Լոռիում սեփական եկամուտների հավաքագրումները նախորդ տարի աննախադեպ աճ են գրանցել, առաջատարը Ծաղկաբերն է. փոխմարզպետ

Լոռիում սեփական եկամուտների հավաքագրումը նախորդ տարի գերազանցել է բոլոր սպասելիքները: Այս մասին ՀԺ-ի հետ զրույցում ասաց Լոռու մարզպետի տեղակալ Գայանե Մարկոսյանը:

Փոխմարզպետի խոսքով՝ իրենք ուսումնասիրել են վերջին տարիներին մարզի համայնքների հավաքագրումների պատկերը, ինչն էլ ապացուցել է, որ հավաքագրումներն ավելին են. «Հավաքագրումների նման պատկերը մեզ համար նաեւ սպասված էր, քանի որ ողջ տարի տքնաջան աշխատանք ենք տարել համայնքնապետերի ու տարբեր կառույցների հետ, որպեսզի հնարավորինս բյուջեի հավաքագրման ցուցանիշը բարձր լինի, ու նախորդ տարիների նման չհայտնվենք մարզերի համեմատական ցուցանիշների վերջին հորիզոնականներում»,- ասաց փոխմարզպետը՝ նշելով, որ թեպետ այս պահին մարզերի համեմատականը դեռ պաշտոնապես չի հայտարարվել, իրենք արդեն իսկ տեղեկություններ ունեն, որ հավաքագրումների առումով Լոռին առաջին հնգյակում է:

Սեփական եկամուտների հավաքագրումը 2018թ-ի նկատմամբ կազմել է 110.3 տոկոս՝ արձանագրելով 10.3 տոկոս աճ: «Հողի հարկի հավաքագրումը ամեն տարի մեզ մոտ նվազման տենդենց էր արձանագրում, ու այս տարի առաջին անգամ աճ ենք ունեցել: Աճ ունենք գրեթե բոլոր հարկատեսակների գծով: Մի փոքր կաղում է հողի եւ գույքի վարձակալության ցուցանիշը»,- ասաց Գայանե Մարկոսյանը:

Ըստ փոխմարզպետի՝ նախորդ տարիներին մարզն ունեցել է 4 բաժնով դասակարգված համայնքներ՝ մինչեւ 60, մինչեւ 80, մինչեւ 100 եւ 100 տոկոսից ավելի հավաքագրումներ ապահոված համայնքներ, մինչդեռ 2019թ-ին այս համամասնությունը բավականին փոխվել է: Մինչեւ 60 տոկոս հավաքագրումներ ապահովված համայնքներ մարզում չկան. «Մինչեւ 80 տոկոս հավաքագրում ապահովել են Ձորագյուղ եւ Հալավար համայնքները, 90-99 տոկոս հավաքագրում ապահովել են 12 համայնքներ, իսկ մարզի 56 համայնքից 46-ը ապահովել են 100 տոկոսի եւ ավելի հավաքագրումներ»:

Լավագույն ցուցանիշ ապահովել է Ծաղկաբեր համայնքը՝ 128.9, Լոռի Բերդ համայնքը՝ 124.6, Արեւաշողը՝ 121.8 տոկոս ցուցանիշ:

Հարցին, թե ինչով է պայմանավորված հավաքագրումների նախորդ տարվա նման աճը, երբ բազմաթիվ համայնների ղեկավարներ տարիներ շարունակ տարբեր պատճառաբանություններ են նշել՝ կապված ցածր ցուցանիշների հետ՝ սկսած բնակչության՝ համայնքներում չլինելուց մինչեւ անվճարունակ լինելը, փոխմարզպետը պատասխանեց. «Գյուղապետերի՝ նախկինում բերած պատճառաբանությունների մի մասը չեզոքացվեց մեր կողմից այն հիմնավորմամբ, որ կամ պատճառաբանությունը պետք է լինի հիմնավոր եւ փաստարկված, կամ եթե չկա հիմնավոր ու փաստարկված պատճառաբանություն, համայնքապետը պետք է եւ պարտավոր է կատարել իր պարտադիր լիազորությունները եւ պետք է բյուջեն հավաքի, որպեսզի կարողանա իր համայնքում ծրագրեր իրականացնել, փոփոխություններ անել»:

Փոխմարզպետն ասում է՝ հավաքագրումները մեծ կապ ունեն նաեւ սուբվենցիոն ծրագրերի իրականացման մեջ. «2019թ-ին մենք 56 սուբվենցիոն ծրագիր ենք իրականացրել, 2018թ-ի 26-ի դիմաց: Այս տարի մենք ակնկալում ենք, որ այդ ծրագրերը կլինեն շատ ավելի մեծ: Բնակիչները պատրաստակամ են վճարել, եթե տեսնում են, որ իրենց համայնքում ինչ-որ բան է արվում»:

Մարզպետի տեղակալն ասում է՝ տարիներ շարունակ հավաքագրումների ոլորտում եւս գործել է խնամի-ծանոթ-բարեկամ սկզբունքը, որի դեմ ներկայումս լուրջ պայքար է տարվում. «Ունեցել ենք բազմաթիվ համայնքներ, երբ համայնքապետերը ուղղակի զիջել են հարկերը իրենց ծանոթ բարեկամներին այն դեպքում, երբ իրենց բարեկամը թանկարժեք մեքենա է ունեցել: Այս տարի մենք ամենայն մանրամասնությամբ հետեւել ենք նաեւ այդ գործընթացին, ու 2020թ-ի հունվարից, մարզպետի հանձնարարականով, հատ առ հատ  ուսումնասիրվելու են համայնքներից եկող ավագանիների որոշումները, որպեսզի հնարավորինս բացառենք նմանատիպ դեպքերը»:

Ինչ վերաբերվում է խոշոր հարկատուներին, որոնք եւս տարիներ շարունակ համայնքներին չէին վճարում հարկերը, փոխարենը գործունեություն էին ծավալում, մարզպետի տեղակալն ասաց. «Մենք նախ պահանջել ենք, որ մեզ տրամադրեն խոշոր հարկատուների ցանկը, եւ մենք էլ ենք աշխատում այդ ուղղությամբ: Մենք պատրաստ ենք անմիջականորեն աշխատել այդ մարդկանց հետ, բայց դեռ աշխատելու տեղեր ունենք»:

«Այս տարի մենք ունեինք շատ լավ համայնքներ, որոնց կատարած հավաքագրումները իրենց թույլ տվեցին համայնքում 5-6 ծրագիր անել:  Ախթալան ու Լոռի Բերդ համայնքներն արժանացան մարզպետի շնորհակալագրին՝ ակտիվության ու ծրագրերը հաջողությամբ անելու համար, ինչը չեմ կարող ասել Վանաձորի մասին, որը թեպետ ծրագրերի մեծ թիվ ուներ, սակայն նրանց մեծ մասը ձախողեց»,- հավելեց փոխմարզպետը: