Մենք չենք ներքաշվելու որեւէ քաղաքական մանիպուլյացիայի մեջ․ «Ռեստորանների հայկական միության» գործադիր տնօրեն

Ռեստորանային ոլորտն այն ոլորտներից է, որն ամենաշատն է տուժել կորոնավիրուսի տարածման հետեւանքով ստեղծված իրավիճակից: Բանն այն է, որ պարետի սահմանած որոշմամբ՝ արգելվում է 5 եւ ավելի անձանց մասնակցությամբ հանրային միջոցառումների անցկացումը։ Այս որոշումը, սակայն, չի խանգարում որոշ ռեստորանների ընդհատակյա հարսանիքներ կազմակերպել:

Ընդհատակյա հարսանիքների մասին ահազանգել էր նաեւ ՀՀ վարչապետ Նիկոլ Փաշինյանը՝ նշելով, որ դրա հետեւանքով վարակվելու ու մահվան դեպքեր են արձանագրվել: 

Թեմայի վերաբերյալ մեր մի քանի հարցերին է պատասխանել «Ռեստորանների հայկական միության» գործադիր տնօրեն Վահե Գեւորգյանը։

- Պարո՛ն Գեւորգյան, վերջին օրերին ռեստորաններում ընդհատակյա միջոցառումներ կազմակերպելու դեպքեր են բացահայտվում։ Ռեստորանատերերը պարետի որոշումները հաշվի չե՞ն առնում։

- Նախ ասեմ, որ «Ռեստորանների հայկական միություն»-ը միավորում է 300-ից ավելի ռեստորան-սրճարանների, հիմնականում՝ Երեւանում եւ մոտակա մարզերում։ Մեր միության անդամների հետ կապված կարող ենք միանշանակ ասել, որ այդպիսի իրավիճակ չի եղել։ Միության անդամ բոլոր ռեստորանները հնարավորինս խստորեն պահպանում են կանոնները։

Իհարկե, քանի որ սա նոր իրավիճակ է, եւ ոչ ոք սրա միջով չէր անցել, գուցե եղած լինեն սեղանների միջեւ հեռավորության փոքր տարբերության խնդիրներ։ Ռեստորաններից որոշները պարետի որոշմամբ փակվել են 24 ժամով։ Բայց ինչ վերաբերում է միջոցառման անցկացմանը, մենք կարծում ենք, որ դա արդեն ոչ թե փոքր թերացում է, այլ միտումնավոր։ Այդտեղ արդեն խոսքը վերաբերում է հանրային առողջությանը, եւ մենք հասկանում ենք, որ 100-200, թեկուզ 50 անձանցով միջոցառում անցկացնելը հղի է բազմապատիկ վատ հետեւանքներով։ Ի սկզբանե մենք կոչ ենք արել հետեւել պարետի ցուցումներին։ Մեր միության որեւէ անդամ երբեք այդպիսի քայլ չի անի, մենք լիովին հասկանում ենք, որ սա մեր պետությունն է, եւ մեր պետության մեջ բոլորս մեր պատասխանատվությունն ունենք։

- Իսկ դժգոհությունների եւ բողոքների հետ որքանո՞վ է առնչվում ձեր միությունը։

- Մայիսի 20-ին Կառավարության շենքի դիմաց ցույց էին արել, սակայն մենք որեւէ մեկնաբանություն չենք տվել այդ մասնակիցների եւ նրանց պահանջների վերաբերյալ, բայց այստեղ հոլովվում է մեր անունը՝ որպես ռեստորանային բիզնեսի։ Մի քանի լրատվամիջոց էլ գրեցին, թե ռեստորանային բիզնեսի ներկայացուցիչներն ուզում են բողոքի ակցիա իրականացնել։ Մենք ուզում ենք ասել, որ որեւէ առնչություն չունենք այդ մարդկանց հետ եւ պահանջում ենք, որ դադարեն շահարկել «ռեստորանային ոլորտ» հասկացությունը։ Փորձում են ակցիաների ժամանակ այնպես ներկայացնել, թե ռեստորանային ոլորտի գերակշիռ մասն է խնդիրներ բարձրացնում, բայց դա բացարձակապես այդպես չէ։ Մեր միության որեւէ անդամ դրա հետ կապված չէ։ Եթե անկեղծ լինենք, Երեւանում մենք շուկայի բավականին մեծ մասն ենք զբաղեցնում։

Իսկ այդտեղ խոսքը հիմնականում հարսանյաց սրահներ ունեցողների, այդ սրահներում երգող-նվագող մարդկանց մասին է։ Բայց այստեղ խնդիրն այն է, որ պետք չէ փորձել ներգրավվել մի ոլորտ, որն ինքն այդ մասին չի խոսում։ Հասկանում ենք, որ կան փոքր ուժեր, որոնք փորձում են ինչ-որ քաղաքական նպատակներ հետապնդել, բայց մենք որեւէ ձեւով չենք ներքաշվելու որեւէ քաղաքական մանիպուլյացիայի մեջ։ Հարցազրույցներն էլ, եթե նայեք, կտեսնեք, որ այդտեղ նորմալ գործող ռեստորանատեր չկար, որ ասեր՝ ես միացել եմ ակցիային։ Եղել են հարսանյաց սրահի 1-2 սեփականատեր, տեխնիկա տրամադրողներ, շոուբիզնեսի ներկայացուցիչներ։

- Այսինքն՝ «Ռեստորանների հայկական միություն»-ը ըմբռնումո՞վ է մոտենում Կառավարության կողմից իրականացվող հակահամաճարակային քայլերին։

- Միանշանակ, մարտի 16-ին, երբ արտակարգ դրություն մտցվեց, սակայն սահմանափակումների վերաբերյալ որոշում չկար, մեր միության անդամներն արդեն սանիտարահիգիենիկ կանոնները պահպանում էին։ Մենք միշտ եղել ենք կառուցողական երկխոսության մեջ։ Նույնիսկ Կառավարության ընդունած միջոցառումների վերաբերյալ նախապես առաջարկություններ ենք արել։ Ելնելով մեր պետության հնարավորություններից՝ այդ առաջարկների մի մասը մասնակիորեն ընդունվել է, մի մասը չի ընդունվել։ Մենք մեր կարծիքը հայտնել ենք, որ, ամեն դեպքում, մեր ոլորտը ամենածանր խոցված ոլորտներից է։ Շատ լավ է, որ Հայաստանում կան բիզնեսներ, որոնք որոշ կորուստներ են կրել միայն շահույթից, բայց մենք ոչ թե շահույթ չունենք, այլ բացասական բալանսով ենք հիմա աշխատում։ Հասկանալի է, հաճախորդների քանակը շատ քիչ է։ Շրջանառությունը 90 տոկոսով նվազել է։

Հանրային սննդի ոլորտի ձեռնարկությունների տարեկան շրջանառության մեծ մասը եկել է զբոսաշրջությունից։ Օրինակ՝ անցած տարի զբոսաշրջիկները մոտավորապես 1.5 մլրդ դոլար են ծախսել Հայաստանում, որից մոտավորապես 250-300 մլն դոլարը մեր ոլորտում ծախսված գումարն է։ Խոսքը բավականին զգալի գումարի մասին է, ամեն տարի մենք վերելքի տենդենց ունեինք, ու հիմա, բնականաբար, դա զրոյացված է։ Մնում են տեղի հաճախորդները եւ առաքման ծառայությունը։ Մի քանի ընկերություն, որոնք ունեցել են արդեն իսկ աշխատող առաքման ծառայություն, բնական է, որ այս պարագայում իրենք ուղղակի դա ընդլայնել են։

- Ռեստորանային ոլորտը հիմնականում Կառավարության աջակցության ո՞ր միջոցառումներից է օգտվել։

- Իհարկե, մենք փորձում էինք հասնել նրան, որ զբոսաշրջության եւ հանրային սննդի ոլորտների վերաբերյալ առանձին միջոցառում լինի, որը կունենար մի քանի քայլեր, այդպիսի նախագիծ կար, սակայն այն չի հաստատվել եւ այս պահին կանգնած է։ Մեր գործընկերները հիմնականում 3-րդ միջոցառումից են օգտվել։ Կառավարության հետ մի քանի անգամ հանդիպումներ ենք ունեցել։ Կան հարցեր, որտեղ մենք այլ կարծիք ունենք, բայց մոտեցումը արդեն իսկ ողջունելի է, այսինքն՝ երբ մեր պետությունը շփվում է ոլորտի հետ եւ փորձում է լուծումներ գտնել, դա եւս ձեռքբերում է, որը չենք կարող չասել՝ 2018 թվականից ստեղծված իրադրությամբ է պայմանավորված։ Մեր ընկերությունները ներկայացնում են Հայաստանի լավագույն ռեստորանները եւ սրճարանները։ Իմ կարծիքով՝ եթե ոլորտում գրանցված անկման պատճառով, օրինակ, աշնան վերջին ռեստորաններ սկսեն փակվել, թող անհամեստ չհնչի, բայց մեր միության մեջ ներառված ընկերությունները չեն փակվի։

Լուսանկարը՝ Մեդիամաքսի