Կապառոսի՝ հավաքականը գլխավորելուց հետո հավաքականի հաջող խաղը համակարգային բնույթ է կրում. զրույց՝ Լևոն Պաչաջյանի հետ

Ֆուտբոլի Հայաստանի հավաքականի նախկին կիսապաշտպան Լևոն Պաչաջյանը վերջին տարիներին բնակվում և հանդես է գալիս Շվեդիայում: Ֆուտբոլիստն իր թիմին՝ «Լինկոպինգի» կազմում պատրաստվում էր Շվեդիայի առաջին դիվիզիոնի հերթական մրցաշրջանին, սակայն շաբաթներ առաջ հայտարարեց, որ պայմանագիրն ակումբի հետ խզվել է:

«Հայկական ժամանակի» հետ զրույցում Պաչաջյանը նշեց, որ ակումբից հեռանալը մի փոքր անսպասելիորեն եղավ:

«Թիմում անորոշ իրավիճակ էր, խնդիրներ կային նաև կորոնավիրուսով պայմանավորված լոքդաունից հետո: Իմ պարագայում, կարծես, ամեն ինչ նորմալ էր, բայց հստակություն չկար: Ես Հայաստանում էի, երբ վերադարձա, մի քանի մարզումից հետո ինձ ասացին, որ ֆինանսական խնդիրները չեն լուծվում, և ակումբը, փաստացի, հրաժարվեց պայմանագրից: Հույս ունեի, որ մինչև տրանսֆերային պատուհանի փակվելն ակումբը խնդրի լուծումը կգտնվի, բայց, ցավոք, չեղավ, և ես մնացի առանց ակումբ»,- նշեց Պաչաջյանը:

37-ամյա ֆուտբոլիստը, սակայն, մտադիր է նոր թիմ գտնել: Խնդիրն այն է, որ տրանսֆերային պատուհանն այժմ փակ է. «Հստակ առաջարկ այս պահին դեռ չունեմ, կան ուղղակի որոշակի խոսակցություններ: Ամենայն հավանականությամբ, նոր ակումբ կկարողանամ գտնել ամռանը, եթե ինչ-որ արագ տարբերակ չհայտնվի»:

«Լինկոպինգում» հանդես գալու տարիներին Պաչաջյանը նաև հասցնում էր զբաղվել մարզչական գործունեությամբ՝ աշխատելով երեխաների հետ: Ֆուտբոլիստի խոսքերով՝ նա դիտարկում է նաև մարզչական աշխատանքը, սակայն սկզբում պետք է կարողանա լուծել մարզչական արտոնագրի հարցերը:

Ամեն դեպքում, Պաչաջյանը շարունակում է ֆուտբոլային գործունեությունը: Մարտին Հայաստանի ֆուտբոլի ֆեդերացիան հայտարարեց, որ նա նշանակվել է Եվրոպայում ՀՖՖ դեսպան: Ֆուտբոլիստը նշում է, որ աշխատանքը շատ պատասխանատու է: «Շատ ոգևորությամբ եմ ստանձնել այդ դերը, հուսով եմ՝ շուտով կկարողանամ հավաքականի համար նոր կադրեր գտնել: Կան տաղանդավոր հայ ֆուտբոլիստներ: Ֆեդերացիայի հետ միշտ կապի մեջ ենք: Այս պահին արդեն մի քանի երիտասարդների տվյալներ ունենք, ուսումնասիրում ենք, թե ինչ առանձնահատկություններ ունեն: Շատ հնարավոր է՝ մոտ ապագայում նոր անուններ տեսնենք տարբեր տարիքային հավաքականներում: Հետաքրքիր աշխատանք է, պետք է կարողանալ ճիշտ մոտեցումներով նաև համոզել երեխաներին, որովհետև, եթե ֆուտբոլիստը տաղանդավոր է, մյուս երկրների հավաքականներն էլ են ուզում նրանց ներառել իրենց երկրի թիմերում: Պետք է նրանց համոզել, որ Հայաստանի հավաքականից հանդես գալը նրանց համար ավելի հեռանկարային է»,- ասաց ՀՖՖ դեսպանը:

Խոսելով գործունեության շրջանակից՝ Պաչաջյանը նշեց, որ կլինի այնտեղ, որտեղ կկարողանա գործունեություն ծավալել, այդ թվում՝ Ռուսաստանում. «Եթե ՀՖՖ-ից պահանջ լինի՝ տեսնել Ռուսատանում հանդես եկող ինչ-որ ֆուտբոլիստի, խնդիր չկա: Հարցը ֆիզիկական հնարավորությունների մասին է: Պետք է կարողանան հասցնել բոլոր տեղերում ճիշտ աշխատանք տանել: Եթե Ռուսաստանում երիտասարդի հետ հանդիպելու կարիք լինի, կարծում եմ՝ խնդիր չի լինի»:

Պաչաջյանը, բնականաբար, հետևել է նաև Հայաստանի հավաքականի վերջին երեք հանդիպումներին: Խոսելով հավաքականի ցուցադրած արդյունքի մասին՝ ֆուտբոլիստը նշում է, որ կարևոր է ոչ այնքան արդյունքը, որքան այն, որ այդ հաղթանակները պատահական բնույթ չեն կրում. «Ինձ համար կարևոր էր տեսնել, որ հավաքականը խաղային առումով աճ է գրանցել: Կարելի է տեսնել, որ Խոակին Կապառոսի՝ հավաքականը գլխավորելուց հետո հավաքականի հաջող խաղը համակարգային բնույթ է կրում: Երևում է, թե ինչպիսի աշխատանք է նա այս մեկ տարվա ընթացքում կատարել իր օգնականների և ֆեդերացիայի հետ միասին: Ես նույնը կասեի, եթե հավաքականը չհաղթեր նույնիսկ վերջին երկու խաղում: Չի կարելի չնկատել, որ այսօրվա աշխատանքը հիմք է հանդիսանում ապագայի լավ արդյունքների համար: Եղել են ժամանականեր, երբ հավաքականը հաղթանակներ է տարել, մեկ խաղ, երկու խաղ, բայց դա, կարծում եմ, համակարգային չի եղել: Այս հավաքականի ամենամեծ առավելությունը հենց համակարգային լինելն է, ֆեդերացիայի և Կապառոսի լուրջ մասնագիտական մոտեցումն է: Հուսով եմ՝ սպասումները, իրոք, կարդարանան, և հավաքականը կկարողանա խոշոր մրցաշարի մասնակցել»:

Հավաքականի հաղթանակը կարևոր էր նաև հոգեբանական տեսանկյունից: «Ուրախալի է, որ հավաքականը երեք անգամ անընդմեջ բավականին բարդ մրցակիցների հաղթեց: Ժողովրդի ուրախությունը շատ ոգևորիչ էր: Նման իրավիճակում այդ հաղթանակները լրացուցիչ էներգիա հաղորդեցին հասարակությանը»,- եզրափակեց Պաչաջյանը: