Հին ու նոր քաղաքական ուժերը կպայքարեն Գյումրու ՏԻՄ ընտրություններում. առաջին անգամ գործող քաղաքապետը չի մասնակցի

Գյումրիում ՏԻՄ ընտրությունները կընթանան բավական թեժ մթնոլորտում: Գյումրեցիների հազար ու մի անլուծելի խնդիրները կարգավորելու, քաղաքը ծաղկեցնել-շենացնելու ու նման այլ մտադրություն-վստահությամբ ընտրապայքարի մեջ կմտնի 10 քաղաքական ուժ՝ 3 դաշինք 7 կուսակցություն:

Ամենամեծ ընտրացուցակը ներկայացրել է «Բալասանյան դաշինք» սոցիալական կուսակցությունը: «Շարունակենք միասին» կարգախոսով դաշինքի 42 հոգանոց կազմը գլխավորում է Գյումրու համայնքապետարանի ենթակայության տակ գործող Կոմունալ ծառայություն համայնքային բյուջետային հիմնարկի տնօրեն Վարդգես Սամսոնյանը։ Տևական ժամանակ Սամսոնյանի հետ կապ հաստատել չի հաջողվում, ըստ այդմ՝ պաշտոնապես անհայտ է, թե ովքե՞ր են կուսակցության կազմում: Ըստ շրջանառվող լուրերի՝ ցուցակում են քաղաքապետարանի աշխատակիցներ, ավագանու անդամներ, քաղաքապետարանի ենթակայությամբ գործող կառույցների ներկայացուցիչներ, նաև՝ քաղաքապետի տեղակալ Հայկ Սուլթանյանն ու մամուլի քարտուղար Սոնա Առաքելյանը:

Այս ընտրություններին գործող քաղաքապետը չի առաջադրվի: Գյումրու պատմության մեջ առաջին դեպքն է, երբ գործող քաղաքապետը չի առաջադրում իր թեկնածությունը: Ավելին՝ գրեթե մեկ ամիս է՝ Սամվել Բալասանյանն արձակուրդում է՝ ԱՄՆ-ում: ՀԺ-ի՝ իրեն ուղղված հարցերին մամուլի քարտուղարի միջոցով փոխանցել էր, որ դեռ մի փոքր էլ պետք է սպասենք, կգա, իր խոսքը կասի: Բայց թե ի՞նչ ձևաչափով կամ ե՞րբ, ըստ Սոնա Առաքելյանի՝ անհայտ է:

Հաջորդ մեծ ընտրացուցակով՝ 41 թեկնածու, թիվ 31 ՏԸՀ է ներկայացել «Քաղաքացիական պայմանագիր» կուսակցությունը: Այն գլխավորում է Շիրակի մարզպետ Հովհաննես Հարությունյանը: 2-րդ համարը ԱԺ պատգամավոր Նազելի Բաղդասարյանի եղբայրն է՝ Արման Բաղդասարյանը: 3-րդը Գյումրու ինֆեկցիոն հիվանդանոցի տնօրեն Աստղիկ Բեյբությանն է:

«Գյումրին կռնա» դաշինքը 20 թեկնածուի փաստաթուղթ է ներկայացրել: Դաշինքը ղեկավարում է գործարար Վարդան Սրտաշյանը: Ընտրացուցակի կազմում տարբեր ոլորտների ներկայացուցիչներ են՝ մտավորականներ, գործարարներ, բժիշկներ, դասախոսներ և այլք: Դաշինքը գլխավորում է «Արաքս-95» ՍՊԸ տնօրեն Վարդան Սրտաշյանը, ընտրացուցակի 2-րդ համարը Շիրակի նախկին փոխմարզպետ, գործարար Վարդան Գրիգորյանն է: 3-րդ համարը «Իրական դպրոց» կրթամշակութային հիմնադրամի Գյումրու համակարգող, դասախոս Վարդուհի Բալոյանն է:

Գյումրու ՏԻՄ ընտրություններին կմասնակցի նաև «Զարթոնք» ազգային-քրիստոնեական կուսակցությունը: ՏԸՀ է ներկայացրել 41 հոգանոց ընտրացուցակ: Կուսակցության քաղաքապետի թեկնածուն ԱԱԾ նախկին աշխատակից, «Գրոմ սեքյուրիթի» պահնորդական ընկերության տնօրեն Վարդևան Հակոբյանն է:

«Արժանապատիվ ուղի» կուսակցության միջոցով քաղաքականություն է վերադառնում ՕԵԿ նախկին անդամ Հովհաննես Մարգարյանը: Կուսակցությունը Գյումրու ՏԻՄ ընտրություններին մասնակցելու է 22 հոգանոց ցուցակով:

«Հայրաքաղաք» դաշինքի կազմում 28 թեկնածու է: Քաղաքապետ դառնալու առաջնայնությունը Գյումրու ավագանու անդամ, անկուսակցական, Ժուռնալիստների «Ասպարեզ» ակումբ ՀԿ հիմնադիր Լևոն Բարսեղյանինն է: Դաշինքի կազմում են Ռամկավար Ազատական և «Ժառանգություն» կուսակցությունները:

Ցուցակի առաջին հնգյակում են ամուսիններ Հասմիկ Պետրոսյանն ու Վահագն Հովհաննիսյանը: Հասմիկն Ավստրիական Մոր ու մանկան հիվանդանոցի բժշկուհի է, Վահագնը՝ ՇՊՀ դասախոս, «Ժառանգություն» կուսակցության ՇՄ կառույցի ղեկավար: Թեկնածուների թվում են նաև հոգեբան Արմինե Գմյուրը, Գյումրու հրաձգության մանկապատանեկան մարզադպրոցի մարզիչներ, լրագրող Լուսինե Մովսիսյանը, «Ազգ» թերթի թղթակից Գեղամ Մկրտչյանը և այլք:

Կոմունիստները ևս իրենց մասնակցությունը կապահովեն Գյումրու ՏԻՄ ընտրություններում՝ Կոնստանտին Ղավազյանի գլխավորությամբ: ՀԿԿ-ն 20 հոգանոց ցանկով է ներկայացել թիվ 31 Տեղամասային ընտրական հանձնաժողով: Ի դեպ, նկատենք, որ քաղաքում փակցրած պաստառն էլ տառասխալով է:

Հայաստանի հանրապետական կուսակցության Գյումրու քաղաքապետի թեկնածուն նախկին քաղաքապետ Վարդան Ղուկասյանի հորեղբորորդին է՝ Արտյոմ Ղուկասյանը: Կուսակցությունը կներկայանա 33 հոգանոց ցուցակով:

«Թասիբով» դաշինքը 22 հոգանոց ընտրացուցակ ունի: Ցուցակը գլխավորում է ՀՀ մարդու իրավունքների պաշտպանի՝ Շիրակի տարածքային գրասենյակի նախկին համակարգող Կարապետ Պողոսյանը:

ՀՀ նախկին սոցապնախարարներ Մանե Թանդիլյանի և Մեսրոպ Առաքելյանի հիմնադրած «Ապրելու երկիր» կուսակցությունը ևս որոշել է մասնակցել Գյումրու ՏԻՄ ընտրություններին: Համամասնական ցուցակը կգլխավորի Կարեն Մալխասյանը: Կուսակցության ընտրացուցակում 22 անձ է ներառված:

Փաստաթղթերը, ըստ հանձնաժողովի նախագահի, հիմնականում նորմալ են եղել, բայց տեխնիկական հարցեր ծագել են:Կարգավորել են: «Բոլորի մոտ գենդերային, ինչպես նաև կուսակցական-անկուսակցական հարաբերակցությունը պահպանված են, կարելի է ասել՝ 99 տոկոսանոց ցուցակներ են եղել, էն մի տոկոսն էլ շտկվել է»,- վստահեցնում է Թիվ 31 ՏԸՀ նախագահ Տիգրան Ղազարյանը:

Սամսոն Մատինյան