Նավալնիին թունավորել են «Новичок»-ով. Մերկելը Ռուսաստանից բացատրություններ է պահանջում

Ռուսաստանի Դաշնության ամենահայտնի ընդդիմադիր գործիչ եւ Պուտինի ակտիվ քննադատ, ՌԴ Կոռուպցիայի դեմ պայքարի հիմնադրամի ղեկավար, բլոգեր Ալեքսանդր Նավալնիին թունավորել են «Новичок» կոչվող թունանյութով:

Գերմանիայի կանցլեր Անգելա Մերկելը հիշյալի կապակցությամբ հանդես է եկել հայտարարությամբ: Նա Նավալնիին անվանել է հանցագործության զոհ եւ Ռուսաստանի Դաշնության իշխանություններից բացատրություն է պահանջել գործչի թունավորման կապակցությամբ: ՄերկելըՌուսաստանին զգուշացրել է Եվրամիության եւ ՆԱՏՕ-ի համատեղ արձագանքի մասին եւ հայտարարել, որ «Новичок»-ի հետ կապված պարզաբանումների է սպասում:

«Ռուսաստանի ընդդիմության առաջնորդի նկատմամբ սպանության փորձ է կատարվել «Новичок» խմբի նյարդապարալիզացնող թույնով: Գերմանական լաբորատորիայի մասնագետները անալիզների հստակ պատասխաններ են ստացել, Նավալնիի օրգանիզմում այդ թույնի առկայությունը կասկածի տակ դրվել անգամ չի կարող, միանշանակ դա «Новичок» է»,-Բեռլինում այսօր ասել է Մերկելը:

Նա հավելել է, որ բունդեսվերի լաբորատորիայում արված պատասխանները հստակ պատկեր են արտացոլում՝ Նավալնիին թունավորել են կանխամտածված, ծրագրված եւ դիտավորյալ. «Նրան փորձել են լռեցնել, իսկ ես՝ ամբողջ գերմանական կառավարության անունից խստորեն դատապարտում եմ այս քայլը: Այժմ ծայրաստճան լուրջ հարցեր են առաջացել, որոնց կարող է պատասխանել միայն ռուսական իշխանությունը: Ամբողջ աշխարհն է սպասում պատասխանների»,-շեշտել է Մերկելը՝ հավելելով, որ Ալեքսեյ Նավալնիի դեմ հանցագործությունն ուղղված է իրավունքի եւ արժեքների ազատության դեմ, որոնք պաշտպանում է Գերմանիան: Կանցլերը նաեւ զորակցություն է հայտնել Նավալնիի ընտանիքին, իսկ վերջինիս՝ շուտափույթ ապաքինում:

Գերմանիայի կառավարությունը պատրաստվում է փորձաքննությունների արդյունքների մասին  տեղյակ պահել Եվրամիության եւ ՆԱՏՕ-ի գործընկերներին, ինչից հետո կկայացվի համատեղ որոշում՝ հետագա քայլերի մասին:

Բունդեսթագի Քրիստոնեա-դեմոկրատական միություն (ՔԴՄ) խմբակցության արտաքին քաղաքականության փորձագետ Յուրգեն Հարդտը DW- ին տված հարցազրույցում Նավալնիի թունավորման ապացույցները համարել է  «հուսահատեցնող»:

«Խոսքը ռազմական նպատակներով կիրառվող թունավորող նյութի մասին է, որն ինչպես Սկրիպալի, այնպես էլ այս դեպքում, կարող է պատրաստված լինել միայն հատուկ մասնագիտացված լաբորատորիաներում, որոնք գտնվում են պետական պատասխանատվության ներքո: Հենց այս պատճառով էլ պարզ է , որ դեպքը չէր կարող  տեղի ունենալ  առանց պետական օղակների իմացության: Ես ակնկալում եմ հստակ, համատեղ եվրոպական արձագանք Ռուսաստանի նկատմամբ այս իրավիճակում, երբ Ռուսաստանի նախագահի հակառակորդը մահվան վտանգի տակ է: Նման իրավիճակում ԵՄ-ն չի կարող լռել»,-ասել է Հարդտը:

Իր հերթին, Բունդեսթագի Ազատ դեմոկրատական կուսակցության (FDP) պատգամավոր Ռենատա Ալտը ասել է. «Ալեքսեյ Նավալնիի գործը ստիպում է մտածել, թե որքան շատ ընդդիմադիրներ եւ նախագահ Պուտինի հակառակորդներ դեռ պետք է վախենան իրենց կյանքի եւ առողջության համար: Այստեղ նաեւ հարց է առաջանում, թե ինչ մակարդակում Ռուսաստանը կարող է գործընկեր համարվել ԵՄ-ի և Գերմանիայի համար: Կանցլեր Մերկելը եւ արտգործնախարար Մասը այժմ պետք է պատասխանեն այն հարցին, թե որքան ավելի շատ վստահություն կունենան այս ռեժիմի նկատմամբ»:

Միեւնույն ժամանակ, Ալեքսեյ Նավալնիի հակակոռուպցիոն հիմնադրամի  գործընկերներից եւ նրա աջակիցներից Լեոնիդ Վոլկովը Twitter- ի իր էջում գրել է, որ «2020 թվականին Նավալնին թունավորելը «Новичок» -ով նույնն է, ինչ հանցագործության վայրում ինքնագիր թողնելը»: Նույն գրառման մեջ Վոլկովը տեղադրել  է Ռուսաստանի նախագահ Վլադիմիր Պուտինի ստորագրության լուսապատճենը:

Նավալնիի մեկ այլ գործընկեր՝ Իվան Ժդանովը Twitter- ում գրել է, որ Նովիչոկից կարող է օգտվել միայն պետությունը, այսինքն՝ նրա Ազգային անվտանգության եւ հետախուզական հատուկ ծառայությունները:

Մինչդեռ Charite կլինիկան, որտեղ այժմ բուժվում է Նավալնին,  հայտնել է, որ ընդդիմադիր գործիչը շարունակում է մնալ ծանր վիճակում, վերակենդանացման բաժանմունքում: Նա միացված է թոքերի արհեստական օդափոխության սարքին: Բժիշկները չեն հերքում, որ Նավալնին դեռ երկար ժամանակ նյարդային համակարգի հետ կապված խնդիրներ կունենա եւ երկարատեւ բուժման կարիք ունի:

Նավալնիի ինքնազգացողությունը կտրուկ վատացել էր օգոստոսի 20-ին, Տոմսկից Մոսկվա թռչելիս, ինքնաթիռում: Նա սկզբում վատ է զգացել, այնուհետ գնացել զուգարան, որտեղ էլ կորցրել է գիտակցությունը, ինքնաթիռը չնախատեսված շտապ վայրէջք է կատարել Օմսկում, որտեղ քաղաքական գործչին հոսպիտալացրել են Օմսկի հիվանդանոցի վերակենդանացման բաժանմունք, անգիտակից վիճակում: Նավալնիի փաստաբան Կիրա Յարմիշը նույն օրը հայտարարել էր, որ ընդդիմադիր գործչի մոտ տոքսիկ թունավորում է:

Հաջորդ օրն արդեն Յարմիշն ու Նավալնիի աջակիցները հայտարարել են, որ Նավալնիին դիտավորյալ թունավորել են:  Մինչ թռիչքը նա Տոմսկի օդանավակայանի սրճարանում թեյ էր խմել, օդանավում ոչինչ չի կերել ու չի խմել եւ ենթադրվում է, որ նրան թունավորել են հենց թեյի միջոցով, քանի որ տաք հեղուկում թունավորող նյութն ավելի արագ է աշխատում: Օմսկի բժիշկները հերքել են թունավորման մասին պնդումները՝ հայտարարելով, թե հիմնական ախտորոշումը նյութափոխանակության խանգարումն է, որն առաջացել է արյան մեջ շաքարի կտրուկ անկման պատճառով:

Գերմանացի բժիշկների՝ ՌԴ ժամանումից եւ հատուկ հրավիրված կոնսիլիումից, երկար բանակցություններից եւ ռուսական կողմի հատուկ թույլտվությունից հետո միայն հաջողվեց Նավալնիին տեղափոխել Գերմանիա, որտեղ էլ հաստատվեց նրա թունավորման վարկածը: