Դատարանը մերժեց Ալեքսան Պետրոսյանի գործով մեղադրանքը պաշտպանող դատախազին վարույթից հեռացնելու միջնորդությունը

Երեւանի ընդհանուր իրավասության դատարանի Ավան եւ Նոր Նորք նստավայրում դատավոր Վարդան Գրիգորյանի նախագահությամբ այսօր շարունակվեց «ՄԱՊ»-ի Ալիկ անունով հայտնի Ալեքսան Պետրոսյանի գործով դատական նիստը:

Պետրոսյանը դատական նիստին մասնակցում էր: Դատարանում էր նաեւ նրա որդին՝ Մակար Պետրոսյանը, որը նույն քրեական գործի՝ նախաքննության փուլում գտնվող մայր գործով ունի մեղադրյալի կարգավիճակ: Հայր եւ որդի Պետրոսյանները մեղադրվում են 38-190-րդ հոդվածի 3-րդ մասի 1-ին կետով՝ փողերի լվացմանն օժանդակելու համար: Ըստ մեղադրանքի՝ նրանք օժանդակել են Բնապահպանության նախկին նախարար, հետախուզման մեջ գտնվող Արամ Հարությունյանին:

Այսօրվա դատական նիստի սկզբում ամբաստանյալ Ալեքսան Պետրոսյանի պաշտպանները բացարկի միջնորդություն ներկայացրին մեղադրող դատախազ Հայկ Պետրոսյանին: Միջնորդության հիմքում պաշտպանները դրեցին դատախազի ենթադրյալ կողմնակալության հանգամանքը՝ միաժամանակ նշելով, որ քրեական գործի նախաքննության փուլում դատավարական պատշաճ ընթացակարգ չի պահպանվել. «Քրեական դատավարության օրենսգրքի 190-րդ հոդվածի համաձայն՝ Գլխավոր դատախազն իրավունք ունի ցանկացած քրեական գործ վերցնել քննչական մի մարմնից եւ հանձնել ՀՔԾ վարույթին, այս գործը ի սկզբանե հարուցվել է ՀՔԾ-ում, հանձնվել է ՀՔԾ քննիչներին, եւ դատավարական այդ կարգը չի պահպանվել պաահովելու համար գործի օբյեկտիվ, բազմակողմանի քննությունը»: Ըստ պաշտպանների՝ քրեական գործը չպետք է քններ ՀՔԾ քննիչը, հետեւաբար, այդ գործով դատավարական հսկողությունը չպիտի իրականացներ Դատախազության ՀՔԾ մինչդատական վարույթի նկատմամբ հսկողություն իրականացնող վարչությունը, ըստ այդմ, այդ վարչության ավագ դատախազ Հայկ Պետրոսյանը: Պաշտպաններն ընդգծեցին, որ իրենք կասկածի տակ չեն դնում դատախազի մասնագիտական հատկանիշները, բայց եթե գործն ի սկզբանե քննվեր ճիշտ մարմնում, նա հսկողություն չէր կարող իրականացնել եւ այժմ էլ չի կարող դատարանում մեղադրանքը պաշտպանել: Ինչ վերաբերում է դատախազի կանխակալ վերաբերմունքին, ըստ պաշտպան Գոռ Միքայելյանի, դա դրսեւորվել է նրանում, որ դատախազը նախ մերժել է իրենց միջնորդությունը՝ Ալեքսան Պետրոսյանի նկատմամբ քրեական հետապնդումը դադարեցնելու եւ քրեական գործը կարճելու մասին, եւ բացի այդ, անտեսել է պաշտպան Միհրան Պողոսյանի խնդրանքը՝ նրան չուղարկելով մեղադրական եզրակացությունը:

Միանալով միջնորդությանը՝ Ալիկ Պետրոսյանի մյուս պաշտպան Միհրան Պողոսյանն էլ հավելեց, որ Քրեական օրենսգրքի 190-րդ հոդվածով հարուցված քրեական գործով նախաքննությունն իրականացնող մարմինը ոչ թե ՀՔԾ-ն է, այլ ԱԱԾ-ն. «Բայց օրենքը նախատեսել է Գլխավոր դատախազի բացառիկ լիազորություն՝ այլ քննչական մարմիններում քննվող քրեական գործերը, այդ թվում՝ 190-րդ հոդվածով հարուցված քրեական գործերը, վերցնել եւ հանձնվել ՀՔԾ-ին, ինչը տվյալ դեպքում չի արվել»,- նշեց Պողոսյանը՝ պնդելով, որ Հայկ Պետրոսյանը չի կարող սույն գործով պատշաճ դատախազ հանդիսանալ:

Ամբաստանյալ Ալեքսան Պետրոսյանն էլ հայտարարեց, որ մարդկային առումով դեմ կլիներ Հայկ Պետրոսյանի՝ վարույթից հեռացվելուն, սակայն հաշվի առնելով իրավական հիմքերը՝ միացավ իր պաշտպանների միջնորդությանը:

Միջնորդության դեմ, սակայն, դատախազն առարկեց՝ այն որակելով անհիմն: Պետրոսյանի խոսքով՝ եթե կողմնակալ վերաբերմունք են նկատել, ապա դա եղել է պաշտպանական կողմի հանդեպ միմիայն հարգանքի տեսքով: Ինչ վերաբերում է այն փաստարկին, որ պաշտպանը մեղադրական եզրակացություն է խնդրել, եւ ինքը չի տրամադրել, Պետրոսյանն ասաց, որ տեղում ստուգելով իր էլեկտրոնային հասցեն՝ համոզվեց, որ առկա է գրագրություն՝ մեղադրական եզրակացությունը ուղարկելու վերաբերյալ: Անդրադառնալով պաշտպանական կողմի իրավական փաստարկներին, թե Գլխավոր դատախազը պետք է գործը այլ քննչական մարմնից վերցնելով հանձներ ՀՔԾ-ին, մեղադրող դատախազը նշեց, որ դա ընդամենը բառախաղ է. «Այդ օրենքի հիմնական իմաստն այն է, որ դատախազին իրավունք  է վերապահվում որոշել քրեական գործի նախաքննության ընդհատությունը, եւ պարտադիր չէ, որ քրեական գործը գտնվի այլ մարմնի քննիչի վարույթում, որպեսզի հանձնվի ՀՔԾ քննիչին»: Հայկ Պետրոսյանի խոսքով՝ եթե անգամ այդպես լիներ, ապա ԱԱԾ մինչդատական վարույթի նկատմամբ հսկող վարչության դատախազը ՀՔԾ-ում քննված քրեական գործով դատարանում մեղադրանք պաշտպանել չի կարող:

Լսելով կողմերին՝ նախագահող դատավորը հեռացավ խորհրդակցական սենյակ, որտեղից կարճ ժամանակ անց վերադառնալով՝ որոշեց մերժել միջնորդությունը: Այդպիսով, դատարանն անցավ բուն դատաքննությանը: