Շախմատ, շաշկի, նարդի. Հայաստանում տարեցները կմրցեն, խաղերին կմասնակցեն նաեւ արցախցիները

Հայաստանում ամռանը տարեցների մրցույթ կանցկացվի, որին կմասնակցեն նաեւ Արցախում ապրողները: «Տարեցների հանրապետական խաղեր»-ը կազմակերպում է ՀՀ կրթության, գիտության, մշակույթի եւ սպորտի նախարարությունը: Արայիկ Հարությունյանն արդեն ստորագրել է համապատասխան հրամանը:

Հաղթող տարեցները պարգեւատրվելու են մեդալներով, դրամական մրցանակներով, իսկ ամենատարեց մասնակիցները՝ հուշանվերներով: Խաղերին կարող են մասնակցել 63-ից բարձր տարիք ունեցող թոշակառուները, բայց նրանք պարտադիր պետք է ունենան բժշկի թույլտվություն:

Մրցույթի մասնակիցների թիվը սահմանափակ է լինելու: ՀՀ յուրաքանչյուր մարզից կարող են մասնակցել ընդամենը 10 մասնակից եւ 1 ներկայացուցիչ, ընդ որում, հավասար սեռային բաշխմամբ՝ 5 տղամարդ եւ 5 կին: Խաղերն անցկացվելու են 5 մարզաձեւերից՝ շախմատ, շաշկի, նարդի (կարճ), բասկետբոլի գնդակի նետում զամբյուղի մեջ եւ դարթս (տեգախաղ): Յուրաքանչյուր մասնակից իրավունք ունի մասնակցելու միայն մեկ մարզաձեւում:

Խաղերն անցկացվելու են երեք փուլով՝ համայնքային, մարզային եւ հանրապետական:

1-ին փուլի անցկացման պատասխանատվությունը կրում են քաղաքային եւ գյուղական համայնքները:

2-րդ փուլի կազմակերպման եւ անցկացման անմիջական պատասխանատվությունը կրում են ՀՀ մարզպետարանների, Երևանի քաղաքապետարանի, Արցախի կրթության, գիտության եւ սպորտի նախարարության համապատասխան վարչություններն ու բաժինները:

Եզրափակիչ փուլի անցկացման պատասխանատվությունը կրում է ԿԳՄՍՆ-ի հաստատած մրցավարական հանձնաժողովը:

1-ին փուլը համայնքներում անցկացվելու է հուլիսին: Հստակ օրերը դեռ հայտնի չեն: 2-րդ փուլը կլինի օգոստոսի 15-25-ը՝ ՀՀ մարզերում, Երեւան քաղաքում եւ Արցախի Հանրապետությունում, իսկ եզրափակիչ՝ 3-րդ հանրապետական փուլը, անցկացվելու է սեպտեմբերի 28-ից հոկտեմբերի 1-ը, Ծաղկաձոր քաղաքում:

Խաղերի 1-ին փուլի մրցումներին առանձին մարզաձեւերից 1-ին, 2-րդ, 3-րդ տեղերը գրաված տարեցները պարգեւատրվելու են համայնքապետարանների համապատասխան կարգի հավաստագրերով: 2-րդ փուլի մրցումներին առանձին մարզաձեւերից 1-ին, 2-րդ, 3-րդ տեղերը գրաված տարեցները պարգեւատրվելու են նախարարության համապատասխան կարգի հավաստագրերով: 3-րդ եզրափակիչ փուլի առանձին մարզաձեւերից 1-ին, 2-րդ, 3-րդ տեղերը գրաված տարեցները պարգեւատրվելու են նախարարության համապատասխան կարգի հավաստագրերով, մեդալներով եւ դրամական մրցանակներով, իսկ ամենատարեց մասնակիցները կստանան հուշանվերներ:

Արդյունքներն ամփոփվելու են խաղերի ավարտից անմիջապես հետո: 1-ին, 2-րդ, 3-րդ տեղերը գրաված մարզերը պարգեւատրվելու են հավաստագրերով, գավաթներով, շնորհակալագրերով: Կլինեն նաեւ անհատական դրամական մրցանակներ. 1-ին տեղի համար՝ 95 հազար դրամ, 2-րդ տեղի՝ 85 հազար, 3-րդ տեղ՝ 70 հազար:

Բժշկական օգնության եւ սպասարկման կազմակերպում, գովազդային նյութերի պատրաստում, նկարահանում, տրանսպորտային ծախսեր, գրենական պիտույքներ. այս ամենը հոգալու է նախարարությունը: Խաղերի ծախսերը կիրականացվեն տարեկան պետական բյուջեով նախատեսված ծրագրի շրջանակում:

«Տարեցների հանրապետական խաղերն» անցկացվում են 2017 թվականից: Նպատակն է տարեց բնակչության առողջության ամրապնդումը, առողջ ապրելակերպի ձեւավորման գործում ֆիզիկական կուլտուրայի եւ սպորտի դերի բարձրացումը, ինչպես նաեւ առանձին տեղերում բնակչության ակտիվ հանգստի կազմակերպումը: