Գո՞հ չեք, մենք գոհ ենք․ վարչապետը՝ տրանսպորտի ոլորտում իրանացվելիք նոր ծրագրի մասին

Մեկ տարի առաջ մեզ մոտ տեղի ունեցավ կառավարության փոփոխություն, որի հետեւանքով այսօր ես որեւէ դրական առաջընթաց չեմ տեսնում կոնկրետ տրանսպորտի ոլորտում։ Ես առաջարկում եմ, որ դուք ձեր դիրքորոշումը վերանայեք այս ոլորտի նկատմամբ եւ այս ցաքուցրիվ եղած ոլորտը փորձեք համախմբել մեկ տեղում։

Այս մասին այսօր Աժ-ում կառավարության հետ հարցուպատասխանի ժամանակ ասաց «Բարգավաճ Հայաստան» խմբակցության պատգամավոր Արթուր Դալլաքյանը՝ իր խոսքն ուղղելով վարչապետ Նիկոլ Փաշինյանին։ Նա առաջարկեց ստեղծել նոր տրանսպորտային կոմիտե, որը, իր համոզմամբ, նոր արդյունքներ կտա։ «Այսօր թե՛ օդը, թե՛ ջուրը, թե՛ ցամաքը սպասարկող ոլորտները պետք է հայտնվեն մեկ տեղում, եւ վերահսկող տեսչական մարմինն էլ, որն այսօր առանձին տեղում է գտնվում, նույնպես հայտնվի մի տեղում»,- ասաց Դալլաքյանը՝ հավաստիացնելով, որ այս պարագայում առաջիկա մեկ տարում կլինի լուրջ արդյունք։

Վարչապետ Փաշինյանը պատասխանեց, որ ՀՀ-ում կա մի մեծ մոլորություն, որ հարց լուծելու համար պետք է մի հատ այդ հարցի նախարարություն ստեղծել։ «Տենց որ գնանք, Հայաստանում նախարարությունների թիվը պետք է 5 անգամ ավելի շատ լինի, բայց նախարարությունների թիվն ավելանում է ոչ թե հարցի լուծման կոնտեքստում, այլ քաղաքական կոնյուկտուրայի»,- ասաց Փաշինյանը։

Ինչ վերաբերում է տրանսպորտին, Փաշինյանը հաստատեց, որ կան խնդիրներ, բայց եւ ունեն պատկերացումներ այդ խնդիրները լուծելու մասին։ Նրա պնդմամբ նաեւ՝ այնսպես չէ, որ այդ ոլորտում խնդիրներ չեն լուծվել։ Այդ ոլորտում լուծվել է մի մեծ խդնիր, եւ, վարչապետի խոսքով, դա այն է, որ ՀՀ քաղաքացիները գոնե կորոնավիրուսից առաջ 50-60 եվրոյով թռչում էին Եվրոպա եւ վերադառնում։

Վարչապետը հայտարարեց, որ Երեւան քաղաքում հիմա ավտոբուսների պարկի թարմացման պրոցես է սկսվում, եւ որ դեռ շարունակվում են խնդիրների լուծումները։ Նա շեշտեց, որ 20 հազար քաղաքացիներ տաքսի վարելով են պահում իրենց ընտանիքը, եւ երբ տրանսպորտի ոլորտը կարգավորվի այնպես, որ ամեն ինչ «հավսար, զգաստ» վիճակում լինի, պետք է այս մյուս կողմի սոցիալական էֆեկտները կարողանալ լուծել։

«Համաճարակից առաջ մենք կարծում էինք, որ արդեն մոտեցել ենք այդ եզրին, որ պետք է այդ ձեւով լուծենք հարցը, չասեք՝ համաճարակը պատճառ ենք բերում, բայց հիմա պետք է հասկանանք սոցիալական վիճակը։ Երբ վերադառնանք, իսկ, մեր կարծիքով, մյուս տարի կվերադառնանք 2019 թվականի տնտեսական աճի տեմպին, ձեր ասածը մենք կանենք»,- ասաց վարչապետը՝ հավելելով, որ արդեն որոշել են այդ համակարգումները՝ փուլ առ փուլ։

Նա ասաց, որ անպայման լուծվելու է միջմարզային տրանսպորտի հարցը, բայց նկատեց, որ այստեղ էլ են լինելու շահարկումներ, թե մոնոպոլիաներ են ստեղծում։ «Ձեր առաջարկները կարող եք ուղարկել, բայց ես միանգամից ասեմ՝ բովանդակային առումով շատ ուշադիր կծանոթանանք, իսկ գերատեսչություն ստեղծելու առումով եկեք չանենք նման բան, որովհետեւ դրանով միայն պաշտոնյաների տրանսպորտի հարցն ա լուծվում՝ ծառայողական մեքենա եւ այլն, եւ այլն»,- ասաց վարչապետը։

Դալլաքյանը վսհատեցրեց, որ վարչապետը նույնպես ուրախ չի լինի, եթե պատգամավորներն ուրախանան մասնակի հաջողություններով, ուստի եւ շեշտեց, որ պետք է շարժվել մեխանիզմների փոփոխությունով։ Դալլաքյանի մի քանի առաջարկներից հետո վարչապետը հայտարարեց, որ տարածքների եւ ենթակառուցվածքների նախարարությունը ծրագիր է մշակել, որտեղ կան այդ հարցերի պատասխանները։ Դալլաքյանը պատասխանեց, որ տեսել է այդ ծրագիրը, ինչից հետո Փաշինյանը հարցրեց՝ գոհ չե՞ք։ Պատգամավորը բացասական պատասխան տվեց , ինչին ի պատասխան՝ Փաշինյանն ասաց՝ մենք գոհ ենք։