10 փաստ լեգենդար Քոբի Բրայանթի մասին

Աշխարհը շարունակում է սգալ լեգենդար բասկետբոլիստ Քոբի Բրայանթի մահը: NBA-ը հետաձգել է «Լոս Անջելես Լեյքերսի» ու «Լոս Անջելես Քլիփերսի» հանդիպումը, որը պետք է տեղի ունենար այսօր: Երկրպագուները չեն մխիթարվում: Մարզական եւ ոչ մարզական պարբերականները ողջ աշխարհում անդադար գրում են նրա մասին, նրան հրաժեշտի խոսք են ասում ու ընտանիքին ցավակցություն են հայտնում քաղաքական գործիչներ, այդ թվում՝ ԱՄՆ նախագահ Դոնալդ Թրամփն ու նախկին նախագահ Բարաք Օբաման, հոլիվուդյան աստղեր, օրինակ՝ Քիմ Քարդաշյանն ու Վիկտորիա Բեքհեմը, ճանաչված ֆուտբոլային ակումբներ ու ֆուտբոլիստներ, այդ թվում՝ «Ռեալը», «Բարսելոնան», Լիոնել Մեսսին, որը նրա հետ մոտ է եղել, Կրիշտիանու Ռոնալդուն, Իկեր Կասիլյասը, թենիսիստներ Նովակ Ջոկովիչը, Ռաֆայել Նադալը, բասկետբոլի նրա գործընկերները եւ այլք: Բոլորի ուղերձը մեկն է՝ լեգենդները չեն մահանում:

Իր կարիերայի ընթացքում բասկետբոլում եւ դրանից դուրս այդ լեգենդն աչքի է ընկել տարբեր պատճառներով: Համաշխարհային մամուլում առանձնացնում են դրանցից մի քանիսը, որոնցով մարզիկը հայտնի է, եւ որոնք ինչ-որ հետք են թողել նրա կյանքի ու կարիերայի վրա:

1. Օրինակ՝ հայտնի է, որ նրան ծնողները Քոբի անունը տվել են ճապոնական հայտնի մսի տեսակի անունով՝ Kobe, որը ճանաչված է իր փափկության ու նրբության համար:

2. Նա եղել է NBA-ի պատմության առաջին բասկետբոլիստը, որն այնտեղ հայտնվել է անմիջապես ավագ դպրոցից: Դա տեղի է ունեցել 1996 թ., երբ Բրայանթը 17 տարեկան է եղել: Նա հայտնվել է «Լոս Անջելես Լեյքերսում»:

3. Բրայանթը ստիպված է եղել ընտրություն կատարել ֆուտբոլի ու բասկետբոլի միջեւ: Բասկետբոլ սկսել է խաղալ 3 տարեկանից, սակայն մանուկ հասակում հետաքրքրվել է նաեւ ֆուտբոլով, երկրպագել է իտալական «Միլանին»: Իտալիայում ապրելու տարիներին նա կարող էր ֆուտբոլիստ դարձած լինել, եթե չդիտեր NBA-ի հանդիպումները:

4. Նրա հայրը նույնպես բասկետբոլիստ է եղել եւ խաղացել է NBA-ում:

5. Ամերիկացի մարզիկը մաքուր խոսել է նաեւ իտալերենով եւ իսպաներենով:

6. Իր մականունն ընտրել է հենց ինքը՝ Սեւ Մամբա: Այդպես որոշել է Քվենտին Տարանտինոյի «Սպանել Բիլին» ֆիլմը դիտելուց հետո: Սեւ Մամբան գլխավոր հերոսուհու մականունն է:

7. Նրան մեղադրել են բռնաբարության մեջ: 2003 թ.՝ ամուսնությունից 2 տարի անց, նրան մեղադրել է հյուրանոցի աշխատակցուհին: Բասկետբոլիստն ընդունել է, որ նրանց միջեւ ինչ-որ բան եղել է, սակայն հերքել է, որ ոտնձգություն է արել նրա նկատմամբ: Սա մեծ աղմուկ է բարձրացրել մամուլում եւ բացասական ազդեցություն ունեցել նրա վարկանիշի վրա: Մի քանի ճանաչված կազմակերպություններ, այդ թվում՝ McDonald’s-ն ու Nutella-ն, խզել են նրա հետ ունեցած պայմանագրերը: Դատական գործը հետագայում իր լուծումն ստացել է դատարանի պատերից դուրս:

8. 2006 թ. հունվարի 22-ին «Տորոնտոյի» դեմ խաղում նա 81 միավոր է հավաքել: Սա 2-րդ արդյունքն է NBA-ում: Ավելի շատ միավոր 1 խաղում միայն Ուիլթ Չեմբերլենն է հավաքել՝ 100: Իր ողջ կարիերայի ընթացքում Բրայանթը վաստակել է 33 643 միավոր, եւ սա 4-րդ ցուցանիշն է NBA-ի պատմության մեջ: Երկար տարիներ նա 3-րդն էր, սակայն իր մահվան հենց նախօրեին «Լեյքերսի» մեկ այլ հանրահայտ բասկետբոլիստ՝ Լեբրոն Ջեյմսը, գերազանցեց նրան: Հենց այդ մասին է Բրայանթի վերջին գրառումը «Թվիթերում». «Շարունակում ես առաջ տանել խաղը: Հարգանքներս, եղբա՛յր»,- գրել է Բրայանթը:

9. Նա 20 տարի՝ մինչեւ 2016 թ., հանդես է եկել «Լեյքերսի» կազմում: NBA-ի 5-ակի չեմպիոն է (2000, 2001, 2002, 2009 եւ 2010 թթ.): ԱՄՆ թիմի կազմում օլիմպիական կրկնակի չեմպիոն է: Ոսկի նվաճել է Պեկին 2008-ում ու Լոնդոն 2012-ում:

10. Կարիերան ավարտելուց հետո (2016 թ.) մանկական գրքեր է գրել ու մուլտֆիլմ է նկարահանել: «Սիրելի բասկետբոլ» կոչվող մուլտֆիլմի տեքստը հենց ինքն է կարդացել: 2018 թ. դրա համար «Օսկարի» է արժանացել «Լավագույն անիմացիոն կարճամետրաժ ֆիլմ» անվանակարգում: Նա դարձել է առաջին նախկին պրոֆեսիոնալ մարզիկը, որը երբեւէ նոմինացվել է «Օսկարի» կամ ստացել այն:

«Սիրելի բասկետբոլ»

41-ամյա Բրայանթի մասնավոր ուղղաթիռը կործանվել է հունվարի 26-ին: Նրա հետ զոհվել է եւս 8 անձ, այդ թվում՝ նրա 13-ամյա դուստրը՝ Ջիանան: Նշվում է, որ Բրայանթը հաճախ է օգտվել մասնավոր ինքնաթիռից: Ինչպես հաճախ, այս անգամ էլ օդաչուն եղել է ազգությամբ հայ Արա Զոբայանը, որին մամուլը ներկայացնում է՝ որպես փորձառու օդաչու: Ըստ լրատվամիջոցների՝ թռիչքից առաջ մառախուղ է եղել, եւ Զոբայանն այդպիսի եղանակային պայմաններում թռիչքի թույլտվություն ստացել է: Ընթացքում նա օգնություն է խնդրել, սակայն շուտով անհետացել է: Րոպեներ անց բնակիչներն ահազանգել են վթարի մասին: Իրավապահ մարմինները դեպքի վայրում շարունակում են աշխատանքները:

Բրայանթն ու Վանեսան պայմանավորվածություն են ունեցել, որ միասին նույն ուղղաթիռով չեն թռչի:

Բրայանթն ամուսնացած էր: Նա ու կինը՝ Վանեսան, բացի Ջիանայից, եւս 3 դուստր ունեն: Բասկետբոլիստի հուղարկավորության մասին մանրամասներ դեռ չեն ներկայացվում: Այս օրերին մինչդեռ մամուլը շարունակաբար թարմացնում է եղած տեղեկատվությունը, բասկետբոլիստի երկրպագուները ծաղիկներ են տանում Լոս Անջելեսի Staples Center մարզհամերգային համալիր, որտեղ «Լեյքերսն» անցկացնում է իր տնային խաղերը:

Տպել
939 դիտում

Արցախն այդպիսի ընտրությունների արժանի չէ. քաղաքագետի համոզմամբ՝ խաղից դուրս մնացածներն ու 2-րդ փուլ անցածները կբանակցեն

Անցկացվել են մարտական հերթապահության նախապատրաստման գործնական պարապմունքներ մարտական հերթափոխի մեկնող զինծառայողների հետ

Հայաստանի ֆուտբոլի ազգային հավաքականի գլխավոր մարզիչ Խոակին Կապառոսը խոսել է կատարած աշխատանքի եւ ապագա ծրագրերի մասին

Վրաստանը բեռնատարների տեղաշարժի վերաբերյալ ուղեցույց է հրապարակել. ՊԵԿ

ՏՄՊՊՀ-ն ներկայացրել է կոճապղպեղի թանկացման ուսումնասիրության ընթացիկ արդյունքները

Վարչապետի գլխավորությամբ քննարկվել են տարբեր գյուղմթերքների արտադրության խթանման հետագա քայլերը

Կորոնավիրուսի հաղթահարման ֆինանսական աջակցության հաշվի մուտքերը կազմել են 864664835.7 դրամ

Սահմանափակվել է դիմակների, վիրակապերի, բամբակի եւ այլ բժշկական ապրանքների արտահանումը ՀՀ-ից․ պարետի որոշումը

Արցախում առ այսօր նոր կորոնավիրուսային վարակի (COVID-19) դեպք չի գրանցվել

Որոշ դեպքերում կարող է համարվել, որ պարապուրդը գործատուի մեղքով է, ոչ թե՝ արտակարգ իրավիճակով պայմանավորված

Դեսպանությունը մշտական կապի մեջ է Իսրայելում գտնվող ՀՀ քաղաքացի 9 ուսանողների հետ. Աննա Նաղդալյան

ԱԺ-ն 42 համակարգիչներ փոխանցեց Գեղարքունիքի մարզի 4 եւ ավելի դպրոցահասակ երեխա ունեցող ընտանիքների. Արարատ Միրզոյան

Գործնական պարապմունք է անցկացվել հրետանային զորամասում. ՊՆ

28-ամյա մասիսցու բնակարանից ու մեքենայից ապօրինի զենք-զինամթերք է հայտնաբերվել (տեսանյութ)

Վազքուղի, հանդերձարան, փողոց, մայթ , այգի․ սուբվենցիոն ծրագրով Վանաձորում իրականացվելիք ծրագրերը հաստատված են

Արցախյան ընտրությունների կարեւորագույն արդյունքը

ՀՀ տարածքում ավտոճանապարհները հիմնականում անցանելի են. ԱԻՆ

Ծանրամարտի միջազգային ֆեդերացիան ապրիլի 2-րդ կեսին կորոշի օլիմպիական խաղերին որակավորվելու կարգը. Риа новости

Մոսկվայի «Դոմոդեդովո»-ում մնացած ՀՀ 25 քաղաքացիներից 18-ն իրենց ցանկությամբ տեղափոխվել են հյուրանոց. ՀՀ ԱԳՆ

ԱԻՆ-ը մասնակցում է բնակչության տեղաշարժի վերահսկմանը (տեսանյութ)