Ա. Վարդանյանը չի իմացել, որ խմելու համար անպիտան սպիրտ է վաճառում. ըստ պաշտպանի՝ նա զբաղվել է ալկոգելի արտադրությամբ

Արմավիրի մարզի բնակիչների թունավորման գործով կեղծ օղի պատրաստելու մեջ մեղադրվող Աշոտ Հովսեփյանը սպիրտը ձեռք է բերել նույն մարզի բնակիչ Արշակ Արշակյանից, վերջինս էլ իր հերթին այն գնել է Արարատի մարզի բնակիչ Ավետիք Վարդանյանից: Թե ումից է Վարդանյանը սպիրտը գնած եղել, նախաքննական մարմնին դեռեւս չի հայտնել, բայց պաշտպանի խոսքով՝ պատրաստակամ է հայտնել:

Հիշեցնենք՝ օգոստոսի 31-ից սկսած Արմավիրի մարզում զանգվածային թունավորման դեպքեր գրանցվեցին: Քննչական կոմիտեի պաշտոնական տվյալներով՝ մարզի բոլոր բնակիչները թունավորվել են իրենց համաքաղաքացի Աշոտ Հովսեփյանից գնած օղուց, որի մեջ փորձաքննությամբ հաստատվել է մեթիլ սպիրտի՝ թույլատրելի չափաբաժինը բազմակի անգամ գերազանցող առկայություն: Հարուցված քրեական գործի շրջանակում  Հովսեփյանից բացի մեղադրանք է առաջադրվել նաեւԱրշակյանին ու Վարդանյանին. նրանք մեղադրվում են ՀՀ ՔՕ-ի 38-207-րդ հոդվածի 2-րդ մասով՝ կեղծ օղի պատրաստելուն օժանդակելու համար: Քրեական գործով երեք մեղադրյալներն էլ կալանավորված են, պահվում են «Արմավիր» ՔԿՀ-ում:

Արշակ Արշակյանի պաշտպան Արթուր Պողոսյանը երեկ մեր զրույցում տեղեկացրեց, որ իր պաշտպանյալը առաջադրված մեղադրանքը չի ընդունում եւ դրա վերաբերյալ տվել է մանրամասն ցուցմունք՝ նպատակ ունենալով ամբողջությամբ համագործակցել վարույթն իրականացնող մարմնի հետ. «Նա պարզապես միջնորդ է եղել, վերավաճառող, սպիրտը գնել է այլ անձից (Ավետիք Վարդանյանից,-խմբ.), Աշոտն էլ՝ իրենից, Աշոտը սպիրտի որակը ստուգել է, ամեն ինչ նորմալ է եղել, ցանկություն է հայտնել ձեռք բերելու, իմ պաշտպանյալն էլ մատակարարել է»: Պողոսյանի խոսքով՝ Արշակյանը մշտապես չի զբաղվել սպիրտի վերավաճառքով, այլ միայն՝ վերջին մի քանի ամիսների ընթացքում: Առաջին անգա՞մ է արդյոք, որ Հովսեփյանը նրանից սպիրտ է գնել՝ պաշտպանը չցանկացավ նշել. «Իմ պաշտպանյալին ասել են՝ դա մաքուր սպիրտ է, ինքն էլ չհասկանալով՝ դիմել է Աշոտ Հովսեփյանին, քանի որ նա է մասնագետ եղել, ասել է՝ մաքուր սպիրտ է, խնդիր չկա»,- ասաց նա:

Արշակ Արշակյանն առերեսվել է իրենից օղի գնած Աշոտ Հովսեփյանի հետ, սակայն պաշտպանը չցանկացավ մանրամասնել, թե կոնկրետ ինչ հակասություններ են եղել նրանց ցուցմունքներում՝ պարզաբանելով, որ դա նախաքննական գաղտնիք է:

Պողոսյանի խոսքով՝ իր պաշտպանյալը նշել է բոլոր այն մարդկանց անունները, ովքեր իրենից սպիրտ են գնել. ըստ պաշտպանի՝ Ավետիք Վարդանյանի անունը, ումից ինքը սպիրտը ձեռք է բերել, դարձյալ իր պաշտպանյալն է քննիչին հայտնել:

Արթուր Պողոսյանը պատրաստվում է բողոքարկել Արշակյանի կալանավորման որոշումը:

Մյուս մեղադրյալ Ավետիք Վարդանյանի պաշտպան Վարդգես Գեւորգյանը մեր զրույցում նշեց, որ իր պաշտպանյալը եվս մեղադրանքը չի ընդունում, ինչի մասին հայտնել է իր ցուցմունքով. ըստ պաշտպանի՝ նա զբաղվել է ալկոգելերի արտադրությամբ, բայց խմիչքի օգտագործման համար սպիրտի վաճառքով երբեք չի զբաղվել:

Ավետիք Վարդանյանն էլ իր հերթին է նշել, որ ինքը սպիրտը ձեռք է բերել մեկ այլ անձից եւ այն վերավաճառել է. «Նա որ սպիրտը վաճառել է, չի իմացել, որ մեթիլ սպիրտ է, այսինքն՝ խմելու պիտանի չէ, եւ երկրորդ, չի իմացել, որ նա, ում վաճառում է, այն գնում է օղի պատրաստելու նպատակով»,- ասաց Գեւորգյանը. «Նա ապրում է բազմանդամ ընտանիքում, մանկահասակ երեք երեխա կա, այսօրվա ծանր պայմաններում վերավաճառել է՝ փոքր շահույթ ստանալու նպատակով, առանձնապես մեծ շահույթ էլ չկա, մշտապես չի զբաղվել սպիրտի վաճառքով, այս անգամ պահի տակ ստացվել է, վերցրել է, վերավաճառել»,- նշեց պաշտպանը:

Մեր հարցին՝ Վարդանյանը հայտնե՞լ է, թե ինքն ումից է սպիրտը ձեռք բերել, պաշտպանը պատասխանեց. «Ինքը պատրաստակամություն է հայտնել ասելու, թե ումից է ձեռք բերել, բայց նախաքննական մարմինը, որքանով ես տեղյակ եմ, արդեն պարզել է դա. սա այն դեպքն է, երբ բոլոր կողմերը շահագրգռված են իրականությունը պարզելու, սա լուրջ դեպք է, իր խղճի վրա էլ չի նստել, դրա համար ինքը պատրաստ է քննությանը օգնելու»: Հարցին՝ այդ դեպքում ինչո՞ւ մինչ օրս չի հայտնել այդ անձի անունը, Գեւորգյանը պատասխանեց, որ սկզբնական շրջանում իր պաշտպանյալը շոկի մեջ է եղել. «Նա շոկի մեջ էր, չէր կողմնորոշվում, հետո բնականաբար գիտակցելով հետեւանքները՝ պատրաստակամություն հայտնեց օժանդակելու քննությանը, որովհետեւ դրանով ինքը կհիմնավորի նաեւ իր անմեղությունը»:

Վարդգես Գեւորգյանի խոսքով՝ իր պաշտպանյալը Աշոտ Հովսեփյանին չի ճանաչել, միայն՝ Արշակ Արշակյանին եւ սպիրտն էլ վաճառել է միայն նրան:

Նախաքննության ընթացքում Արշակյանի ու Վարդանյանի միջեւ եւս առերեսում է եղել, որի ժամանակ, ըստ պաշտպանի, Վարդանյանը պնդել է իր ցուցմունքն այն մասին, որ ինքը սպիրտը վաճառել է՝ չիմանալով, որ այն խմելու համար պիտանի չէ. «Ես համոզված եմ, որ Արշակյանն էլ չի իմացել, որ թունավոր է եղել, ոչ մի գիտակից անձ նման բան չի անի, թույնը չի վաճառի թունավորելու նպատակով, հակասությունը եղել է քանակի, բանի հետ կապված, լուրջ հակասություններ չեն եղել»:

Պաշտպան Վարդգես Գեւորգյանը պատրաստվում է բողոքարկել նրան կալանավորելու որոշումը. «Բողոքարկելու եմ, որովհետեւ անզգույշ հանցագործություն է, առավել եվս՝ օժանդակություն, ես գտնում եմ, որ այստեղ օժանդակություն չկա էլ, թող քննությունը պարզի, բայց խափանման միջոց կալանավորում ընտրելու հիմքեր չկան, թեկուզ դատարանը պատճառաբանել է, որ կխոչընդոտի քննությանը՝ վկաների եւ տուժողների վրա ազդեցություն գործադրելով, բայց նման հանգամանք չկա, նա շահագրգռված է իրականությունը բացահայտելով, որովհետեւ դրանով կհիմնավորի նաեւ իր անմեղությունը»,- ասաց Գեւորգյանը:

Գործով մյուս մեղադրյալ Աշոտ Հովսեփյանի պաշտպան Գոռ Գեւորգյանն էլ երեկ մեր զրույցում տեղեկացրեց, որ ինքն արդեն բողոքարկել է Հովսեփյանի կալանավորման որոշումը:

Քննչական կոմիտեի տեղեկատվության եւ հասարակայնության հետ կապերի բաժնի պետի պաշտոնակատար Ռիմա Եգանյանը մեր հարցին ի պատասխան երեկ տեղեկացրեց, որ քրեական գործով տուժող է ճանաչվել 27 անձ, որոնցից 10-ը մահացել է: Մեր մյուս հարցին՝ պարզվե՞լ է արդյոք սկզբնակետը, որից Ավետիք Վարդանյանը ձեռք է բերել սպիրտը, ՔԿ-ից չպատասխանեց՝ նախաքննության շահերից ելնելով:

Հավելենք, որ Արմավիրի մարզի ալկոհոլային թունավորումից վերջին մեկ օրվա ընթացքում արձանագրվել է մահվան եվս մեկ դեպք. այդպիսով, թունավորումից մահվան դեպքերի թիվը հասել է 18-ի: Թունավորման նոր դեպքեր ՀՀ-ում չկան, սեպտեմբերի 9-ի դրությամբ արձանագրված է տեխնիկական մեթիլ սպիրտի թունավորման 46 դեպք. դրանցից 29-ը՝ Արմավիրի մարզում, 15-ը՝ Երեւանում, 2-ը՝ Կոտայքի մարզում: