Մանվել Գրիգորյանի եղբորորդու գործը մակագրվել է Արմավիրի մարզի դատավոր Վահե Խալաթյանին

ԱԺ նախկին պատգամավոր Մանվել Գրիգորյանի եղբորորդու՝ Զարզարդ Գրիգորյանի վերաբերյալ քրեական գործը մակագրվել է Արմավիրի մարզի ընդհանուր իրավասության դատարանի դատավոր Վահե Խալաթյանին:

Այս մասին ՀԺ-ն տեղեկացավ «Դատալեքս» դատական տեղեկատվական համակարգից: Նիստի օր դեռ չի նշանակվել:

Ըստ մեղադրական եզրակացության համառոտ նկարագրի՝ Զարզանդ Գրիգորյանը մեղադրվում է այն բանում, որ հակառակ ծառայության շահերի օգտագործելով իր պաշտոնեական դիրքը՝ պաշտոնի անձնագրին չբավարարող անձանց արվեստի դպրոցի և մանկապարտեզի տնօրենի պաշտոններին նշանակելու մասին կարգադրություններ է ստորագրել:

Այսպես. Գրիգորյանը, հանդիսանալով Արշալույս համայնքի ղեկավար եւ լինելով տեղական ինքնակառավարման մարմնում մշտապես կազմակերպչական-տնօրինչական գործառույթներ իրականացնող պաշտոնատար անձ, ունեցել է նույն համայնքի ավագանու անդամ Ասատուր Սերոբյանի համար ցանկալի վիճակ ստեղծելու անձնական շահագրգռվածություն: Դրա նպատակով համայնքապետարանի աշխատակազմի քարտուղարին հանձնարարել է կազմել կարգադրություն՝ Սերոբյանի կնոջը՝ Կարինե Ֆիդանյանին իր իսկ դիմումի համաձայն համայնքում գործող «Արվեստի դպրոց» ՀՈԱԿ-ի պաշտոնում նշանակելու մասին: Սակայն դրանով Գրիգորյանը ծառայության շահերին հակառակ է օգտագործել իր պաշտոնեական դիրքը, խախտել է «Վարչարարության հիմունքների և վարչական վարույթի մասին» եւ «ՊՈԱԿ-ների մասին» ՀՀ օրենքի որոշ հոդվածներ, համաձայն որոնց՝ այդ պաշտոնին նշանակվող անձը պիտի ներկայացնի բարձրագույն կրթություն ունենալու հանգամանքը հիմնավորող փաստաթղթի՝ դիպլոմի պատճենը, ինչը, սակայն, Ֆիդանյանի փաստաթղթերում բացակայել է: Անտեսելով դիմումին կից փաստաթղթերի թերի լինելու հանգամանքը, իրավիճակից բխող ճիշտ որոշում ընդունելու՝ դիմումը վերադարձնելու կամ թերի փաստաթղթերը ուղղելու փոխարեն նպաստավոր պայմաններ է ստեղծել՝ այն համայնքի ավագանու քննարկմանը և հավանությանն արժանացնելու առումով: Արդյունքում, ավագանու 2014 թվականի դեկտեմբերի 4-ին ընդունվել է N 66 որոշումը, որն էլ հիմք ընդունելով՝ բարձրագույն կրթություն չունեցող Կարինե Ֆիդանյանին իր՝ դեկտեմբերի 27-ի N 29 կարգադրությամբ նշանակել է «Արվեստի դպրոց» համայնքային ոչ առևտրային կազմակերպության տնօրեն՝ նրա հետ անորոշ ժամկետով կնքելով աշխատանքային պայմանագիր: Համաձայն այդ պայմանագրի՝ Ֆիդանյանը պաշտոնավարել է մինչև 2018թվականի հուլիսի 11-ը:

Բացի այդ, Զարզանդ Գրիգորյանը անտեսել է նաեւ «Նախադպրոցական կրթության մասին» ՀՀ օրենքի, ՀՀ կրթության և գիրության նախարարի N 416-Ն հրամանով հաստատված կարգի պահանջները եւ ստորագրել է կարգադրություն Ֆիդանյանին «Արշալույսի մանկապարտեզ» ՀՈԱԿ-ի տնօրեն նշանանակելու մասին: Մինչդեռ հիշյալ օրենքների համաձայն՝ նախադպրոցական ուսումնական հաստատության տնօրենի պաշտոնում կարող է աշխատել բարձրագույն կրթություն ունեցող եւ վերջին տասը տարում առնվազն 2 տարվա ընդհանուր աշխատանքային փորձ ունեցող անձը: Անտեսվել է նաեւ «ՊՈԱԿ-ների մասին» ՀՀ օրենքի այն պահանջը, որ գործադիր մարմնում նշանակված անձը չի կարող զբաղեցնել այլ պաշտոն, իսկ արվեստի դպրոցը տվյալ դեպքում համարվել է գործադիր մարմին: Այսպիսով, աշխատակազմի քարտուղարին Կարինե Ֆիդանյանին հիշյալ պաշտոնին նշանակելու մասին կարգադրություն կազմելու հանձնարարություն տալով եւ հիմք ընդունել ավագանու N 38 որոշումը ՝ Ֆիդանյանի հետ կնքելէ անժամկետ պայմանագիր: Թե արվեստի դպրոցի եւ թե մանկապարտեզի տնօրենի պաշտոններում Ֆիդանյանը աշխատել է մինչեւ մինչև 2018 թվականի հուլիսի 11-ը. «Արդյունքում խաթարվել է պետության օրինական շահը, էական վնաս պատճառվել դրան, խախտվել կոնկրետ պաշտոնում դրա անձնագրին համապատասխանող անձի աշխատանքի անցնելու պարտադիր պայմանը: Այսինքն՝ Զարզանդ Գրիգորյանին մեղսագրվում է ՀՀ քրեական օրենսգրքի 308-րդ հոդվածի 1-ին մասով նախատեսված հանցավոր արարքի կատարում»,- նշվածէ դատական տեղեկատվական համակարգում:

Հիշեցնենք, որ օրեր առաջ մեր զրույցում Զարզանդ Գրիգորյանի պաշտպան Հովսեփ Սարգսյանն ասել էր, որ Գրիգորյանը առաջադրված մեղադրանքում իրեն մեղավոր չի ճանաչել: Ըստ պաշտպանի՝ նկարագրված արարքներում խախտում կա, բայց ամեն խախտում չէ, որ քրեորեն հետապնդելի արարք է: