Ուղիղ նշանակետին խփելու համար. Արթուր Դավթյանը կփորձի երկու մեդալ նվաճել Տոկիոյում

Ապրիլի 28-ին տեղի ունեցավ սպորտային մարմնամարզության Հայաստանի հավաքականի գլխավոր մարզիչ Հակոբ Սերոբյանի և հավաքականի անդամներ, Եվրոպայի նորընծա չեմպիոն Արթուր Դավթյանի, Գագիկ Խաչիկյանի ու Արթուր Ավետիսյանի մամուլի ասուլիսը:

Հարցերին հիմնականում պատասխանում էր գլխավոր մարզիչը, և բնական է, որ գովեստի խոսքերը նրա կողմից քիչ չէին, քանի որ Հայաստանի հավաքականը Բազելում շատ լավ ելույթ ունեցավ. Դավթյանը դարձավ Եվրոպայի չեմպիոն, ևս 3 հայ մարմնամարզիկ հանդես եկավ տարբեր գործիքների եզրափակիչներում: Մարզչի ուրախությունն ավելի մեծ էր հատկապես այն պատճառով, որ Դավթյանի չեմպիոնությունը եղավ ապրիլի 24-ին, իսկ ինքը՝ մարզիկը պատվո պատվանդանին կանգնեց՝ կրշքին անմոռուկով: Ըստ Սերոբյանի՝ մարմնամարզության ֆեդերացիայից նույնիսկ սպառնացել են Դավթյանին, որ եթե հաջորդ անգամ նույն բանն անի, կարող են մեդալը նրանից վերցնել, բայց դա Հայաստանի ներկայացուցիչներին չի մտահոգում:

Առավել հետաքրքիր էին մարզչի դիտարկումներն օլիմպիական խաղերի հեռանկարների մասին: Հայ մարմնամարզիկներից օլիմպիական խաղերի ուղեգիր ունի միայն Արթուր Դավթյանը, որն իր այդ ուղեգիրը ձեռք է բերել աշխարհի առաջնության բազմամարտում ունեցած լավ ելույթների շնորհիվ: Սակայն օլիմպիական խաղերին Դավթյանին բոլոր գործիքների վրա չենք տեսնի. Սերոբյանը նշեց, որ Դավթյանը Տոկիոյում կմասնակցի միայն հենացատկ և նժույգթափեր վարժություններում:

Նման որոշումը, ինչ-որ չափով, սպասելի էր: Բազմամարտում Դավթյանի՝ մեդալ նվաճելու շանսերը նվազագույն են: Պտտաձող և զուգափայտեր վարժություններում Դավթյանը բարդ վարժություններ չի կատարում. Հայաստանում կա մարզագույքի խնդիր, որը թույլ չի տալիս այս մրցաձևերում նորմալ վարժություններ նախապատրաստել: Դա արդեն հանում է Դավթյանին բազմամարտի մեդալների հավակնորդների ցուցակից: Ազատ վարժությունն ու օղակները Դավթյանը լավ է կատարում, բայց ընտրում է համեմատաբար հեշտ՝ բազային քիչ միավորներ ունեցող վարժություններ: Բազմամարտի տեսանկյունից դրանք լավ միավորներ են ապահովում, սակայն եթե դիտարկենք առաձին գործիքների տեսանկյունից, ապա այդ վարժություններով մեդալների համար պաքարելն անհնար է: Այնպես որ, հենացակտում և նժույգթափերում հանդես գալը միանգամայն տրամաբանական որոշում է, քանի որ այդ վարժություններում Արթուրը կարող է մեդալի իրական հավակնորդ լինել:

Հենացատկում Դավթյանի երկու ցատկերն էլ բավականին բարդ են, ինչպես շեշտում է մարզիչը՝ աշխարհում ամենաբարդերից են: Բազելում Արթուրի առաջին ցատկն անհաջող էր, նա սխալվեց վայրէջք կատարելուց, իսկ երկրորդ ցատկը գրեթե իդեալական էր; Եթե չլիներ առաջին ցատկի սխալը, Դավթյանը կարող էր Եվրոպայի չեմպիոն էլ դառնալ: Մարզչի խոսքերով՝ լուրջ աշխատանք է տարվում առաջին ցատկի վրա, և այն արդեն պատրաստ է: Բացի այդ, Սերոբյանը նշեց, որ աշխատանք է տարվում լրիվ նոր ցատկի վրա, որը աշխարհում դեռ ոչ ոք չի կատարել: Սակայն համավարակի պատճառով լիարժեք չստացվեց այն պատրաստել, ինչպես ասաց մարզիչ՝ ցատկը դեռ «հում» է, և ռիսկային կլիներ փորձարկել առաջնությունում: Եթե օլիմպիական խաղերից առաջ ավելի բարդ ցատկը պատրաստ լինի, Տոկիոյում այն կտեսնենք: Հակառակ դեպքում, եթե վնասվածք ստանալու ռիսկ լինի, ցատկը չի արվի, կարվեն այն ցատկերը, որոնք արվել են Բազելում: «Այս ցատկերը ևս շատ բարդ են, ինքը կարող է դրանք ավելի որակով անել: Իսկ եթե որակով արեց, դրանք աշխարհի ամենաբարդ ցատկերից են»,- նշեց Սերոբյանը:

Ինչ վերաբերում է նժույգթափերին, ապա Դավթյանի վարժությունը՝ համեմատած եզրափակչում իր մրցակիցների, այդքան էլ բարդ չէր, բայց հայ մարզիկն այն գերազանց կատարեց, ինչը թույլ տվեց առաջ անցնել մրցակիցներից, որոնցից շատերը կոպիտ սխալներ թույլ տվեցին: Դա ասուլիսի ընթացքում շեշտեցին թե՛ Դավթյանը, թե՛ Սերոբյանը: «Արթուր արեց ավելի թեթև, տակտիկապես ճիշտ, ավելի գրագետ վարժություն: Չգնացինք ագահության, վարվեցինք գրագետ, և ինքը լավ կատարեց: Կավելացնենք»,- նշեց Սերոբյանը: 

Սակայն այդքանով մարզիչն ու մազիկը չեն ցանկանում բավարարվել: Նժույգթափերի վարժության բարդությունը Տոկիոյից առաջ կարող է ավելացվել, ընդ որում, այստեղ ևս մարզիկը նոր տարր է նախապատրաստում, որը կլինի հենց իր անունով: «Առաջիկա մրցումներում կփորձարկենք: Այդ տարրը նկարել եմ, ուղարկել եմ միջազգային ֆեդերացիա»,- ասա մարզիչը:

Արթուր Դավթյանն արդեն 29 տարեկան է, և օլիմպիական այս խաղերը կարող են վերջին հնարավորությունը լինել մեդալ նվաճելու համար: «Մենք դա հասկանում ենք; Այդ պատճառով ուղիղ նշանակետը բռնած գնալու ենք, որ կոնկրետ այդ տեղին խփենք: Բոլոր ուժերը ներդնելու ենք նժույգթափերի և հենացատկի վրա: Երկու վարժություններն էլ բարդացնելու ենք, փորձարկելու ենք, դրանից հետո կորոշենք»,- եզրափակեց Սերոբյանը:

Մարզիչը նաև անդրադարձավ երիտասարդ Խաչիկյանին ու Ավետիսյանին: Ըստ նրա՝ երկուսն էլ մեծ ապագա ունեն: Արթուր Ավետիսյանը հաջորդ օլիմպիական շրջափուլուլում մեդալների իրական հավակնորդ կլինի, Խաչիկյանի ապագա չեմպիոնության վրա մարզիչը ևս չի կասկածում: