Պահանջում եմ՝ հենց հիմա քրեական հետապնդումը դադարեցրեք. քննվում է պաշտպանների եւ դատախազների միջնորդությունը

Ինչպես արդեն հայտնել ենք, Ռոբերտ Քոչարյանի և մյուսների գործով դատական նիստն անորոշ ժամանակով ընդմիջվել էր: Ընդմիջման ընթացքում Յուրի Խաչատուրովը, նրա պաշտպան Միհրան Պողոսյանը, Սեյրան Օհանյանը և նրա պաշտպան Կարեն Մեժլումյանը լքել են դատական նիստերի դահլիճը:

Մեղադրող դատախազ Գևորգ Բաղդասարյանը հայտարարեց, որ ամբաստանյալներից երկուսի և նրանց պաշտպանների բացակայության պայմաններում դատարանը չի կարող քննարկել ՍԴ համապատասխան որոշման հիման վրա համապատասխան որոշում կայացնելու հարցը:

Ռոբերտ Քոչարյանի պաշտպան Հայկ Ալումյանն էլ խնդրեց նիստը զավեշտի չվերածել. «Ի՞նչ ամբաստանյալ, ո՞ր հոդվածով: Երբ ասում են ամբաստանյալ, նկատի ունեն Քրեական օրենսգրքի որևէ հոդված, իսկ հիմա ի՞նչ ամբաստանյալի մասին է խոսքը, եթե խոսում են Սեյրան Օհանյանի և Յուրի Խաչատուրովի մասին: Ի՞նչ պաշտպանների մասին եք խոսում, ինչից են պաշտպանում նրանք, եթե չկա հոդվածը, մեղադրանքը, ուր ենք եկել մենք: Իմ պաշտպանյալը հիմա մի հոդվածով է հետապնդվում, որը գոյություն չունի, պատկերացնո՞ւմ եք: Օրենքն ասում է՝ մենք միջնորդություն պետք է ներկայացնե՞նք, որ դադարեցնեք հետապնդումը: Օրենքն ասում է՝ պետք է քրեական հետապնդումը դադարեցնել ու վերջ: Էս ինչ ա դառել էս ամեն ինչը, էս ինչ հրաշք ա տեղի ունեցել: Պահանջում եմ՝ հենց հիմա քրեական հետապնդումը դադարեցրեք»:

Քոչարյանի պաշտպաններից Արամ Վարդևանյանն էլ նշեց, որ իրենք այստեղ են, քանի որ Ռոբերտ Քոչարյանի և Արմեն Գևորգյանի մասով զուգահեռաբար կա այլ մեղադրանք. «Մյուս մեղադրանքն էլ չկա: Հակառակ դեպքում մենք էլ այստեղ չէինք լինի, ինչի համար լինեինք, գոյություն չունեցող հոդվածի՞»:

Ամբաստանյալ Արմեն Գևորգյանի պաշտպան Էրիկ Ալեքսանյանն էլ ասաց, որ դատավորը պարտավոր է առանց պաշտպանական կողմի միջնորդության արդարացնող հիմքի առկայությամբ որոշում կայացնել քրեական հետապնդումը վերացնելու և քրեական գործով վարույթը կարճելու վերաբերյալ. «Այդ նույն դասագրքային ճշմարտությունը դուք էլ եք ուսումնասիրել: Սա ես չեմ հորինում: Ինչպես է ստացվում, որ դա մենք հիշում ենք, իսկ դուք՝ ոչ»:

Ռոբերտ Քոչարյանի պաշտպաններից Արամ Օրբելյանն էլ հայտնեց, որ, իր կարծիքով, նիստը պետք է շարունակվի. «Քանի որ գործին առնչվող բոլոր անձինք ներկա են այս պահի դրությամբ: Գործով առկա երկու ամբաստանյալները և նրանց պաշտպանները և մեղադրող կողմն առկա է»:

Դատախազ Գևորգ Բաղդասարյանն էլ նկատեց, որ պաշտպանների ոգևորված՝ «էս ինչ եք անում», «էս ինչ եք ստեղծում» արտահայտությունները կապ չունեն քրեական դատավարության հետ և պնդեց, որ ամբաստանյալներ Սեյրան Օհանյանի և Յուրի Խաչատուրովի և նրանց պաշտպանների բացակայությունն անհարգելի է: Դատախազ Պետրոս Պետրոսյանն էլ ասաց, որ պաշտպաններն իրենց գործողություններով զրկում են մեղադրական կողմին իրենց տեսակետներն արտահայտելու հնարավորությունից. «Զրկում են հնչեցնելու ՍԴ դիմելու հիմքերի հիմնավորումների վերաբերյալ իրենց տեսակետը, իրենք փորձում են դատարանին հորդորել հեռանալ խորհրդակցական սենյակ և կայացնել համապատասխան որոշում: Բացակայող ամբաստանյալներն իրենք իրենց զրկել են իրենց դիրքորոշումն արտահայտելուց: Եթե դատարանը կգտնի, որ նրանց վարքագիծն իրենց իրավունքներին իրացնելուց հրաժարվելու հանգամանք է, մենք պատրաստ ենք դատարանին հնարավորություն ընձեռելու՝ այս դատական նիստին վերջնական որոշում կայացնելու»:

Աննա Դանիբեկյանն էլ դատախազներին հիշեցրեց, որ Օհանյանի պաշտպան Կարեն Մեժլումյանը վաղը լքելու է երկիրը և հարց ուղղեց՝ ինչպե՞ս են այդ դեպքում նրանք պատկերացնում հարցի քննարկումը:

Ինչին ի պատասխան՝ դատախազները հիշեցրին, որ Սեյրան Օհանյանն այլ պաշտպաններ էլ ունի. «Կարեն Մեժլումյանը դիպլոմատն առավ ու գնաց, ես հիմա պետք է մտածեմ՝ Կարեն Մեժլումյանը երբ է լքո՞ւմ ՀՀ սահմանը: Մեժլումյանի՝ ՀՀ-ից հեռանալը չի կարող խանգարել նրան, որ դատարանում կայացվող որոշումները կայացվեն էնպես, ինչպես գրված է Քրեական դատավարության օրենսգրքում»,- արձագանքեց դատախազ Գեւորգ Բաղդասարյանը:

Դատախազ Բաղդասարյանը նաև նշեց, որ և՛ մեղադրողների, և՛ պաշտպանական կողմի միջնորդությունները պետք է քննարկվեն միասին:

Ռոբերտ Քոչարյանի պաշտպանները, սակայն հակադարձեցին՝ նշելով, որ դրանք ունեն տարբեր դատավարական առարկաներ և չեն կարող քննարկվել միաժամանակ: Ալումյանն էլ հավելեց, որ քրեական հետապնդումը դադարեցնելու միջնորդությունը ենթակա է լուծման, իսկ դատախազների ներկայացրած միջնորդությունը՝ քննարկման:

Բուռն քննարկումներից հետո դատարանը, այնուամենայնիվ, որոշեց ՍԴ որոշման հետ կապված միջնորդությունները քննարկել դատական այսօրվա նիստում: