Ո՛չ, Մասիս Մայիլյանի ձայներն իր ձայներն են, Սամվել Բաբայանինը չեն. ՀՀ ԱԺ պատվիրակության գնահատականը՝ ԱՀ ընտրություններին

Կային խնդիրներ, որոնց շուրջ դեռ շատ աշխատելու բան կա, բայց, այնուամենայնիվ, այսօրվա տվյալները արտացոլում են այն պատկերը, որ արցախցին ձեւավորել է քվեարկության միջոցով: Ընդհանուր առմամբ ընտրությունները գնահատում ենք դրական:

Արցախում երեկ տեղի ունեցած ընտրություններն ամփոփելով այսօր այսպիսի հայտարարություն հնչեցրեց ՀՀ ԱԺ դիտորդական խմբի ղեկավար, «Իմ քայլը» խմբակցության անդամ Ալեն Սիմոնյանը: Նա նշեց, որ բաժանվել են խմբերի եւ շրջել տեղամասերում, ու կարող է ասել, որ շատ բարձր է գնահատում քվեարկողների կազմակերպվածությունն ու ակտիվությունը:

«Որքանով հասկանում եմ, երկրորդ փուլն անխուսափելի է, հույս ունենանք՝ կլինի ավելի լավ կազմակերպված: Հուսանք նաեւ, որ աշխարհում գոյություն ունեցող իրավիճակը՝ կապված կորոնավիրուսի հետ, չի կարողանա խանգարել, որ հանդիպենք 14 օր անց: Բոլորս հասկանում ենք, թե որքան կարեւոր է Արցախի հանրության համար ընտրությունների կայացումը, դա կարեւոր է Արցախի Հանրապետության վերջնական կայացման համար»,- հայտարարեց Սիմոնյանը:

«Լուսավոր Հայաստան»-ից Անի Սամսոնյանը նկատեց, որ եղել են Մարտակերտի մի քանի տեղամասերում, հայտնաբերել միյան ընթացակարգային խախտումներ, որոնք ունեին մի քանի պատճառներ.

«Առաջին. ԿԸՀ-ն պետք է աշխատի հանձնաժողովների հետ, կա վերապատրաստման լուրջ կարիք, երկրորդ, կան իրավական որոշ բացեր: Բնական է, որ ամեն ընտրությունից հետո կարիք է լինում Ընտրական օրենսգրքի բարելավման: Ընդհանուր առմամբ ընտրություններն անցել են շատ խաղաղ: Վստահ եմ, որ երկրորդ փուլում մասնակցությունը կրկին կլինի շատ ակտիվ, թերությունները կշտկենք»,- նկատեց Սամսոնյանը: Պատասխանելով միջազգային դիտորդների բացակայության պայմաններում ընտրությունների լեգիտիմության մասին հարցին՝ Սամսոնյանն ասաց՝ ցանկալի կլիներ, որ միջազգային դիտորդները մասնակցեին, բայց ԿԸՀ-ն փորձել է այնպես անել, որ ընտրությունները նաեւ առանց նրանց լինեն թափանցիկ: Այս առումով նա կարեւորեց 48 տեղամասերում տեսախցիկների առկայությունը:

Լրագրողներից մեկը հետաքրքրվեց՝ արդյոք պատգամավորների կարծիքով Արցախի նախագահի թեկնածուներից Մասիս Մայիլյանը Սամվել Բաբայանի շնորհիվ է ստացել այդքան ձայներ՝ հաշվի առնելով, որ խորհրդարանական ընտրություններում, օրինակ, Մայիլյանի կուսակցությունը անցողիկ շեմը չի հաղթահարել, իսկ Բաբայանի կուսակցությունը 9 մանդատ է ստանալու:

«Ո՛չ, Մասիս Մայիլյանի ձայներն իր ձայներն են, Սամվել Բաբայանինը չեն, Վիտալի Բալասանյանն իր ձայներն ունի, Արայիկ Հարությունյանը՝ իրենը: Էդ նույն տրամաբանությամբ կարելի է հարցնել՝ էս լրատվամիջոցը, որ հարց է տալիս, էդ ի՞ր հարցն է, թե՞ իր հետ աշխատող որեւէ մեկի»,- պատասխանեց Ալեն Սիմոնյանը: