Եթե մտածում եք՝ ինձ վախեցրել են, դուք էլ վախեցնեիք, գուցե մի բան ստացվե՞ր. դատախազը ներկայացրեց մանրամասն ապացույցներ

ՀՀ Ազգային ժողովում շարունակվում է Գագիկ Ծառուկյանին անձեռնմխելիությունից զրկելու մասին գլխավոր դատախազի միջնորդության քննարկումը:

ԲՀԿ խմբակցության պատգամավոր Արման Աբովյանը գլխավոր դատախազին հարց հնչեցրեց.

-Պարո՛ն դատախազ, շատ զվարճալի է տեսնել՝ ինչպես եք փորձում ապացուցել, որ մածունը սեւ է: Ձեր մատնանշած փաստարկների մեջ չկա որեւէ փաստարկ, որն ուղղակի մատնանշում է Գագիկ Ծառուկյանին, չկա եւ չի էլ կարող լինի: Իսկ ինչ վերաբերում է այն հանգամանքներին, որոնք դուք հնչեցրիք, պարոն Ծառուկյանը կուսակցության լիդեր է, եւ մեր ուժը երկրորդ քաղաքական ուժն է Հայաստանում, առաջին՝ ընդդիմադիր. ե՛ւ այն ժամանակ, ե՛ւ հիմա այդ հարյուր հազարավոր մարդկանց եւ տասնյակ հազարավոր ակտիվիստների մեջ շատ դժվար է բոլորին վերահսկել: Դե, սա սենց, դուք ոչ մի բան չներկայացրիք, ինչը թույլ կտա ենթադրել, որ կան հիմքեր՝ քրեական հետապնդումը շարունակելու եւ զարգացնելու:

Ես հարց ունեմ՝ առանց էմոցիայի, հանգիստ, որովհետեւ ես էլ եմ հասկանում, դուք էլ եք հասկանում, որ դուք հիմա մասնակցում եք քաղաքական հետապնդումների այս բուռն պրոցեսին՝ ձեր կողմից սլիվներ անելով իշխանական թեւին, մասնակցելով բոլոր-բոլոր պրոցեսներին: Ինձ հետաքրքիր է՝ ձեզ վախեցրե՞լ են, գուցե ահաբեկե՞լ են, թե՞ դա ձեր ընտրությունն է: Ես հիմնվում եմ ձեր ելույթի վրա՝ հաշվի առնելով բոլոր պրոցեսները, որ ԲՀԿ-ի գրասենյակներն են շրջափակվում, մարդիկ են բերման ենթարկվում: Դա ձեր սեփական որոշո՞ւմն է մասնակցել այս ցիրկին:

Հարցին ի պատասխան՝ Արթուր Դավթյանն ասաց.

- Եթե մտածում էիք, որ հարցը վախեցնելու մեջ է, դուք էլ փորձեիք վախեցնել, պարո՛ն Աբովյան, գուցե մի բան դուրս գար: Ուրեմն ինձ ոչ ոք չի կարող վախեցնի: ՀՀ Սահմանադրությունն ու օրենքները գլխավոր դատախազին տվել են էնքան գործիք, այնքան ուժ ու այնքան պատասխանատվություն, որ երբեմն ուղղակի ուղիղ չի նայում, թե ում է հետապնդում, ու էդպես է միշտ լինելու: Իսկ հիմա հատուկ ձեզ համար ներկայացնեմ ապացույցները, հատուկ ձեզ համար՝ ավելի պարզ լեզվով:

Ի՞նչ ունենք. ունենք խումբ ցուցակներ, որտեղ կան ընտրողների տվյալներ, անուն-ազգանուններ, անձնագրերի տվյալներ, գումարի չափ, ընտրողի ստորագրություն: Ունենք էդ ընտրողներին գումարը բաժանողի տվյալներ, հարցաքննում ենք էդ մարդուն, էդ մարդն ասում է, որ՝ այո, ես կազմել եմ էս ցուցակը, ես բաժանել եմ էս գումարը, բաժանել եմ՝ Ծառուկյանի կուսակցությունների դաշինքի օգտին քվեարկելու համար: Որտեղի՞ց ես վերցրել էս գումարը, անձը վկայակոչում է թեկնածուին, ումից գումարները վերցրել է: Թեկնածուի մոտից հայտնաբերում ենք երկրորդ ցուցակը, որով թեկնածուն արդեն ընտրությունների արդյունքների մասին հաշվետվություն է ներկայացնում կուսակցության կենտրոնական շտաբին՝ ներկայացնելով, թե ինչքան գումար է ստացել, էդ գումարն ինչ ուղղություններով է ծախսել, այնտեղ հատուկ տողով գրված է ընտրողներին քվե տալու համար վճարվելիք գումարի չափը: Եվ էդ նույն մարդը ցուցմունքներ է տալիս ինքն էլ իր հերթին, որ՝ այո, սա իրականություն է, եւ, բնականաբար, հարցին, թե որտեղից այս գումարները, եւ ով է տրամադրել, ուղղակիորեն մատնանշում է, թե կոնկրետ դեպքում Գագիկ Ծառուկյանի հետ ինչ պայմանավորվածության արդյունքում ումից է վերցրել գումարները ում հանձնելու համար: Դե, հիմա էսքանից հետո եթե պետք է համարվի, որ սրանք ապացույցներ չեն, ուրեմն ինձ էդպիսի դատարան հայտնի չԷ: Այսքանը:

Դատախազի խոսքերին Արման Աբովյանն արձագանքեց, որ ինքը դատախազին վախեցնելու մտադրություն չունի, իսկ մնացածի մասով ասաց.

- Ոչ մի ապացույց, բացի ենթադրություններից, եւ այն ֆոտոշոփային փառատոնից, որ մենք տեսանք այս 2 օրերի ընթացքում, դուք, ըստ էության, չարձանագրեցիք, ինչ ասեմ, միջնորդություն ներկայացրեք, որ ֆոտոշոփին տանեք ենթարկեք քրեական պատասխանատվության, որովհետեւ այնքան ակնհայտ է, որ շինծու գործի հիման վրա քաղաքական հետապնդումներ են տեղի ունենում, եւ դուք մասնակից եք այդ ամենին: Ի՞նչ ասեմ, մեղքը ձեր վիզը: Տեսնենք՝ ինչպես կզարգանան իրադարձությունները:

Գլխավոր դատախազն արձագանքեց. «Պարո՛ն Աբովյան ջան, դարձյալ հատուկ ձեզ համար»՝ խոսքերով ներկայացնելով Գեղարքունիքում ընտրակաշառքի մասին հայտնի փաստաթղթի հաշվետվության առաջին մի քանի տողերը եւ հայտնեց, որ այդ փաստաթուղթը չի կազմվել ինչ-որ տեղ, այլ գտնվել է մեկ այլ գործով խուզարկություններից մեկի ժամանակ, այդ թղթի մասին տրվել է բացատրություն, կան հստակ տեղեկություններ:

«Ինչ ֆոտոշոփ, ինչ նկարած թուղթ»- եզրափակեց Արթուր Դավթյանը: