Կուսակցությունների մասին օրենքի նախագիծը կապ չունի քաղաքական համակարգի կայունացման հետ․ Մարուքյան

Կուսակցությունների մասին օրեքի նախագծի քննարկման ընթացքում «Լուսավոր Հայաստան» խմբակցության ղեկավար Էդմոն Մարուքյանն ասաց,  որ նախագիծը կապ չունի քաղաքական համակարգի կայունացման հետ։ «Մենք մի հատ ամբողջ իրավիճակից մի հատ ֆրագմենտ ենք գտել, ուզում ենք այդ մասում մի երկու դրույթ փոխել, ընդ որում, այս օրենքը նոր օրենք է եղել, մենք որ ընդունել ենք նախորդ խորհրդարանում, նոր ընդունված օրենք է եղել, և շատ առաջադեմ օրենք է, բացի ֆինանսական մասով, որ պետությունը փող պետք է տա պառլամենատական ուժերին, այդ մասը վերանայելը շատ ողջունելի է։ Բայց մենք մտածում ենք, որ հեսա այս օրենքը ուղղենք, և ես նայում եմ նաև հռետորաբանությունը դրսում։ Այո, մինչև ընտրությունները փոխեք կուսակցությունների մասին օրենքը, և արդար ընտրություններ կլինեն։ Միամիտ եք, ժողովուրդ»։

Մարուքյանը առաջարկեց ուշադրություն դարձնել, թե ինչպես է Հայաստանում աշխատում մամուլը, մեդիան։ «Հեռուստաընկերությունները, որոնք սպառում են հանրային մուլտիպլեքսը, որոնք որոշում են՝ բլոկ անել այս ինչ մարդուն, ցույց մի տվեք այս մարդուն, վերջ։ Կուսակցության մասին օրենքը ինչ պետք է անեք, քաղաքական համակարգը ինչպե՞ս եք առողջացնելու։ Փողով ի՞նչ է պետք, փող ծախսենք՝ այս մեկին դարձնենք հերոս, փող ծախսենք՝ այս մեկին դարձնենք դավաճան, կուսակցությունների մասին օրենքով դրա դեմը ո՞նց եք առնելու, մի բան գրե՞լ եք դրա մասին։ Օրինակ՝ գրե՞լ եք, որ պառլամենտական ուժին հանրային մուլտիպլեքս սպառող հեռուստաընկերությունը չի կարող չլուսաբանել։ Չեք գրել, չէ՞։ Առաջարկում եմ՝ գրեք»։

Պատգամավորի խոսքով՝ Հայաստանում քաղաքական համակարգը հիվանդ է։ «Հեղափոխությունից հետո հույս ծնվեց, որ քաղաքական համակարգը հեսա կառողջանա, ինչպես բոլոր ոլորտներում փոփոխությունները, այնպես էլ այստեղ մնաց կիսատ-պռատ, և մենք ունենք հիվանդ քաղաքական համակարգ, և այս հիվանդ քաղաքական համակարգով հեսա գնում ենք արտահերթ ընտրությունների, ու մեզ թվում է՝ պառլամենտում էս օրենքը, որ փոխենք, հեսա արդար ընտրություններ են լինելու։ Մենք հենց գիտենք, թե այս օրենքն է կուսակցությունները առողջացնելու, մինչդեռ ով մի տեղից մի միլիոն դոլար է գտել, մի կուսակցություն է բացում։ Ասում է՝ լավ գործ է, պառլամենտական երկիր է, կուսակցություն ես բացում, ոչ մեկը չունի մի 50-60 տոկոս ռեյտինգ, 10 տոկոս փող կծախսես, ձայն կտանես, կգաս իշխանության փայատեր կդառնաս, էլի։ Սա են այսօրվա քաղաքական համակարգի մտորումները, այն, ինչ տեղի է ունենում քաղաքական համակարգում»։

Մարուքյանի պնդմամբ՝ օրենքի նախագծով իր թվարկած խնդիրները չեն լուծվելու։

«Իմ քայլը» խմբակցության ղեկավար Լիլիթ Մակունցն էլ իր ելույթի սկզբում անդրադարձավ Էդմոն Մարուքյանի դիտարկումներին։ «Հիրավի, շատ կարևոր հարցեր եք բարձրացնում, որոնք, սակայն, ոչ թե կուսակցությունների մասին օրենքի փոփոխությունների դաշտից են, այլ ընտրական օրենսգրքի փոփոխությունների դաշտից, որը առաջիկայում մենք նույնպես կքննարկենք, և ինչպես կուսակցությունների մասին օրենքի քննարկումներին են մասնակցել ձեր խմբակցության ներկայացուցիչները, այդպես էլ կմասնակցեն ընտրական օրենսգրքի, և վստահ եմ, որ առաջիկայում անդրադառնալու ենք նաև ձեր կողմից բարձրաձայնված հարցերին»։

Մակունցի խոսքով՝ քննարկվող նախագծերի փաթեթը անկյունաքարային է առողջ և ժողովրդավարական քաղաքական միջավայրի ձևավորման ու զարգացման համար։ «Տարիներ ի վեր մեր երկրում քաղաքական կուսակցական համակարգը բնութագրվել է որպես անձակենտրոն, ապագաղափարական, ներքին ժողովրդավարության ակնհայտ պակաս ունեցող կուսակցությունների առատությամբ, որոնց գործունեության հիմքում հաճախ գերակշռել են առանձին անհատների շահերը, և այդ շահերը սպասարկելու համար ներդրված կարողությունները։ Գաղափարական հենք ունեցող կուսակցությունների ձևավորման ու կայացմանը նպաստելը, բազմակուսակցական համակարգի խթանումը, կուսակցությունների ֆինասավորման թափանցիկության ու հաշվետվողականության արդյունավետ մեխանիզմների ապահովելը եղել է մեր քաղաքական ուժի կարևոր նպատակներից մեկն ի սկզբանե։ Ուստի այսօրվա փաթեթը, որը մշակվել է քաղաքական այլ ուժերի հետ ամենալայն քննարկումների ու համաձայնեցումների արդյունքում՝ ներգրավելով նաև քաղաքացիական հասարակության ներկայացուցիչներին, փաստացի մեր այդ հանձնառության իրագործումն է»։

Հիշեցնենք, որ Կուսակցությունների մասին օրենքի նախագիծը շրջանառության մեջ էր դրվել դեռ սեպտեմբեր ամսին, բայց պատերազմի պատճառով չէր քննարկվել։ Օրենքի նախագծով առաջարկվում է մի շարք առանցքային փոփոխություններ իրականացնել, ինչպես, օրինակ, կուսակցությունների ֆինանսավորման մեխանիզմի վերանայում, կուսակցությունները բիզնեսից անկախ և ավելի թափանցիկ դարձնելը, կուսակությունների ներսում ներքին ժողովրդավարության հաստատումը, երիտասարդների, կանանց ներգրավվածության ավելացումը։