Կրակել, ապա դանակահարել է․ նոր հաղորդում Նարեկ Սարգսյանի եւ նախկին պատգամավոր Արթուր Մանուկյանի դեմ

Սերժ Սարգսյանի եղբորորդու՝ Նարեկ Սագսյանի եւ ԲՀԿ-ական նախկին պատգամավոր Աբրահամ Մանուկյանի որդու՝ Արթուր Մանուկյանի (Ծառուկյան խմբակցության նախկին պատգամավոր) դեմ նոր հաղորդում է ներկայացվել:

Հաղորդումը ներկայացվել է սույն թվականի մարտին: Այն ներկայացրել է գործով արդեն տուժող ճանաչված Հակոբ Հովհաննիսյանի (նա այլ գործով դատապարտյալ է,-հեղ․) ընկերը՝ Տիգրան Սարգսյանը: Մեր զրույցում Հովհաննիսյանի եղբայրը (նա չցանկացավ հրապարակել իր անունը) պատմեց, որ դեպքը տեղի է ունեցել 2012թ. դեկտեմբերի 23-ին. եղբայրը համակուրսեցու՝ Էրիկ Բալթայանի հետ գումարային խնդիր է ունեցել, վերջինս էլ դիմել է իր մորաքրոջ որդուն՝ նախկին պատգամավոր Արթուր Մանուկյանին: Խոսակցության մասին պարզաբանումներ ստանալու համար Հակոբ Հովհաննիսյանը ընկերների հետ գնացել է Երեւան քաղաքի Կողբացի փողոցում գտնվող գետնանցում, որտեղ գտնվող սենյակներից մեկում եղել են Արթուր Մանուկյանը, Նարեկ Սարգսյանը եւ վերջինիս թիկնապահները:

Տուժողի եղբայրը նշեց, որ խոսակցությունը վերածվել է վիճաբանության, ինչից հետո Նարեկ Սարգսյանն իր մոտ եղած ատրճանակով կրակել է Հակոբ Հովհաննիսյանի ուղղությամբ, սակայն կրակոցը նրան չի դիպել, որից հետո Նարեկ Սարգսյանն իր մոտ գտնվող կենցաղային դանակով հարվածել է Հակոբ Հովհաննիսյանի կրծքավանդակին՝ պատճառելով մարմնական վնասվածք։ «Մոտ երեք ժամ սահմանափակել են իր ազատությունը՝ փակելով սենյակի դուռը: Հետո Նարեկը հրահանգել ա իր անվտանգության աշխատակցին լվացվելու նպատակով դուրս հանի սենյակից: Այդ ընթացքում Հակոբը դիմել է փախուստի, սակայն, հասնելով «Մոսկվիչկա» սուպերմարկետի մոտ, ուժասպառ ա եղել, օգնության են հասել քաղաքացիները, շտապօգնություն եւ առաջին բուժօգնություն ցուցաբերելուց հետո հրաժարվել ա հիվանդանոց տեղափոխվել՝ հետագա քաշքշուկներից խուսափելու համար»,- պատմեց տուժողի եղբայրը՝ հավելելով, որ դեպքից հետո հաղորդում չեն ներկայացրել:

Հաղորդումը ներկայացվել է երկրում տեղի ունեցած թավշյա հեղափոխությունից հետո: «Հակոբի ընկերը, որն ականատես է եղել դեպքին, հասկանալով, որ հեղափոխություն է եղել ու նախկին իշխանությունը որեւէ դեր չի խաղա, այդ մասին հայտնել է ոստիկանություն»,- հավելեց մեր զրուցակիցը:

Դեպքի առթիվ հարուցվել է քրեական գործ՝ ՀՀ քրեական օրենսգքրի 131 հոդվածի 1-ին մասի հատկանիշներով (բռնության կամ բռնություն գործադրելու սպառնալիքի միջոցով մարդուն գաղտնի կամ բացահայտ առեւանգելը): Քրեական գործի նախաքննությունն իրականացնում է ՀՀ քննչական կոմիտեն: Հարուցված քրեական գործի շրջանակներում Հակոբ Հովհաննիսյանը տուժողի կարգավիճակ ունի, իսկ Արթուր Աբրահամի Մանուկյանը՝ վկայի:

Նախօրեին Հակոբ Հովհաննիսյանի մասնակցությամբ քննչական գործողություններ են իրականացվել: Նրա եղբայրը պատմեց, որ Հակոբ Հովհաննիսյանն առերեսվել է իր համակուրսեցու՝ Էրիկ Բալթայանի, ինչպես նաեւ ընկերոջ հետ: «Արթուր Մանուկյանի հետ առերես հարցաքննությունից հրաժարվել է, քանի որ փաստաբան չի ունեցել, հիմա ժամանակ է տրամադրվել, որպեսզի փաստաբան հատկացնեն, նոր մասնակցի քննչական գործողություններին»,- ասաց նա: Մեր հարցին՝ եղբայրը նախկինում Նարեկ Սարգսյանին ճանաչե՞լ է, նրա հետ որեւէ հարաբերություն ունեցե՞լ է, թե՞ ոչ, նա պատասխանեց, որ դեպքից հետո անընդհատ պատճառներ է փնտրել վրեժխնդիր լինելու համար:

Հակոբ Հովհաննիսյանը սեպտեմբերի 3-ին վաղակետ ազատ կարձակվի: «Իր ազատ արձակվելը ոչ մի կապ չունի Նարեկ դեմ տված հաղորդման հետ: Հակոբը նաեւ կոչով դիմում է իր ընկերներին (որոնք ականատես են եղել դեպքին,-հեղ.), որ դուրս գալուն պես հոգ կտանի բոլորի անվտանգության մասին»:

ՀՀ քննչական կոմիտեի դեպարտամենտի տեղեկատվության եւ հասարակայնության հետ կապերի բաժնի պետ Նաիրա Հարությունյանը մեր զրույցում ասաց, որ հարուցված քրեական գործի շրջանակներում դեռ կասկածյալներ կամ մեղադրյալներ չկան:

Նախկին պատգամավոր Արթուր Մանուկյանն էլ մեր զրույցում ասաց, որ վերոնշյալ տեղեկությունները իրականությանը չեն համապատասխանում: Մեր հարցին՝ դուք 2012 թվականին հանդիպե՞լ եք Հակոբ Հովհաննիսյանին եւ փորձել հարցեր պարզել, Մանուկյանը պատասխանեց. «Իհարկե ոչ, նման դեպք որ չի եղել, ես էնտեղ ինչ պետք է անեի»: Ճշտող հարցին՝ Էրիկ Բալթայանը ձեր բարեկա՞մը չէ, նախխկին պատգամավորն արձագանքեց. «Այդքանը, մնացածը․․․»: Հարցին՝ հարցաքննվե՞լ եք քրեական գործի շրջանակներում, Մանուկյանն արձագանքեց. «Դրա համար նույնիսկ դրսից ես թռել եկել եմ Հայաստան»: Մանուկյանը չցանկացավ պատասխանել դեպքի վերաբերյալ մեր այլ հարցերի:

Ալեքսանդր Սարգսյանի 37-ամյա որդին՝ Նարեկ Սարգսյանը գտնվում էր միջազգային հետախուզման մեջ։ Սարգսյանը դեկտեմբերի 6-ին ձերբակալվել է Պրահա 5 թաղամասում գտնվող բնակարաններից մեկում՝ Պրահայի տարածքային ոստիկանության քրեական հետախուզման բաժնի աշխատակիցների կողմից: Նա հիմա գտնվում է նախնական կալանքի տակ: Պրահայում հայտնաբերման պահին Նարեկ Սարգսյանը ներկայացրել է Գվատեմալայի քաղաքացու կեղծ անձնագիր՝ Ֆրանկլին Գոնսալեսի անհատական տվյալներով։ Ըստ ԱԱԾ ավելի վաղ տարածած հաղորդագրության՝ Նարեկ Սարգսյանին պատկանող բնակարանի խուզարկությամբ հայտնաբերվել են խոշոր չափի թմրանյութեր, ինչպես նաեւ զենք-զինամթերք:

Նարեկ Սարգսյանը որպես մեղադրյալ է ներգրավվել մեկ այլ դրվագով եւս՝ մարդ առեւանգելու եւ ծեծի ենթարկելու դեպքի առթիվ հարուցված քրեական գործի շրջանակում: