ՀՀԿ-ով չեմ առաջադրվել, որպեսզի ապահովեմ ավելի լայն կոնսոլիդացիա. Մամիկոն Ասլանյան

2020 թվականի դեկտեմբերի 5-ին ՏԻՄ ընտրություններ են սպասվում ՀՀ-ի 30-ից ավելի համայնքներում, որոնցից մեկն էլ Վանաձորն է: Ընտրություններին մասնակցում է նաև Վանաձորի նախկին համայնքապետ Մամիկոն Ասլանյանը, որը գլխավորում է «Ասլանյան» դաշինքի համամասնական ցուցակը:

«Հայկական ժամանակ»-ն Ասլանյանի հետ զրուցել է Վանաձորում իր կատարած փոփոխությունների, «Հանրապետական» կուսակցությունով չառաջադրվելու և հնարավոր կոալիցիաների մասին:

- Պարոն Ասլանյան, 2016-ին Դուք առաջադրվել էիք Հայաստանի Հանրապետական կուսակցությունով, նաև կուսակցության անդամ եք: Ինչո՞ւ որոշեցիք այս անգամ դաշինքով առաջադրվել: Արդյոք խզե՞լ եք հարաբերությունները կուսակցության հետ:

- Ես երբեք չեմ խուսափել իմ հանրային որևէ ասված խոսքից կամ քայլից: Երբեք չեմ խուսափել իմ կենսագրությունից: 2021 թվականին որոշել եմ առաջադրվել այս ֆորմատով, որպեսզի ապահովեմ ավելի լայն կոնսոլիդացիա և ավելի քիչ քաղաքական բաղադրիչ դնեմ իմ առաջադրման մեջ: Ես ցանկանում եմ բարձր նշաձող սահմանել և զբաղվել համայնքին վերաբերող խնդիրներով:

- Շարունակո՞ւմ եք ՀՀԿ անդամ մնալ:

- Ես սառեցրել եմ անդամակցությունս:

- «Ասլանյան» դաշինքի կազմում են «Ազատ դեմոկրատներ» և «Իմ հզոր համայնք» կուսակցությունները: Ի՞նչ կապ ունեք այս կուսակցությունների հետ, ինչպե՞ս եք եկել համաձայնության, որ հենց այս ֆորմատով պետք է հանդես գաք (- հեղ. «Ազատ դեմոկրատներ» կուսակցության նախագահը Խաչատուր Քոքոբելյանն է: «Իմ հզոր համայնք» կուսակցության մասին մանրամասն տեղեկություններ այս պահին դեռ չկան, որպես վարչության նախագահ՝ նշված է Սպարտակ Թարթիկյանի անունը):

- Ես եմ դիմել, բանակցել ենք միասին, և եղել է համաձայնություն միասին դաշինքով հանդես գալու: «Իմ հզոր համայնք» կուսակցությունը նոր է ստեղծվել, այդքան լավ չեմ ճանաչել իրենց ղեկավարներին, իսկ մյուս կուսակցության ղեկավարին լավ ճանաչել եմ:

- Պնդումներ կան, որ ՏԻՄ ընտրություններին Ռոբերտ Քոչարյանը հանդես չի գալիս իր դեմքով, այլ սատարում է որոշ ուժերի: Երբ ուսումնասիրում էինք ավագանու Ձեր ցուցակը, նկատեցինք, որ թեկնածուներից երկուսը եղել են «Հայաստան» դաշինքի պատգամավորի թեկնածու: Արդյոք որևէ կերպ Ռոբերտ Քոչարյանը սատարո՞ւմ է Ձեզ, թե՞ ոչ:

- Մեր ուժին պաշտպանում է վանաձորցին: Ո՛չ Ռոբերտ Քոչարյանը, ո՛չ Սերժ Սարգսյանը Վանաձորի բնակիչներ չեն, որ մեզ սատարեն: Մենք իր հետ որևէ առնչություն չունենք: Ի դեպ, մեր ցուցակում կան նաև այնպիսի մարդիկ, որոնք նախկին իշխանությունների ժամանակ ընդդիմադիր դիրքերում էին: Լայն կոնսոլիդացիա ասելով՝ նաև հենց սա նկատի ունեմ, որ մեր ուժը չունի քաղաքական նպատակաուղղվածություն. մեր խնդիրը Վանաձորն է, նրա ներկան ու ապագան:

- Դուք 5 տարի եղել եք Վանաձորի համայնքապետը: Ի՞նչ կարևոր ծրագրեր եք արել այդ 5 տարիների ընթացքում և ընտրվելու դեպքում ի՞նչ փոփոխությունների կարող են ականատես լինել Վանաձոր համայնքի բնակիչները:

- Մեր թիմի կատարած բարեփոխումները շատ-շատ են: Վերանորոգել ենք 38 փողոց, 2 նոր այգի ենք հիմնել, 3 այգի վերակառուցել ենք, 59 փողոց ենք վերակառուցել, նոր ավտոպարկ ենք ստեղծել, համայնքի մշակութային և սպորտային կենտրոններ ենք նորոգել: 2 մանկապարտեզ ենք հիմնանորոգել: Սուբվենցիոն ծրագրերով 2 միլիարդ 660 միլիոն դրամի աշխատանքներ ենք կատարել, որից 1 միլիարդից ավելին համայնքի ներդրումն է: Աշխատանքները շատ-շատ են: Իհարկե, կային ծրագրեր, որոնք համայնքի բյուջեի քիչ լինելու հետևանքով չկարողացանք իրականացնել, որոնցից մեկը տնակային ավանների խնդիրն էր: Իսկ ապագայի համար մենք առաջարկում ենք իրատեսական ծրագրեր, քանի որ ամենալավը մեր թիմը գիտի համայնքն ու նրա բյուջեն: Ամենալավը մենք ենք հասկանում, թե ինչպես պետք է համայնքային բյուջեն ճիշտ բաշխել:

- Եթե կարիք լինի որևէ քաղաքական ուժի հետ կոալիցիա կազմելու, ապա ո՞ր ուժի հետ եք տեսնում հնարավորություն: Մամուլում խոսակցություններ կան, որ արդեն «Քաղաքացիական պայմանագիր» կուսակցության հետ ունեք համաձայնեցում:

- Մենք մասնակցում ենք ընտրություններին՝ հաջողություն արձանագրելու համար: Նախնական պայմանավորվածություն որևէ ուժի հետ չունենք և հետագայում էլ քաղաքական որևէ քայլ մենք չենք անելու: Եթե կլինեն անհատներ, ում հետ նպատակահարմար կհամարենք աշխատել, այդ քաղաքացիների հետ կաշխատենք, անկախ նրանց քաղաքական պատկանելիությունից:

- Քարոզարշավի ժամանակ, երբ շփվում եք քաղաքացիների հետ, ի՞նչ եք կարծում՝ ինչպես 2016-ին իրենց քվեն վստահեցին Ձեզ, այս ընտրություններին և՞ս կվստահեն:

- Վանաձորցին իմաստուն է, վանաձորցին գիտի գնահատել, և ես նրանցից ակնկալում եմ մեծ վստահության քվե ստանալ, որպեսզի կարողանամ Վանաձորի խնդիրներին լուծումներ առաջարկել:

Անյուտա Աթանեսյան