ՀՀ-ի համար աշխարհի առաջնություններ են սկսվում 4 մարզաձեւից. ի՞նչ կանեն հունահռոմեականներն առանց Ջուլֆալակյանի

Ըմբշամարտի աշխարհի 2019թ. առաջնությունն ինչ-որ առումով անսովոր է լինելու հայկական մարզաշխարհի ու հատկապես հունահռոմեական ըմբիշների համար: Այս տարի նրանք այդ մրցաշարին մասնակցելու են առանց Լեւոն Ջուլֆալակյանի, որը 20 տարի ՀՀ հունահռոմեական ոճի ըմշամարտի հավաքականը գլխավորելուց հետո շաբաթներ առաջ հրաժարական տվեց գլխավոր մարզչի պաշտոնից, եւ դա մեծ աղմուկ բարձրացրեց: Ընտրանին նույնն է, սակայն առանց մասնագետի, որի գլխավորությամբ տարիներ շարունակ այս մրցաշարից վերադառնում էր ոսկե մեդալներով: Թիմը հիմա պետք է ապացուցի, որ սկանդալներն ու տարաձայնությունները չեն ազդել ու ըմբիշները կարող են իրենց ողջ ներուժը դրսեւորել:

Ջուլֆալակյանը հեռացել է, սակայն նրա մարզչական շտաբը մնացել է՝ Գեւորգ Ալեքսանյան, Սամվել Գեւորգյան եւ Էդուարդ Սահակյան: Վերջինս ժամանակավորապես զբաղեցնում է գլխավոր մարզչի պաշտոնը: Նրա գլխավորությամբ են հունահռոմականները մասնակցելու 2019 թ. սեպտեմբերի 14-22-ը Ղազախստանի մայրաքաղաք Նուր-Սուլթանում կայանալիք մրցաշարին:

Հավաքականում ընդգրկված է 9 ըմբիշ: Նրանք են Նորայր Հախոյանը (55 կգ), Գեւորգ Ղարիբյանը (60 կգ), Սլավիկ Գալստյանը (63 կգ), Կարեն Ասլանյանը (66 կգ), Մալխաս Ամոյանը (72 կգ), Կարապետ Չալյանը (77 կգ), Մաքսիմ Մանուկյանը (82 կգ), Աթուր Շահինյանը (87 կգ) եւ Արթուր Ալեքսանյանը (97 կգ):

Ազատոճայինների կյանքում ոչինչ չի փոխվել: Նրանք առանց սկանդալների են պատրաստվում առաջնությանը: Մրցավայր կգնան Հաբեթնակ Կուրղինյանի գլխավորությամբ: Թիմում ընդգրկված են Արսեն Հարությունյանը (57 կգ), Վազգեն Թեւանյանը (65 կգ), Վարուժան Կաջոյանը (74 կգ), Գրիգոր Գրիգորյանը (79 կգ), Հովհաննես Մխիթարյանը (86 կգ) եւ Լեւան Բերիանիձեն (125 կգ):

Ընդհանրապես սեպտեմբերն ու հոկտեմբերի սկիզբը հայկական մարզաշխարհի համար հագեցած են աշխարհի առաջնություններով: Սեպտեմբերի 1-ին Ճապոնիայում ավարտվեց ձյուդոյի աշխարհի 2019 թ. առաջնությունը, որտեղ ՀՀ միակ մասնակից, Եվրոպայի չեմպիոն Ֆերդինանդ Կարապետյանը (-73 կգ) չկարողացավ պայքարել մեդալների համար: Առաջիկայում, բացի ըմբշամարտից, ՀՀ-ն մեդալների համար կպայքարի նաեւ բռնցքամարտի, ծանրամարտի եւ մարմնամարզության աշխարհի առաջնություններում:

Բռնցքամարտի մրցաշարն արդեն մեկնարկել է երեկ՝ սեպտեմբերի 9-ին, Ռուսաստանի Եկատերինբուրգ քաղաքում: Ավարտվելու է 21-ին: ՀՀ-ից մասնակցում է 8 մարզիկ: Նրանք են Արթուր Հովհաննիսյանը (52 կգ), Էրիկ Պետրոսյանը (57 կգ), Հովհաննես Բաչկովը (63 կգ), Կորյուն Աստոյանը (69 կգ), Արման Դարչինյանը (75 կգ), Արտուշ Հովհաննիսյանը (81 կգ), Հենրիկ Սարգսյանը (91 կգ) ու գերծանր քաշային Գուրգեն Հովհաննիսյանը: Դարչինյանն արդեն 1 հաղթանակ տարել է նախնական փուլում. նա հաղթել է անգլիացի Մարք Դիքինսոնին ու դուրս եկել 1/16 եզրափակիչ: Այսօր ռինգ դուրս կգա 81 կգ քաշային Արտուշ Հովհաննիսյանը: Նախնական փուլում նրա մրցակիցը Հոլանդիան ներկայացնող Արտյոմ Կասպարյանը:

Ծանրամարտի աշխարհի առաջնությունը տեղի կունենա թայլիանդական Պատայա քաղաքում: Կմեկնարկի սեպտեմբերի 18-ին: Կավարտվի 27-ին: Հայաստանը կներկայացնի 9 ծանրորդ: Նրանք են՝ Անդրանիկ Կարապետյանը (81 կգ), Հակոբ Մկրտչյանը եւ Դավիթ Հովհաննիսյանը (89 կգ), Սամվել Գասպարյանը (102 կգ), Սիմոն Մարտիրոսյանը (109 կգ) եւ գերծանր քաշայիններ Գոռ Մինասյանն ու Ռուբեն Ալեքսանյանը։

Մարմնամարզության աշխարհի առաջնությանը Հայաստանից կմասնակցի 3 հոգի: Նրանք են Հարություն Մերդինյանը (նժույգթափեր), Արթուր Դավթյանը (բազմամարտ) եւ Արթուր Թովմասյանը (օղակներ): Մրցաշարը տեղի կունենա Գերմանիայում՝ Շտուտգարտում: Կսկսվի հոկտեմբերի 4-ին: Կավարտվի 13-ին: