Մենք պատրաստ ենք օգնել, մենք ուզում ենք օգնել, որովհետեւ ձախողումը լինելու է բոլորինս. Զոհրաբյան

Մենք պատրաստ ենք օգնել, մենք ուզում ենք օգնել, որովհետեւ ձախողումը չի լինելու միայն խորհրդարանական մեծամասնության եւ կառավարության ձախողումը: Այս մասին այսօր Ազգային ժողովում կառավարության ծրագրի քննարկման ժամանակ ասաց ԱԺ «Բարգավաճ Հայաստան» խմբակցության պատգամավոր Նաիրա Զոհրաբյանը:

«Վերջերս խորհրդարանական մեծամասնության պատգամավորներից մեկը հայկական եթերներից մեկում խիստ վիրավորվեց, երբ իրեն իրազեկեցին, որ իրենք իշխանություն են: Տիկինը հեղափոխական վճռականությամբ հայտարարեց, որ իրենք իշխանություն չեն եւ նոր Հայաստանում իշխանությունը բացառապես եւ միայն ժողովուրդն է: Եւ խստորեն հորդորեց լրագրողին՝ իրենց հանկարծ իշխանություն չկոչել:

Տեւական ժամանակ սույն տիկինը սոցիալական ցանցերում դարձավ քննարկման թոփ թեմա: Հիմա արդեն պարզվում է` իզուր: Նա միանգամայն իրավացի էր: Որովհետեւ երեկ մենք քննարկում էինք կառավարության ծրագիրը, որի գաղափարախոսությունը, փիլիսոփայությունը, նպատակը տնտեսական հեղափոխությունն է, միանգամայն տրամաբանական նպատակ, քանզի քաղաքական հեղափոխության օրգանական շարունակությունը պիտի լիներ տնտեսական հեղափոխությունը:

Այս ամբիոնից մեզ ու ՀՀ բոլոր քաղաքացիներին բացատրեցին, որ տնտեսական հեղափոխություն մեր երկրում կլինի այն դեպքում, երբ յուրաքանչյուր քաղաքացի ինքը դառնա տնտեսական հեղափոխության պիոներն ու ակտիվիստը»,- ասաց Զոհրաբյանը:

Նա նշեց, թե համաձայն է վարչապետի այն մտքի հետ, որ ցանկացած հեղափոխություն իրականացնելու համար առաջին հերթին քաղաքացու մտքում եւ վարքագծում պետք է այդ հեղափոխությունը տեղի ունենա:

«Բայց կոնկրետ այս դեպքում առաջանում է մեկ, սակայն խիստ տրամաբանական հարց՝ ո՞րն է լինելու կառավարության գործառույթը եւ ի՞նչ, ե՞րբ, ինչպե՞ս եւ ինչ մեխանիզմներով եւ գործիքներով պիտի աշխատի կառավարությունը, որ նախանշած 2023 թվականին ունենանք աղքատության, գործազրկության նվազում, աշխատատեղերի եւ բարեկեցության աճ ու որպես արդյունք, ինչպես նշված է կառավարության ծրագրում, ազատ, արժանապատիվ ու շատ երջանիկ քաղաքացի:

Ներկայացված ծրագրում մինչդեռ չկա չափելի որեւէ ցուցանիշ, չկա գործողությունների ճանապարհային քարտեզ, չկան տարեկան ցուցանիշներ: Թվային ցուցանիշները մեր կապրիզը չէ: Դրանով կառավարությունն ինքն իր առջեւ նպատակներ է դնում, ստանձնում պարտավորություններ եւ հաշվետու լինում ժողովրդին: Կամ ինչպես եղել է նախկին բոլոր կառավարությունների ժամանակ` հաշվետու չի լինում եւ ընդամենը թքած է ունենում: Մինչդեռ նախանշված 2023 թվականը որքա՞ն է կրճատվելու գործազրկությունը, որքա՞ն է ավելանալու նվազագույն աշխատավարձն ու կենսաթոշակը, ի՞նչ պարբերականությամբ: Այս ամենի մասին լռություն է:

Երեկվա քննարկումից հետո ես հասկացա, թե ինչու չկան նախանշված շատ բարի, շատ արդար ու շատ մարդակենտրոն նպատակներին հասնելու ճանապարհային քարտեզ եւ գործիքակազմ: Որովհետեւ պարզվեց՝ ամեն ինչ կախված է քաղաքացու գենետիկ կոդից: Պատրա՞ստ է քաղաքացին փոխել իր տնտեսական վարքագիծը, թե` ոչ»,- ասաց ԲՀԿ-ական պատգամավորը:

Զոհրաբյանի խոսքով՝ դա կառավարությունը կանխատեսել չի կարող. «Որովհետեւ սա արդեն էզոտերիկ ոլորտից է, ինչը որեւէ մեկը գուշակել չի կարող: Հայաստանում, այո, պետական մակարդակով կոռուպցիա այլեւս չկա: Ամենանողկալի արատը, որը տասնյակ տարիներ քայքայել էր երկրի ողնաշարը` չկա կամ գրեթե չկա, որովհետեւ երկրի առաջին դեմքը կոռուպցիոներ չէ:

Հայաստանում մենաշնորհներ այլեւս չկան եւ կրկին նույն պատճառով, որ երկրի առաջին դեմքը կոռուպցիոներ չէ: Ու, եթե դուք կոռուպցիոներ լինեիք, պատկերացնո՞ւմ եք, թե ինչ վակխանալիա կտիրեր երկրում: Բայց արդյո՞ք համակարգային կոռուպցիայի եւ մենաշնորհների բացակայությունը բավարար է տնտեսական հեղափոխություն իրականացնելու համար: Ոչ` բավարար չէ:

Եւ արդյո՞ք կառավարության ներկայացրած ծրագիրը տանելու կամ բերելու է տնտեսական հեղափոխության: Իմ ողջ լավատեսությամբ եւ մեծ ցանկությամբ հանդերձ` ոչ: Եւ խնդիրը միայն թվերի ու չափելի ցուցանիշների բացակայությունը չէ: Հիմնական խնդիրը, ըստ իս, այն է, որ կառավարության ծրագրի այս նախագիծը որեւէ ռազմավարական եւ հայեցակարգային հենք չունի եւ չի տալիս ամենակարեւոր հարցի պատասխանը՝ Ինչպիսի՞ մոդելի տնտեսություն է ունենալու Հայաստանը առաջիկա 5 տարիներին: Եւ ամենակարեւոր հարցը՝ ո՞վ է լինելու տնտեսական հեղափոխության պատասխանատուն, մնում է օդում կախված:

Օդում կախված է մնում նաեւ հարցը՝ ի՞նչ է լինելու, եթե ՀՀ քաղաքացին իր մտքում հրաժարվում է անել տնտեսական հեղափոխություն եւ հրաժարվում է դառնալ տնտեսական հեղափոխության ակտիվիստն ու պիոները:

Գագիկ Ծառուկյանը երեկ ներկայացրեց այն հիմնական թիրախներն ու մեխանիզմները, որոնք կարող են ապահովել տնտեսական հեղափոխությունը: Մենք պատրաստ ենք օգնել, մենք ուզում ենք օգնել, որովհետեւ ձախողումը չի լինելու միայն խորհրդարանական մեծամասնության եւ կառավարության ձախողումը: Լինելու է բոլորիս` մեզանից յուրաքանչյուրի եւ ՀՀ յուրաքանչյուր քաղաքացու ձախողումը:

Քաղաքական մեծամասնության տնտեսական հանձնաժողովի նախագահը անկեղծորեն խոստովանեց, որ ներկայացված ծրագիրը զգուշավոր է: Համաձայն եմ, զգուշավոր է` այն էլ շատ: Բայց ծրագրի հռչակած նպատակը տնտեսական հեղափոխությունն է: Աշխարհում ինձ հայտնի չեն զգուշավոր եւ վախվորած հեղափոխություններ` այդ թվում տնտեսական: Որովհետեւ գոնե ինձ ու իմ նման բազմաթիվ մտածողների համար զգուշավորությունը ցանկացած հեղափոխության հականիշն է»,- եզրափակեց Զոհրաբյանը: