Ես չեմ կարող Ռուսաստանի կանոններում փոփոխություն մտցնել․ նախարարը՝ Ռուսաստան մեկնել ցանկացող քաղաքացիներին

Ռուսաստան մեկնելու պահանջով Կառավարության առջեւ հավաքաված քաղաքացիներն այսօր քայլերթով շարժվեցին դեպի արտաքին գործերի նախարարություն, որտեղ նրանց հանդիպեց նախարար Զոհրաբ Մնացականյանը:

«Եթե դուք Ռուսաստանում քաղաքացի բարեկամ ունեք, որը, ըստ Ռուսաստանի կանոնների, (եւ Հայաստանը չի կարգավորում Ռուսաստանի կանոնները, ինչպես Ռուսաստանը չի կարգավորում Հայաստանի կանոնները) մեջ ձեր բարեկամի կարգավիճակը մտնում է, դուք հենց հիմա կարող եք գնալ Ռուսաստան։ Հիմա մեզնից ի՞նչ եք ուզում»,- դիմելով ցուցարարներին՝ ասաց նախարարը։

Մնացականյանը հորդորեց ճիշտ հասկանալ հարցի էությունը։ Նա պարզաբանեց, որ դա Ռուսաստանի սահմանած կանոններն են, եւ այստեղ իրենք ոչինչ չեն կարող անել։ Ցուցարարները պահանջեցին ուղարկել իրենց դեպի Ռուսաստան, ինչից հետո Մնացականյանը ասաց՝ գնացեք։ Նա հավելեց, որ Ռուսաստանը չի թույլատրում մուտքը, իրենք ինչպե՞ս ուղարկեն։

Նա ասաց, որ բանակցելու մասին պահանջն արդեն այլ տիրույթում է եւ կարող է դիտարկվել։ «Այդ մարդիկ ունեն իրենց կանոնները։ Եթե դուք սպասում եք, որ այդ երկիրը բացառություն է անելու, չի անելու, ինչպես եւ մենք ենք շատ զգայուն, որ այս կանոնները պահպանվեն եւ որպեսզի կանխենք համավարակը»,- ասաց նախարարը։

Ցուցարարները գրեթե միաձայն պնդեցին, որ կհանձնեն եռակի թեստ, միայն թե գնան Ռուսաստան՝ տեսնելու իրենց հարազատներին։

«Ես ուղղակի չեմ կարող ձեզ խոստանալ կամ կոնկրետ ասել, թե որ պահից այդ երկրում կանոնները կփոխվեն, որովհետեւ դա մեր գործը չէ»,- հայտարարեց նախարարը՝ մեջբերելով ցուցարարների այն խոսքը, որ՝ թողեք մենք գնանք։ «Ո՞վ է ձեզ պահել»,- հարցրեց Մնացականյանը, ինչից հետո ցուցարարներից մեկը պատասխանեց՝ դուք։ «Զանգեք, ասեք, որ, ռուս ջան, թողեք հայերը գան»,- հավելեց ցուցարարը, ինչից հետո էլ Մնացականյանը շեշտեց, որ այստեղ խոհանոցային հարաբերություններ չեն կարող լինել։ «Ես քեզ խնդրում եմ, հոգուդ մատաղ, արի ողջամիտ մտածենք։ Դու ասում ես՝ թողեք գնանք։ Այդ երկիրն ունի կանոն, այդ կանոնը խախտե՞նք, բա ի՞նչ անենք»,- ասաց նախարարը։

Մնացականյանը պարզաբանեց, որ սա բազմաթիվ խողովակներով ընթացող գործընթաց է, եւ այս խոսակցությունն ընթանում է, թե ինչպես երկրներն իրար օգնեն եւ կարգավորեն խնդիրները։ «Բազմաթիվ օրինակներ կան, բազմաթիվ իրավիճակներ են եղել, երբ ՌԴ քաղաքացի հանդիսացողները ասել են՝ ուզում ենք գնալ, Վրաստանն ասում է՝ չենք թողնելու, որ մեքենաներով անցնեք։ Կազմակերպել ենք, միասին պայմանավորվել ենք, որ ինչ-որ մի կարգավիճակով մի բան ստեղծենք, բայց դա ՌԴ քաղաքացիներ են եղել, եւ նրանց թույլ են տվել։ Հիմա այս դեպքում թույլ չեն տալիս ոչ քաղաքացիներին։ Համավարակը կանցնի, ամեն ինչ կլինի»,- ասաց նա՝ հավելելով, որ ցուցարարները հիմա իրենից պահանջում են փոխել այլ երկրի կանոնները, ինչն անիրատեսական է։

Նա վերցրեց ցուցարարների մեկնած ցուցակը, սակայն եւ շեշտեց, որ որեւէ երաշխիք չի կարող տրամադրել։

Այնուհետեւ քաղաքացիները առաջ քաշեցին Բելառուսիայի օրինակը, որտեղ համավարկը նույնպես չի նահանջել, սակայն սահմանները բաց են։ «Այնտեղ կա այլ կարգավիճակ, դա իրենց որոշումն է։ Խնդիրը ծանոթ է, հասկանալի է, բայց լուծումն առկա չէ, որովհետեւ լուծումը վերաբերում է այլ երկրի որոշումներին»,- պարզաբանեց Մնացականյանը։

Քաղաքացու հարցին՝ ի՞նչ քննարկումներ են տեղի ունենում ՌԴ-ի հետ, Մնացականյանն ասաց. «Ոչ միայն Ռուսաստանի ուղղությամբ, այլ ընդհանրապես, վաղը կարող է ձեր նման մի ուրիշ խումբ գալ ու ասի՝ թողեք գնանք Եվրոպա։ Հիշեցնեմ բոլորիդ, որ գոյություն ունի համաշխարհային համավարակ»,- ասաց նախարարը՝ շեշտելով, որ իրավիճակը դեռեւս այնպիսին չէ, որ կանոնները փոխվեն։

Ցուցարարները շարունակեցին իրենց բողոքները՝ շեշտելով, որ բավարարված չեն նախարարի պատասխաններից, ինչին ի պատասխան՝ Մնացականյանն արձագանքեց՝ բնական է, որովհետեւ ուզում եք գնալ։ Նա հարցրեց, թե արդյոք կցանկանայի՞ն, որ նախարարն իրենց սուտ խոստում տար, ինչին ի պատասխան՝ քաղաքացիները պատասխանեցին՝ ոչ, բայց մենք ցանկանում ենք կոնկրետ պատասխան ունենալ։

Մնացականյանը պատասխանեց, որ լիովին հասկանում է իրավիճակը, բայց խնդիրն ամբողջովին Հասյատանի ձեռքում չէ։ Նա վստեհցրեց, որ խնդիրը բարձրաձայնում են, բայց եւ չխոստացավ, որ որեւէ մոտակա ժամկետում հարցը կկարգավորվի։