Որևէ համայնքում մահացած քաղաքացու հոգեհանգստին ավելի շատ մարդ է գնում, քան Քոչարյանի հանրահավաքներին. Մեհրաբյան

2020 թվականի նոյեմբերի 9-ի՝ Պուտին-Փաշինյան-Ալիև եռակողմ հայտարարության մեկ տարին լրանալու նախաշեմին՝ երեկ՝ նոյեմբերի 8-ին, «Ազատության» հրապարակում ընդդիմադիր «Հայաստան» դաշինքը՝ քաղաքական թիմի առաջնորդ Ռոբերտ Քոչարյանի գլխավորությամբ, հանրահավաք էր հրավիրել, որով, ըստ Քոչարյանի, համազգային դիմադրության սկիզբն են ազդարարում:

Նշենք, որ «Իրազեկ քաղաքացիների միավորում» (ԻՔՄ) հասարակական կազմակերպության աերոնկարահանման տվյալների համաձայն՝ «Հայաստան» դաշինքի հրավիրած հանրահավաքին ժամը 19:30-ի դրությամբ մասնակցել էր 3700 քաղաքացի:

Հանրահավաքին բացի ընդդիմության մի շարք ներկայացուցիչներից, ելույթ ունեցավ նաև «Հայաստան» դաշինքի առաջնորդ Ռոբերտ Քոչարյանը, որը, անդրադառնալով Արցախյան 44-օրյա պատերազմին, մասնավորապես նշեց. «Իշխանությունն արեց ամեն ինչ՝ պատերազմը անխուսափելի դարձնելու համար. ձախողեց բանակցային գործընթացը, հարցի քննարկումը տեղափոխեց տարածքային ամբողջական դաշտ, ըստ էության՝ հրահրեց պատերազմ»:

«Հայկական ժամանակի» հետ զրույցում քաղաքագետ Ռուբեն Մեհրաբյանը, անդրադառնալով Քոչարյանի՝ գործող իշխանությանը պատերազմ հրահրելու մեջ մեղադրող հայտարարությանը, այն համարեց հակահայ:

«Նախ, եթե խոսվում է բանակցությունները ձախողելու մասին, ապա այդ խոսքերի հասցեատերը Սերժ Սարգսյանն է, որը հրապարակայնորեն հայտարարել է, որ բանակցությունները դադարել էին: Նա դրա մասին խոսել էր դեռ 2018-ին: Պատերազմ հրահրելու մասին Ռոբերտ Քոչարյանի հայտարարությունը հակապետական է: Այլ կերպ այն մեկնաբանել չեմ կարող: Իշխանությանը կարելի է դեմ լինել, չսիրել, բայց պետությանը հարվածել չի կարելի»,- նշեց քաղաքագետը:

Մեհրաբյանի խոսքով՝ «Հայաստան» դաշինքի առաջնորդն այս հայտարարությունից հետո դառնալու է «Հաքքին ազ-ի» գլխավոր հերոսը:

«Որովհետև այն, ինչ հայտարարում է Ռոբերտ Քոչարյանը, ադրբեջանական պրոպագանդայի համար երազանք է: Նա երբ բառեր է շաղ տալիս՝ առանց մտածելու հետևանքների մասին, ինտելեկտի բարձր ցուցիչի մասին չի խոսում»:

Քոչարյանը, ելույթում անդրադառնալով կոռուպցիոն բացահայտումներին, երեկ ասել էր. «Խոստացել էին կոռուպցիայի և թալանի դեմ պայքար, այսօր թալանի առաջատարներն են: Այսօր մտել են ձեր բոլորի գրպանը, փող են դիզում, փող են աշխատում գնաճի վրա, կորոնավիրուսի վրա, հիվանդների, մահերի վրա: Քերթում են, ինչ հնարավոր է քերթել»:

Քաղաքագետը, անդրադառնալով Քոչարյանի՝ գործող իշխանությունների թալանչի լինելու պնդումներին, նկատեց՝ դրա համար փաստեր են պետք:

«Թալանը քրեական հանցագործություն է: Թալանի հետ կապված գործով հենց ինքը Քոչարյանն է անցնում: Եթե ինքը ունի ապացույցներ, ապա թող դրանք ներկայացնի. դատական համակարգը բաց է իր հայցերի համար»:

Հանրահավաքի ընթացքում Ռոբերտ Քոչարյանը վստահեցրել է, որ իշխանությունների հեռացնելու հարցը ամիսների խնդիր է: «Պայքարելու ենք, և վստահ եղեք՝ նրանց (գործող իշխանությանը) մենք վռնդելու ենք կա՛մ բարիկադներով, կա՛մ ընտրություններով»,- ասել էր Քոչարյանը:

Հարցին՝ արդյոք ընդդիմադիր «Հայաստան» դաշինքը, որի հանրահավաքներին մասնակցում է շուրջ 4000 քաղաքացի, ունի՞ շանս «բարիկադային» իշխանափոխություն իրականացնելու և  ի՞նչ ընտրությունների մասին է խոսքը, երբ դրանք վերջերս են տեղի ունեցել, քաղաքացին էլ տվել է իր քվեն, Մեհրաբյանն ընդգծեց.

«Ռոբերտ Քոչարյանը ժողովրդից մանդատ ստացած իշխանության հետ չի կարող այս լեզվով խոսել: Նա երևի մեծ մոլորության մեջ է: Իր հայտարարությունները բացի ծիծաղից, այլ բան չեն առաջացնում: Երեկվա հանրահավաքի մասնակիցների թիվը ցույց տվեց, որ ինչ-որ համայնքում մահացած քաղաքացու հոգեհանգստի արարողությանն ավելի շատ մարդ է գնում, քան Քոչարյանի հանրահավաքներին»:

Նկատառմանը, որ ընդդիմությունը հանրահավաքից առաջ քաղաքացիներին հորդորել էր պահպանել համաճարակային կանոնները, իր ելույթում էլ Ռոբերտ Քոչարյանն իշխանություններին մեղադրեց կորոնավիրուսի դեմ պայքարը տապալելու համար՝ ասելով, որ Հայաստանում թռիչքաձև աճ է ունենում միայն զոհերի թիվը, մահերի թիվը, գերեզմանների թիվը, և փող են աշխատում կորոնավիրուսի ու հիվանդների վրա, բայց հենց «Հայաստան» դաշինքի առաջնորդները չէին պահպանում համաճարակային կանոնները, քաղաքագետը նկատեց.

«Ավելին ասեմ՝ Քոչարյանի կողմնակիցներից շատերը հրապարակայնորեն ամեն ինչ անում են, որպեսզի մարդկանց մոտ անվստահություն սերմանվի քովիդի դեմ պայքարի վերաբերյալ: Չնայած դա իշխանության բացթողումն է, որ նման զազրախոսությունները հենց բնում չեն խեղդում և այդ թունավոր դեզինֆորմացիայի հետևից չեն գնում: Այդքանից հետո, եթե իրենք մեղադրում են իշխանություններին, սա բացի զավեշտից, այլ բան չի հիշեցնում»:

Անդրադառնալով Քոչարյանի դելիմիտացիայի մասին արված հետևյալ պնդմանը, ըստ որի՝ դելիմիտացիա նշանակում է, որ ուղղակի կամ անուղղակի, բայց փաստացի ճանաչում ես Ադրբեջանի տարածքային ամբողջականությունն ու ուղղակի ֆիքսում Ղարաբաղի անկլավային վիճակն Ադրբեջանի ներսում, քաղաքագետ Ռուբեն Մեհրաբյանն ասաց, որ այս թեզը լիովին տեղավորվում է ալիևյան տրամաբանության մեջ:

«Սա այն է, ինչ Ադրբեջանը ցանկանում է «սղացնել»: Ինչ նկատի ունի հայկական կողմը դեմարկացիա և դելիմիտացիա ասելով. դա նշանակում է Հայաստանի և Ադրբեջանի միջև գծվելիք սահմանի աշխատանքներ, իսկ Ղարաբաղի հարցը դրա հետ ոչ մի կապ չունի: Բայց պարոն Ռոբերտ Քոչարյանը, փաստորեն, կարծիքի փաթեթավորմամբ առաջ է տանում Ալիևի ռեժիմի տեսակետները»:

Դիտարկմանը՝ ընդդիմությունը ռիսկ է տեսնում, որ իշխանությունները նոր պայմանագիր կկնքեն Ադրբեջանի հետ, քաղաքագետը նշեց՝ այդպիսի պայմանագրի կնքման միակ շահագրգիռ կողմն Ադրբեջանն է. «Բայց ես հենվում եմ պաշտոնական Հայաստանի հայտարարության վրա, ըստ որի՝ նոր պայմանագիր չկա ու չի կարող լինել, եթե դա ՀՀ-ի շահերից չի բխում»,-եզրափակեց Մեհրաբյանը։

Անյուտա Աթանեսյան