Միանվագ աջակցության ծրագրերից ոչ մեկում չընդգրկված քաղաքացիների խնդիրները մեղմելու տարբերակներ են քննարկվում

Կառավարությունը կորոնավիրուսի տարածման կանխարգելման ծրագրի շրջանակում հայտարարված արտակարգ դրության տնտեսական խնդիրները մեղմելու համար մշակել և ընդունել է 10 ծրագիր: Քաղաքացիներին հատկացվող միանվագ ֆինանսական աջակցության ծրագրերից երկուսը գործարկված է, երկուսը կգործարկվի վաղը, սակայն կան ֆինանսական լուրջ խնդիրների առաջ կանգնած քաղաքացիների խմբեր, որ այս ծրագրերից որևէ մեկի շահառուն լինել չեն կարող:

Այս հարցին այսօր ասուլիսին անդրադարձավ Աշխատանքի և սոցիալական հարցերի նախարար Զարուհի Բաթոյանը՝ նշելով, որ աջակցության նախագծերի քննարկումները շարունակվում են, Կառավարությունը փորձում է գտնել աջակցության կարիքն իսկապես ունեցողներին՝ նպատակ ունենալով օժանդակությունն ըստ անհրաժեշտության հատկացնել: «Այս պահին մենք ունենք 8-րդ ծրագիրը, որ կարող է վերաբերել նշված խմբին, սակայն շարունակվում են քննարկումներն ամենօյա ռեժիմով, և ավելի փոքր թիրախային խմբերը նույնականացվում են, քննարկվում են նաև այլ հնարավորություններ»,- ասաց նա:

Բաթոյանը նշեց, որ սոցիալական աջակցության ծրագրերից 5-ի դեպքում խմբերը տարբեր են. երեքի դեպքում շահառուներն աշխատանքից ազատվածներն են, մեկի դեպքում՝ չաշխատող ծնողների երեխաները, մեկն էլ վերաբերում է այս պահին աշխատողներին. «Բայց, իհարկե, այստեղ էլ կան սահմանափակումներ, որ կապված են ավելի խոցելի կամ տուժած ոլորտների հետ: Այս իմաստով այս պահին աջակցությունը տրամադրվում է հենց այդ ոլորտների աշխատակիցներին: Եվ քանի որ աջակցությունը տնտեսական չէ, ուստի այն տրամադրվում է ոչ թե գործատուի՝ իրավաբանական անձի, այլ ֆիզիկական անձի միջոցով»,- ասաց նախարարը՝ հիշեցնելով, որ ընտրվել են հյուրանոցային, հյուրատնային ծառայությունների, զբոսաշրջության, սննդի կետերի, վարսավիրանոցների, գեղեցկության սրահների, մանրածախ առևտրի ծառայությունների ոլորտները:

Նախարարն ընդգծեց, որ այն շահառուները, որ մշտապես եղել են կառավարության սոցիալական ծրագրերի շահառու, նրանք շարունակում են մնալ շահառու, և աջակցություն տրամադրվում է նրանց պարբերաբար: «Այս նոր ծրագրերի և ընթացիկ ծրագրերի տարբերությունն այն է, որ նոր ծրագրերը միանվագ են: Իսկ մյուս ծրագրերով ընթացիկ համակարգերը, որ աշխատում են և միտված են աջակցելու քաղաքացիներին, գործում են: Այսպես մարդիկ կարող են օգտվել նաև ընթացիկ ծրագրերից. եթե կարծում են, որ պիտի ընդգրկվեն նպաստի համակարգում կամ այլ ծրագրի կարիքն ունեն, կարող են այդ ծրագրերում ընդգրկվել»,- ասաց նա: