Լիլիթ Մակունցը պարզաբանեց, թե ինչու էր երեկ «Իմ քայլը» լուռ ԲՀԿ-ի ելույթների ժամանակ (տեսանյութ)

ԱԺ «Իմ քայլը» խմբակցության ղեկավար Լիլիթ Մակունցը այսօր Ազգային ժողովում իր ելույթում անդրադարձավ «Բարգավաճ Հայաստան» խմբակցության բոյկոտին նախորդած քաղաքական հայտարարությանը: 

«Ընդդիմությանը լռեցնելու մասին հայտարարության մեջ որպես ապացույց «Բարգավաճ Հայաստան» խմբակցությունը բերում է հունիսի 5-ին խմբակցության ղեկավարի կողմից արված քաղաքական հայտարարության պատասխան քաղաքական հայտարարությունը արդեն «Իմ քայլը» խմբակցության ղեկավարի կողմից, եւ սա վերագրվում է որպես ընդդիմությանը լռեցնելու փորձ: Նախ կարծում եմ՝ բոլորս պետք է դուրս գանք որեւէ մեկին լռեցնելու տրամաբանությունից, որը ոչ միայն անհամարժեք է եւ չի համապատասխանում մեր արժեքային հենքին, այլեւ չի համապատասխանում իրականությանը: Եվ ինչպես քաղաքական մեծամասնությունը չի կարող լռեցնել ընդդիմությանը, այնպես էլ ընդդիմությունը իր հայտարարություններով կամ որեւէ այլ կերպ չի կարող լռեցնել քաղաքական մեծամասնությանը քաղաքական հայտարարություններ անել»,- նշեց Մակունցը:

Նրա գնահատմամբ՝ հունիսի 5-ին հնչած քաղաքական հայտարարությունը մինչ այդ «Բարգավաճ Հայաստան» խմբակցության արած մյուս բոլոր հայտարարություններից տարբերվում էր ընդամենը երկու կետով. առաջին՝ խոսվել է կորոնավիրուսով պայմանավորված դժվարությունների մասին արտակարգ դրության պայմաններում, եւ դա արվում էր վարչապետի եւ նրա ընտանիքի վարակված լինելու պարագայում, եւ երկրորդ՝ Կառավարության 97 տոկոս փոփոխության պահանջը փոխվել էր 100 տոկոսի:

«Հետեւաբար «Բարգավաճ Հայաստան» խմբակցության նախորդ քաղաքական հայտարարությունները իրենց քաղաքական շեշտադրումներով շատ քիչ են տարբերվել այդ օրը արված հայտարարություններից: Երեկ նույնպես «Բարգավաճ Հայաստան» խմբակցության գործընկերները խոսում էին քաղաքական մեծամասնության կողմից ընդդիմությանը լռեցնելու փորձերից, եւ այն պարագայում, երբ «Իմ քայլը» խմբակցությունը լուռ էր: Հետաքրքիր էր նաեւ հետեւել, որ «Բարգավաճ Հայաստան» խմբակցության գործընկերների ելույթները այնպես էին ձեւակերպված՝ ասես արձագանքում էին «Իմ քայլը» խմբակցության պատգամավորների ելույթներին: Իսկ մենք լուռ էինք: Պարզաբանեմ՝ ինչու: Որովհետեւ իրավական գործընթացին «Իմ քայլը» խմբակցությունը այլ անելիք չուներ, քան լսել իրավական կողմը ներկայացնող դատախազի միջնորդությունը, լսել այդ առումով կողմ հանդիսացող «Բարգավաճ Հայաստան» խմբակցության հարցադրումները եւ ելույթները, փակ քվեարկության ժամանակ կայացնել իր որոշումը: Լուռ էինք, որովհետեւ թե՛ հանրությունը, թե՛ միջազգային մեր գործընկերները իրավունք ունեն առանց որեւէ ավելորդ ելույթների լսել եւ հասկանալ՝ ինչ է կատարվում իրավական գործի առնչությամբ, անկախ նրանից, թե որքան ջանասիրաբար էին փորձում մեր ընդդիմադիր գործընկերները այն ներկայացնել որպես քաղաքական հետապնդում»,- հայտարարեց «Իմ քայլը» խմբակցության ղեկավարը՝ ընդգծելով, որ բոյկոտելը, ի վերջո, ընդդիրմության իրավունքն է, տարբեր ատյաններին դիմելը՝ նույնպես:

Մակունցը նշեց, որ Հայաստանի Հանրապետությունում խոսքի ազատությունն ու ժողովրդավարությունը ՀՀ կարեւորագույն ձեռքբերումներն են, եւ դրա վկայությունը ԶԼՄ-ներում ու տարբեր հարթակներում գործող քաղաքական թիմի հասցեին արվող քննադատությունն է, որը, ըստ նրա, ցավոք, հաճախ նաեւ անձնական վիրավորանքներով է ուղեկցվում: Խմբակցության ղեկավարը ընդգծեց նաեւ, որ վերջին շրջանում միտում կա բոլոր իրավական գործընթացներին տալ քաղաքական հետապնդման երանգ՝ փորձելով ճնշում գործադրել իրավապահ մարմինների վրա:

«Ուստի որեւէ գործով չխաթարելով որեւէ անձի անմեղության կանխավարկածը կրկին հայտարարում ենք, որ Հայաստանում այլեւս անխտիր բոլորը հավասար են օրենքի առաջ, անկախ զբաղեցրած դիրքից, կուսակցական պատկանելությունից եւ քաղաքական հայացքներից»,- իր ելույթը եզրափակեց Լիլիթ Մակունցը: