ԱԱԾ-ն հայտնել է, որ Սեդրակ Քոչարյանի՝ կազմակերպված խմբում ներգրավված լինելու տվյալներ չկան. Քոչարյանի պաշտպանն առարկեց

Վերաքննիչ քրեական դատարանում Մարտի 1-ի գործով ամբաստանյալ Ռոբերտ Քոչարյանի պաշտպաններն այսօր ծավալուն առարկություն ներկայացրին մեղադրող եւ տուժող կողմերի ելույթների դեմ:

Նշենք, որ վերջիններս, չհամաձայնելով Քոչարյանին անձնական երաշխավորությամբ ազատ չարձակելու որոշման դեմ պաշտպանների բողոքին, հայտարարել էին, որ Քոչարյանի կողմից գործի քննությանը խոչընդոտելու ռիսկը չի նվազել, հիշատակել էին նաեւ դատարան ուղարկված այն գործը, ըստ որի՝ Ռոբերտ Քոչարյանի մտերիմը կազմակերպված խումբ է ստեղծել՝ քննությանը խոչընդոտելու նպատակով: Խոսքը «5-րդ ալիք»-ի սեփականատեր Արմեն Թավադյանի մասին է. նա մեղադրվում է Մարտի 1-ի գործով տուժողին սուտ ցուցմունք տալու համար կաշառելու մեջ: Դատախազը նշել էր, որ քրեական գործով կան տվյալներ, որոնք վկայում են այդ գործընթացներին Քոչարյանի ընտանիքի անդամների մասնակցության մասին:

Առարկության ներկայացման ընթացքում Քոչարյանի պաշտպաններից Հովհաննես Խուդոյանը, որը նաեւ Արմեն Թավադյանի պաշտպանն է, անդրադարձավ դատախազի այդ հայտարարությանը՝ ասելով, որ գործի քննության նախնական փուլում վարույթն իրականացնող մարմինը նման վարկած քննարկել է, սակայն դա հետագայում հերքվել է նաեւ օպերատիվ տվյալների միջոցով. «ԱԱԾ-ն հայտնել է, որ կազմակերպված խմբի անդամների, այդ թվում՝ Սեդրակ Քոչարյանի, Վիկտոր Սողոմանյանի եւ այլ անձանց կողմից խմբում ներգրավված լինելու վերաբերյալ տեղեկություններ չեն ստացվել»,- ասաց Հովհաննես Խուդոյանը՝ համապատասխան փաստաթուղթ ներկայացնելով դատարանին. «Բացի այդ, ենթադրում եմ՝ դատախազությանը պետք է քաջ հայտնի լիներ, որ նույն գործի շրջանակում ՀՀ վերաքննիչ քրեական դատարանը, դատավոր Ալեքսանդ Ազարյանի նախագահությամբ, կայացրել է դատական ակտ, որով բացառել է կազմակերպված խմբի կողմից հանցանքի կատարման հիմնավոր կասկածի առկայությունը եւ նշել, որ որեւէ ապացույց չի ներկայացվել դրա վերաբերյալ, այդ ակտը բողոքարկվել է Վճռաբեկ դատարան, որը այն վարույթ չի ընդունել, եւ դա այն պայմաններում, երբ գործի նախաքննությունը ավարտված է եղել»,- ասաց պաշտպանը՝ հավելելով, որ այդ պարագայում ընտանիքի անդամների հնարավոր մասնակցությանը հղում կատարելը ընդհանրապես ընդունելի չէ:

Առարկության ժամանակ մեղադրող դատախազ Գեւորգ Բաղդասարյանը երեկ անդրադարձել էր նաեւ Սահմանադրական դատարանի ՍԴՈ-1476 որոշմանը՝ պնդելով, որ ՍԴ-ն եւս արտահայտել է իրավական դիրքորոշում առ այն, որ հատուկ ընթացակարգի բացակայության պայմաններում դատարանները գործառութային անձեռնմխելիության հարցը պետք է քննարկեն քրեադատավարական սովորական ընթացակարգերի պայմաններում. «Գործառութային անձեռնմխելիության հարցի գնահատմանը դատարանը գնահատական արդեն իսկ տվել է եւ տվել է նաեւ ոչ Դանիբեկյանի նախագահությամբ, այլ այն փուլում, երբ մինչդատական վարույթում է նման որոշում կայացրել, եւ Դանիբեկյանը սույն գործով վերջնական դատական ակտ կայացնելիս եւս պետք է այդ հարցին գնահատական տա»,- ասել էր դատախազը: Անդրադառնալով նրա այս հայտարարությանը՝ պաշտպաններից Արամ Վարդեւանյանն ասաց, որ չի ցանկանում հերթական անգամ մեկնաբանել ՍԴ-ի որոշումը, սակայն մի հռետորական հարց հնչեցրեց. «Դատավոր Աննա Դանիբեկյանը գտել է, որ ինքը չգիտի՝ պարոն Քոչարյանը գործառութային անձեռնմխելիությա՞ն թե՞ դրա բացակայության ռեժիմում է. եթե դատարանը չգիտի՝ արդյոք գործառութային անձեռնմխելիությունը կիրառելի է, թե ոչ, դա ո՞նց չի ազդում կալանավորման հարցի վրա»,- ասաց Վարդեւանյանը:

Պաշտպաններից Հայկ Ալումյանն էլ դարձյալ շեշտեց, որ տուժող կողմի ներկայացուցիչի ելույթը դուրս էր բուն հարցի քննարկման շրջանակից եւ առավելապես ուղղված էր հանրությանը, ոչ թե դատարանին: Ալումյանը հիշեցրեց, որ երբ Վերաքննիչ դատարանը, դատավոր Արմեն Դանիելյանի նախագահությամբ, նրան նորից կալանավորելու որոշում էր կայացրել, Քոչարյանը չսպասեց, որ իր հետեւից գան, այլ ինքնակամ գնաց «Երեւան-Կենտրոն» քրեակատարողական հիմնարկ. «Դատարանը որոշում էր կայացրել, եւ անկախ նրանից՝ ինքը համաձայն էր այդ որոշմանը թե, ոչ, չսպասեց, որ իր հետեւից գան, ինքը գնաց, ներկայացավ ՔԿՀ, դեռ մի քանի ժամ էլ այնտեղ սպասեց՝ մինչ համապատասխան փաստաթղթերը հասցնեին ՔԿՀ, որովհետեւ մինչ դա նրան իրավունք չունեին ընդունել. այ սա է պարոն Քոչարյանի վերաբերմունքը դատարանների նկատմամբ»,- ասաց Ալումյանը՝ հավելելով. «Հեղափոխությունից հետո անցել է արդեն 2 տարի, այսինքն՝ պարոն Քոչարյանի պաշտոնավարման 1/5-ը, եւ ես շատ ուրախ կլինեի, որ այդ չափով այս իշխանությունը դատարանների մասին մտածած լիներ»: Արձագանքելով պաշտպանին՝ նախագահող դատավոր Արսեն Նիկողոսյանն ասաց, որ իրենց՝ դատավորների աշխատավարձն այս ընթացքում բարձրացել է: Ալումյանը նախ շնորհավորեց, հետո ասաց, որ այն ժամանակ էլ է բարձրացվել եւ նշեց, որ ինքն առավելապես շենքերի ավելացման մասին էր խոսում:

Բողոքի քննությունն այս պահին շարունակվում է. մեկը մյուսին արձագանքելով՝ պարբերաբար ելույթ են ունենում թե՛ մեղադրող, թե՛ տուժող, թե՛ պաշտպանական կողմերը: