Եթե պայմանավորվածություն չլիներ, ինքնաթիռն ինչո՞ւ պիտի գնար. Ա. Քոչարյանը՝ գերիների վերադարձի խոչընդոտների մասին

Ազգային ժողովի պաշտպանության եւ անվտանգության հարցերի հանձնաժողովի նախագահ Անդրանիկ Քոչարյանն այսօր լրագրողների հետ զրույցում ակնարկեց, որ Ադրբեջանում գերեվարված ՀՀ քաղաքացիների նոր խումբ Հայաստան տեղափոխելու պայմանավորվածություն եղել է, որը խախտվել է:

«Եթե պայմանավորվածություն չլիներ, ինքնաթիռն ինչո՞ւ պիտի գնար, ինքնաթիռը կարող է գնար, բայց Մուրադովը մեջը չլիներ: Իհարկե, խախտվել է ինչ-որ բան, այդ խախտումը այս քննարկման մեջ չեք գտնելու, այդ խախտման պատճառները արդեն կունենան այլ հարթությունում լուծումների այլ ձեւաչափ: Հանգիստ եղեք, որովհետեւ եթե պայմանավորվածություններ կան, դրանք եղել են նաեւ Ռուսաստանի Դաշնությունում»,- ասաց «Իմ քայլի» պատգամավորը:

Նա ուշադրություն հրավիրեց այն փաստի վրա, որ գերիների վերադարձի մասին հայտնի դարձավ ՀՀ վարչապետի եւ ՌԴ նախագահի հանդիպումից հետո:

«Դրանից առաջ էդպիսի խնդիր չէր երեւում: Դա քայլ էր, որտեղ հստակ երեւաց, որ Ռուսաստանը իր մասնակցությունը փորձել է ներդնել այդ խնդրի լուծմանը, դրանով էր պայմանավորված, որ պարոն գեներալ-լեյտենանտ, ՌԴ հերոս Մուրադովը գնացել էր՝ գերիներին ուղեկցելու Հայաստան»,- շեշտեց Քոչարյանը:

Լրագրողի դիտարկմանը՝ Մուրադովն անկարո՞ղ եղավ այդ խնդիրը լուծել, Պաշտպանության եւ անվտանգության հարցերի հանձնաժողովի նախագահն արձագանքեց՝ «ոչ թե անկարող եղավ, այլ ինչ-որ խոչընդոտ եղավ», որի պատճառը դեռ չի կարող հնչեցնել:

«Ինտուիցիայով հասկանում եմ՝ ինչ է կատարվել, բայց դա հնչեցնել Պաշտպանության հանձնաժողովի նախագահը չի կարող»,- շարունակեց Քոչարյանը՝ հավելելով, որ այն լուծելի խնդիր է: 

Պատգամավորը կարծում է, որ գերիների անձնական անվտանգության մասով խնդիր չկա, որովհետեւ նրանք անուն առ անուն ֆիքսված են, եւ Ադրբեջանի իշխանություններն ընդունել են նրանց առկայությունը:

«Խնդիր ունենք՝ անհետ կորածները, որոնք հնարավոր է՝ գերեվարված են, այ նրանց պետք է գտնել օր առաջ եւ լուծել այդ խնդիրները: Որպես կանոն՝ այդ դաշտում գերիները փոխանակվում են գերիների հետ»,- ասաց նա:

Լրագրողներից մեկը նկատեց, որ, ըստ արտգործնախարարի հայտարարության, մենք ադրբեջանցի գերիներ չունենք:

«Դուք ի՞նչ գիտեք՝ մենք ինչ ունենք: Ես չգիտեմ՝ մենք ինչ ունենք, եթե գերի չունենք, այստեղ պետք է այլ ձեւով լուծվի այդ հարցը»,- նկատեց Քոչարյանը՝ հավելելով, որ գուցե Ադրբեջանը սպասում է, որ Թուրքիայի իշխանություններն էլ պետք է մասնակից լինեն այդ խնդրի լուծմանը:

Հարցին՝ կհաջողվի՞ լուծել գերիների հարցը՝ Քոչարյանը պատասխանեց, որ դա չի կարող չլուծվել: 

Ինչո՞ւ աղմուկ բարձրացվեց՝ մինչ գերիների վերադարձը

Քոչարյանը վստահ է՝ գերիների վերադարձի հետ կապված արտահոսքերը կազմակերպված եւ կառավարվող են ինչ-որ տեղից:

Լրագրողը նկատեց՝ բայց վարչապետի մամուլի խոսնակը հաստատել էր գերիների վերադառնալու մասին լուրը.

«Բայց վարչապետի խոսնակը գիտեր, չէ՞, որ գերիները պիտի գան, ընդամենը հայտարարել է դրա մասին»,- պատասխանեց նա եւ շարունակեց. «Ես ձեզ ասեմ՝ օր առաջ էս արտահոսքերը կամ սպասումները, իրենք, որպես կանոն, լինում են ժամանակավրեպ, եւ դրանից շատ դեպքերում օգտվում են հակառակորդ կողմի որոշում կայացնողները, եւ էսպես, տեսեք, երկրորդ օրն է՝ մենք հայտնվել ենք լուրջ ցնցումների փուլում: Օդակայանում սպասող հարազատները ճանապարհ են այսօր փակում, գնացել են ՊՆ, ըստ էության՝ ՊՆ մուտքերը փակելով՝ մենք խոչընդոտում ենք մեր ամենակարեւոր՝ մեր անվտանգությունը ապահովող գերատեսչության աշխատանքային ռիթմը, իսկ նա ամեն օր այն ռիթմով պետք է աշխատի, որ մեր կորցրած կարողությունները կարողանանք օր առաջ վերականգնել: Դուք գիտեք, որ գնում է զորակոչ, անվտանգության հետ կապված բազմաթիվ հարցեր կան...»:

Դիտարկմանը, որ գերիների հարազատներին իրենց երեխաներն են հետաքրքրում՝ Քոչարյանը պատասխանեց.

«Այդ երեխաները կամ ոչ երեխաները, ՀՀ քաղաքացիները, մեր համար պետք է դիտվեն կարեւորագույն արժեք, որի հետեւից մենք գնանք եւ լուծենք էդ խնդիրը: 

Բայց այնպես չէ, որ լուծումների ցանկությունը բերելու է մեզ անմիջական արդյունքների: Որովհետեւ երբ որ տեսնում եք՝ ինչ հետեւանք կարող է առաջանալ երկրի ներսում, երբ որ ինչ-որ տեղ քաղաքական նրբերանգների մեջ է հայտնվում, օրինակ, բնականաբար, գայթակղությունը մեծ է լինում... էդպիսի գործընթացների վրա ներազդելու լավ համակարգ է հայտնվել Թուրքիայի եւ Ադրբեջանի ձեռքին»:

Հիշեցնենք, որ երեկ երեկոյան  լուրեր տարածվեցին, որ գերիների նոր խումբ է վերադառնում Հայաստան։ Ադրբեջանում պահվող անձանց ծնողներն ու հարազատները հավաքվեցին «Էրեբունի» օդանավակայանում, սակայն ավելի ուշ փոխվարչապետ Ավինյանի գրասենյակը հայտարարեց, որ գերիների վերադարձ չի հաջողվել կազմակերպել։