Մոսկվայում այսուհետ ռեստորաններ կայցելեն միայն պատվաստված կամ ՊՇՌ թեստ ունեցող մարդիկ. ռեստորանային բիզնեսը վտանգվա՞ծ է

Հաջորդ երկուշաբթի օրվանից միայն կորոնավիրուսի պատվաստանյութ ստացած, նախկինում վարակված ու այժմ ապաքինված կամ վարակման բացասական թեստ ունեցող մարդիկ կկարողանան այցելել ռեստորաններ և սրճարաններ Մոսկվայում: Այս մասին  որոշում է այսօր հրապարակել Մոսկվայի քաղաքապետ Սերգեյ Սոբյանինը: Տնտեսվարողներից շատերը, սոցցանցերում մեկնաբանելով այս որոշումը, նշել են, որ ավելի հեշտ էր փակել ռեստորանները, անհասկանալի է, թե ինչպես կարող են նրանք գոյատևել նման պայմաններում: Սոբյանինը, սակայն, հղում է անում համաշխարհային պրակտիկային:

«2021 թվականի հունիսի 28-ից միայն վարակումից պաշտպանություն ունեցող այցելուները կկարողանան այցելել հասարակական սննդի հաստատություններ. Նրանք, ովքեր պատվաստվել են վերջին վեց ամսվա ընթացքում կամ ովքեր ունենն Covid-19-ի  բացասական ՊՇՌ  թեստ՝ ոչ ավել, քան 3 օր առաջ անցկացված», - գրել է Սոբյանինն իր միկրոբլոգում:

Անցյալ շաբաթ ՌԴ իշխանությունները փորձնական հաստատեցին ռեստորաններում «Covid-19-ից ազատ գոտիներ» ծրագիրը, որին շուրջ 100 կազմակերպություն, ներառյալ ռեստորաններ են մասնակցել:

Նոր սահմանափակումները մտցվել են կորոնավիրուսի սահմանափակումների մասին 2020 թվականի հունիսի Սոբյանինի որոշման մեջ  փոփոխություն կատարելով:

«Իրականում, պահանջները ավելի բարդ են, քան թվում են. ռեստորանների ու սրճարանների բոլոր այցելուները պետք է ունենան պահանջների կատարումը հաստատող հատուկ QR կոդ. թղթե տեղեկանքները կամ վկայականները չեն ընդունվում: Կոդը կարելի էստանալ ՝ օգտագործելով էլեկտրոնային բժշկական քարտը, mos.ru պորտալը, «Госуслуги.Стопкоронавирус» հավելվածը, UMIAS համակարգը:

Ռեստորաններից և սրճարաններից պահանջվում է ստեղծել QR կոդերի առկայությունը ստուգելու համակարգ. հակառակ դեպքում դրանք կկարողանան աշխատել միայն առաքման ծառայությամբ»,- գրել է քաղաքապետը:

Բացի այդ, հունիսի 22-ից արգելք է դրվում ավելի քան 500 մարդու միաժամանակյա ներկայությամբ համերգների, ժամանցի և սպորտային միջոցառումների անցկացման վրա: Մինչ այժմ զանգվածային միջոցառումների քանակը սահմանափակվում էր 1000 մարդով:

Մոսկվայի համերգասրահներին կթույլատրվի գործել`անկախ հանդիսատեսի քանակից, եթե կազմակերպիչները ստեղծեն «Քովիդից ազատ» գոտի: Նոր սահմանափակումները չեն ազդի համերգների, ներկայացումների և կինոնկարների ցուցադրության վրա, սակայն իշխանությունները խորհուրդ են տալիս «դիտողների անվտանգությունն ապահովելու համար օգտագործել QR կոդեր»:

Այս ամենը Մոսկվայի իշխանությունների համար հրամայական դարձավ, քանի որ հունիսին կտրուկ աճեց  կորոնավիրուսի դեպքերը Մոսկվայում և ամբողջ Ռուսաստանում: Մայրաքաղաքում օրական հայտնաբերված Covid-19 վարակակիրների թիվը 3 հազարից հասավ 9 հազարի. անցյալ ուրբաթ գրանցվել է 9 056 նոր դեպք, 9120-ը գրանցվել է շաբաթ օրը: Սրանք ռեկորդային թվեր են Մոսկվայում՝ համաճարակի ողջ ժամանակահատվածի համար:

Երեքշաբթի Մոսկվայում օրական աճը նվազեց մինչև 6555, բայց միևնույն ժամանակ գրանցեց մահվան առավելագույն քանակը ողջ քովիդի ժամանակահատվածում՝ 86 մահ 1 օրում: Ամբողջ Ռուսաստանում, վերջին 1 օրվա ընթացքում, գրանցվել է Covid-19–ով հիվանդների 546 մահվան դեպք, որն առավելագույն ցուցանիշ է փետրվարի 11-ից մինչ օրս: «Վարակման մեկօրյա նվազումը ժամանակավոր է»,- ասել է Մոսկվայի առողջապահության վարչության պետ Ալեքսեյ Խրիպունը: Աշխատանքային շաբաթվա առաջին կեսին ցուցանիշները միշտ ավելի ցածր են, քան երկրորդում:

«Հիվանդանոցներում ավելի քան 14 հազար ծանր հիվանդ կա: Առողջապահական համակարգն աշխատում է իր հնարավորությունների լիարժեք մոբիլիզացման միջոցով», - գրել է Սոբյանինը իր բլոգում:

Իշխանությունները հունիսյան ինֆեկցիաների աճը կապում են կորոնավիրուսի «հնդկական» շտամի հետ: Նրանք խոստովանում են, որ վարակված են նաեւ մարդիկ, որոնք պատվաստվել են տարվա սկզբին: Մոսկվայում ավելի քան 2 միլիոն մարդ պատվաստվել է կորոնավիրուսի դեմ:

«Ես չեմ պատկերացնում, թե ինչպես ռեստորանները կկարողանան գոյատևել նման պայմաններում ՝ հաշվի առնելով, որ Մոսկվայում բնակվող մարդկանց միայն 14% -ն է պատվաստված: Դրանցից հիմնական մասը ռեստորան չգնացող բնակչությունն է: Ռեստորանային ցանցը չի կարողանա աշխատել այս ռեժիմով», - ասել է Մոսկվայի ռեստորանային բիզնեսի օմբուդսմեն Սերգեյ Միրոնովը Պրայմ գործակալությանը:

Նրա խոսքով ՝ Մոսկվայում շատ օտարերկրացիներ են ապրում, որոնք դեռ օրինական կերպով չեն պատվաստվել ռուսական պատվաստանյութով: Սոբյանինի հրամանից բխում է, որ QR կոդ կստանան միայն նրանք, ովքեր պատվաստվել են պատվաստանյութով, որը Ռուսաստանում (այսինքն `ռուսների համար) անցել է պետական գրանցում:

«Իմ կարծիքով, ավելի հեշտ էր ռեստորանները փակել, քան դա անել: Հարցն այն չէ, որ ռեստորանները նոր համակարգի են անցնելու, այլ հարցն այն է, որ հյուրեր չեն լինի», - ասել է նա «Ինտերֆաքսին»: Միրոնովը հավելել է, որ միայն ռեստորաններ այցելելուց օգտվելու համար մարդիկ գումարներ չեն ծախսի թեստավորման ու ժամանակ չեն ծախսի QR կոդեր ներբեռնելու համար, ռեստորանային բիզնեսի համար այս որոշումը կործանարար է:

Նախորդ շաբաթ Միրոնովը և ռեստորանային բիզնեսի այլ ներկայացուցիչներ բանակցություններ էին վարել քաղաքապետարանի հետ, որից հետո հայտարարվեց, որ հաստատություններում փորձարկվում է «Covid-19-ից ազատ» ծրագիրը: Այս հանդիպումից հետո Սոբյանինը նախազգուշացրել էր, որ քաղաքը «շատ մոտ է ավելի կոշտ որոշումներին»:

Կրեմլը սատարում է Մոսկվայի քաղաքապետի վճռական միջոցները, դրանք թելադրված են բարդ իրավիճակում: Այս մասին ՏԱՍՍ-ին ասել է նախագահի մամուլի քարտուղար Դմիտրի Պեսկովը:

Մոսկվայում կորոնավիրուսի հետ կապված իրավիճակի վատթարացման պատճառով հունիսին պարտադիր պատվաստումներ են մտցվել սպասարկման ոլորտի աշխատակիցների, պետական ապարատի և քաղաքապետարանների աշխատակիցների համար: