Հայտնի է Ֆրանսիայի նոր կառավարության կազմը. կան նորեկներ, վերանշանակումներ ու փոխադրումներ

Ելիսեյան պալատը հայտարարել է Ֆրանսիայի կառավարության նոր կազմը: Հիշեցնենք, ուրբաթ օրը հրաժարական տվեց Ֆրանսիայի վարչապետ Էդուար Ֆիլիպն ու նախագահ Մակրոնի հրամանագրով նշանակվեց նոր վարչապետ՝ Պրադ քաղաքի քաղաքապետ Ժան Կաստեքսը, իսկ նոր կառավարության կազմի մասին պետք է հայտնի դառնար այս շաբաթ: Ֆրանսիայի նոր կառավարությունում եղել են վերանշանակումներ, պաշտոնների փոփոխություններ, կան նորեկներ:

Էմանուել Մակրոնի հրամանով, Ժան-Իվ Լե Դրիանը վերանշանակվել է երկրի արտաքին գործերի նախարարի պաշտոնում: Այս մասին հայտարարել է Ելիսեյան պալատի գլխավոր քարտուղար Ալեքսի Քոլերը:

Ֆրանսիական դիվանագիտությունը Լե Դրիանը գլխավորում է Էմանուել Մակրոնի նախագահության սկզբից՝ 2017 թվականից: Նա ֆրանսիական կառավարության հնաբնակներից է: Մինչ ԱԳ նախարարի պաշտոնում նշանակվելը,  5 տարի շարունակ՝ 2012 թվականից սկսած, ղեկավարում էր երկրի պաշտպանական գերատեսչությունը:

Իր պաշտոնում վերանշանակվել է նաեւ Ֆրանսիայի զինված ուժերի նախարար Ֆլորանս Փարլին: Նա ռազմական գերատեսչությունը ղեկավարում է վերջին 3 տարվա ընթացքում:

Լե Դրիանն ու Փարլին ներկայացնում էին ֆրանսիական կողմը՝ Ռուսաստանի եւ Ֆրանսիայի արտաքին գործերի եւ պաշտպանության գերատեսչությունների ղեկավարների «2 + 2» ձևաչափով Մոսկվայում կայացած կարեւոր հանդիպման ժամանակ, որը տեղի ունեցավ անցյալ տարվա սեպտեմբերին:

Փոխվել է երկրի Ներքին գործերի նախարարը: ՆԳ նոր նախարար է նշանակվել ժերալդ Դարմանենը, որն ավելի վաղ զբաղեցնում էր պետական գործերի եւ պետական ֆինանսների նախարարի պաշտոնը:

Բրյունո Լե Մերը կշարունակի աշխատել Ֆրանսիայի կառավարությունում՝ էկոնոմիկայի եւ ֆինանսների նախարարի պաշտոնում: Փոխվել է նաեւ երկրի մշակույթի նախարարը. Ֆրանկ Ռիեսթերի փոխարեն այդ պաշտոնում նշանակվել է Ռոզլին Բաշլոն, որը Ֆրանսիայի կառավարության կազմում է աշխատել նախագահ Նիկոլա Սարկոզիի կառավարման շրջանում, իսկ վերջին տարիներին աշխատում էր հեռուստաընկերությունում:

Կայուն զարգացման խորհրդարանական հանձնաժողովի ղեկավար Բարբարա Պոմպիլին նշանակվել է էկոլոգիական անցման նախարար: Նախկինում այդ պաշտոնը զբաղեցրած Էլիզաբեթ Բորնը փոխադրվել է այլ պաշտոնի՝ զբաղեցնելով աշխատանքի նախարարի աթոռը:

Նոր ֆրանսիական կառավարության նորեկներից է արդարադատության նախարարը: Նիկոլ Բալուբեի փոխարեն այդ պաշտոնում նշանակվել է փաստաբան Էրիկ Դյուփոն-Մորետտին: Նա նախկինում որեւէ նախարարական պաշտոնում չի աշխատել: Դյուփոն-Մորետտի՝ պաշտոնապես հրապարակված կենսագրությունից պարզ է դառնում, որ նա ֆրանսիական արդարադատության մեջ որպես փաստաբան բացարձակ ռեկորդակիր է, հաղթել է 145 դատական գործ: Նման ռեկորդի է հասել նա մինչեւ 2020-ի տարեսկիզբը:

Ինչպես հաղորդվում է, նա զբաղվում է նաեւ միջազգային գործերով: Մասնավորապես, 2020 թվականի փետրվարից Դյուփոն-Մորետտին հանդիսանում է Լոնդոնում կալանքի տակ գտնվող, Wikileaks կայքի հիմնադիր Ջուլիան Ասանժի հնչեղ գործով փաստաբանական խմբի անդամներից մեկը: Նա է այս տարեսկզբին ֆրանսիական իշխանություններից պահանջել Ասանժին տրամադրել քաղաքական ապաստան՝ հորդորելով հաշվի առնել այն հանգամանքը, որ Wikileaks-ի կառույցների մի մասը գտնվում է Ֆրանսիայում:

Արդարադատության նախարարը Ֆրանսիայում ավանդաբար համարվում է կառավարության ավագ անդամներից մեկը:

Նորանշանակ վարչապետ ժան Կաստեքի ղեկավարած կառավարությունում ընդհանուր առմամբ կա 16 նախարար եւ 14 փոխնախարար: Նախագահ Մակրոնի տված խոստման համաձայն, կառավարությունում պահպանվում է գենդերային հավասարությունը:

Ֆրանսիայի կառավարության վերակազմավորումը տեղի է ունեցել նախկին վարչապետ Էդուարդ Ֆիլիպի հրաժարականի կապակցությամբ: Վերջինս որոշեց ավարտել իր եռամյա պաշտոնավարումը` Ֆրանսիայի գլխավոր նավահանգստային եւ բիզնես-կենտրոն համարվող Գավր քաղաքի քաղաքապետ ընտրվելու կապակցությամբ: Փոխվեց վարչապետը, այնուհետ հայտարարվեց կառավարության ամբողջ կազմի փոփոխության մասին:

Ֆրանսիայի նախագահ Էմանուել Մակրոնը նախօրեին իր Twitter-ում հայտնել էր, որ երկրի կառավարության նոր խնդիրն է լինելու կորոնավիրուսի համաճարակի պատճառով տուած տնտեսության եւ սոցիալական  ոլորտի վերականգնումը, ինչպես նաեւ շրջակա միջավայրի պաշտպանությունը, ֆրանսիական մշակույթի զարգացումն ու եվրոպական ինքնիշխանության պաշտպանությունը:

Ելիսեյան պալատի ներկայացուցչի խոսքով, նախագահ Մակրոնն առաջիկա ամիսներին Ֆրանսիայում սպասվող բարեփոխումների մասին մտադիր է մանրամասն  խոսել Ֆրանսիայի ազգային տոնի օրը՝ հուլիսի 14-ին, հեռուստատեսային հարցազրույցի ընթացքում: Ինչպես նախատեսված է, նշանակումից մի քանի օր անց վարչապետը պետք է հայտարարությամբ հանդես գա խորհրդարանի ստորին պալատում՝ Ազգային ժողովում: