջացրել, հատկապես՝ «իԳործ» ծրագիրն ու սփյուռքի պարտատոմսերի թողարկումը։ Հարցեր են հնչել Երևան-Մարսել-Երևան ուղիղ չվերթների բացակայության, հայապահպանության, հայրենադարձության և այլ թեմաների շուրջ։