Աշխատանքից ազատման դիմումներ և վիճաբանություններ Գյումրու Մարիամ և Երանուհի Ասլամազյան քույրերի պատկերասրահում

Երեկ բաց նամակ ֆեյսբուքյան հետևորդների, այսօր արդեն ասուլիս բոլորի համար: «Մարիամ և Երանուհի Ասլամազյան քույրերի պատկերասրահում» խառնաշփոթ է: Տնօրենի ժամանակավոր պաշտոնակատար Միքայել Վարդպարոնյանը հրաժարվել է զբաղեցրած պաշտոնից այն բանից հետո, երբ պատկերասրահի աշխատակցուհիներից մեկն աշխատանքից ազատման դիմում է ներկայացրել Գյումրու քաղաքապետարանի համապատասխան բաժին:  Խնդիրը ծագել է դեռևս նախընտրական քարոզչության շրջանում:

Նամակի հեղինակ պատկերասրահի աշխատակիցները տեղեկացրել էին, որ աշխատակցուհին, որի մասին խոսում են, բազմիցս ունեցել է կոնֆլիկտներ պատկերասրահի գրեթե բոլոր աշխատակիցների հետ՝ աշխատանքային, քաղաքական, սոցիալական, կենցաղային և այլ տարբեր հարցերի շուրջ: Բազմիցս օգտագործել է անձնավորված վիրավորանքներ և դրսևորել է ոչ ադեկվատ պահվածք,  հեռախոս է նետել այլ աշխատակցի ուղղությամբ, հարվածել ինքն իր գլխին, բղավել: Այդ գործողություններն, ըստ պատկերասրահի աշխատակիցների, բազմիցս գրավել են հարակից շենքի բնակիչների ուշադրությունը:

Իրավիճակը սրվել է հունիսի 20-ի արտահերթ խորհրդարանական ընտրություններից առաջ:

«Տվյալ աշխատակիցը, ունենալով այլ քաղաքական հայացքներ  (պաշտպանում է ներկայիս ընդդիմության շահերը), վեճի բռնվեց աշխատակիցներից մեկի հետ, որից հետո աշխատանքի է ներկայացել մայրիկի հետ: Աշխատակազմը աշխատակցուհու մայրիկին ներկայացրել է ստեղծված իրավիճակը և խնդրել, որ փորձի խոսել դստեր հետ և հասկանալ, թե ինչն է խնդիրը:

Վերոնշյալ դեպքից մի քանի օր անց պատկերասրահի աշխատակիցը կոնֆլիկտի է բռնվում աշխատակցուհի Վարդիթեր Բաղդասարյանի հետ՝ չցանկանալով կատարել իրեն վստահված էքսկուրսավարի աշխատանքային պարտականությունները: Տվյալ իրավիճակից հետո ներկայացել է աշխատանքի մայրիկի ուղեկցությամբ, ով առանձնազրույց է ունեցել պատկերասրահի տնօրենի ժ/պ  Մ. Վարդպարոնյանի հետ։ Այնուհետև Մ. Վարդպարոնյանին հանդիպում է տվյալ աշխատակցուհու հայրը և թույլ է տալիս ոչ հարիր արտահայտություններ»,-ասված է նամակում:

Պատկերասրահի տնօրենի ԺՊ Վարդպարոնյանը փորձելով հարթել աշխատակիցների միջև եղած անախորժությունները, խորհրդակցություն է հրավիրել, որի ժամանակ բանավոր նկատողության արժանացրել բոլոր աշխատակիցներին և խստացրել աշխատանքային պայմանները: Արգելվել է աշխատավայրում ոչ աշխատանքային թեմաների շուրջ որևէ հարցի քննարկումը:

Վիճաբանությունն այնուհետ այլ ուղղությամբ է ընթացել: «Մարիամ և Երանուհի Ասլամազյան քույրերի պատկերասրահն» ունի հուշանվերների խանութ, որտեղ վաճառվում են տարբեր անձանց կողմից վաճառքի ներկայացված իրեր, այդ թվում նաև պատկերասրահի տվյալ աշխատակցուհու ներկայացրած զարդերը:

Հունիսի 23-ին վերջինս պատկերասրահի հսկիչ Մերի Կարապետյանին, ով նաև համակարգում է  հուշանվերների խանութի աշխատանքը, տեղեկացրել է, որ իր ներկայացրած զարդերից մեկը բացակայում է: Համապատասխան մատյանի նշագրումներում, սակայն, նմանատիպ զարդի մասին խոսք չկա, այսինքն, ըստ պատկերասրահի աշխատակիցների, նման զարդ երբևէ վաճառքի չի ներկայացվել:

Այս անգամ ևս տնօրենի ժպ-ն խորհրդակցություն է հրավիրում՝ խնդիրը քննարկելու, հարթելու նպատակով: Աշխատակիցը, սակայն, նյարդային պահվածք է  դրսևորում և ներկայացնում իր ձեռքով գրված աշխատանքից ազատման դիմումը:  Այնուհետ  հուշանվերների խանութից առանց որևէ մեկին զգուշացնելու վերցրել է վաճառքի համար իր ներկայացրած իրերը և հեռացել:

Հենց այդ դեպքից հետո էլ, ըստ նամակի,  պատկերասրահի տնօրեն Վարդպարոնյանը զանգ է ստացել Գյումրու համայնքապետարանից, որից հետո՝ չճշտված հանգամանքներում գրել է աշխատանքից ազատման իր դիմումը:

Այսօր հրավիրած ասուլիսում Վարդպարոնյանն ասաց դիմումը գրել է իր կամքով և քաղաքապետարան ոտք կդնի միայն  իր աշխատանքից ազատման հրամանը ստանալու համար:

«Այլ բանի համար չեմ գնա, իրենք բոլոր սահմաններն անցել են,-ասաց Միքայել Վարդպարոնյանը՝ չմանրամասնելով, թե Գյումրու քաղաքապետարանում իր հետ ինչ խոսակցություն է եղել, և ինչ պայման է առաջադրվել իրեն:

Աշխատակազմը, սակայն, պահանջեց, որ քաղաքապետարանն առանց որևէ պայմանի առաջադրմամբ թույլ տա, որ և տնօրենը շարունակի աշխատել, և աշխատակազմը: Այնպես, ինչպես աշխատում էին արդեն 2 տարի:  Այլ պահանջ չունեն:

Ի դեպ, նամակում պատկերասրահի աշխատակիցները նաև գրել են, որ ճշտել, իմացել են. որ վիճաբանություն հրահրած աշխատակցուհու հայրը Գյումրու քաղաքապետ Սամվել Բալասանյանի մանկության ընկերն է, և դստեր աշխատանքից ազատման դիմումը գրելուց հետո եղել է քաղաքապետի մոտ:

Իր դիրքորոշումն ու մեկնաբանությունը Գյումրու քաղաքապետարանը կներկայացնի երեքշաբթի միայն:

Նամակն ամբողջությամբ՝ ստորև.

Սամսոն Մատինյան