Մանկապարտեզի ձերբակալված տնօրենի առողջական վիճակը գիշերը վատացել է, նրան տեղափոխել են հիվանդանոց

Մանկապարտեզի երեխաներին տրամադրվող սննդի մի մասը յուրացնելու, տարբեր հաստիքներում իր ծանոթներին ու մտերիմներին գրանցելու, նրանց աշխատավարձերից շուրջ 13 միլիոն հափշտակելու մեջ կասկածվող Երեւանի «Լապտերիկ» մանկապարտեզի տնօրեն Գայանե Հովհաննիսյանը երեկ գիշերը վատացել է: Նրա համար շտապօգնություն է հրավիրվել ՁՊՎ եւ բժիշկի որոշմամբ՝ տեղափոխվել քաղաքացիական հիվանդանոց:

Այս մասին այսօր մեր զրույցում ասաց նրա պաշտպան Վահե Մնացականը՝ հավելելով, որ իր վստահորդը լուրջ առողջական խնդիրներ ունի:

Գայանե Հովհաննիսյանը ձերբակալվել է հունվարի 21-ին. դա մեծ աղմուկ բարձրացրեց հատկապես այն բանից հետո, երբ հայտնի դարձավ, որ Հովհաննիսյանը կասկածվում է տարիներ շարունակ մանպարտեզի երեխաների սննդի մի մասը յուրացնելու համար:

Գայանե Հովհաննիսյանին դեռ մեղադրանք չի առաջադրվել. վերջինս, սակայն, առաջադրված կասկածանքը մասամբ է ընդունում:

Նրա պաշտպան Վահե Մնացականյանի հետ զրույցը՝ ստորեւ.

- Պարոն Մնացականյան, Գայանե Հովհաննիսյանն առաջադրված կասկածանքի վերաբերյալ ի՞նչ դիրքորոշում է հայտնել:

- Կասկածանքը վերաբերվում է առանձանպես խոշոր չափերի յուրացմանը, մասնակի ինչ-որ բաներ ընդունում է:

- Մասնավորապես ո՞ր դրվագի հետ կապված է ընդունում:

- Կներեք, բայց չեմ կարող ասել, դեռ քննություն է գնում, գործողություններ են կատարվում:

- Իսկ ձեր վստահորդը ցուցմունք տվե՞լ է:

- Այո, ցուցմունք տվել է, առերեսումների է մասնակցել:

- Ո՞ւմ մասնակցությամբ է կատարվել առերեսումը:

- Չեմ կարող ասել, դա նախաքննական գաղտնիք է:

- Մի անձի մասի՞ն է խոսքը:

- Ոչ, մի քանի առերեսումներ է կատարվել ու ըստ քննիչի՝ դեռ էլի առերեսումներ են նախատեսվում:

- Ըստ Քննչական կոմիտեի տարածած հաղորդագրության՝ ձեր վստահորդը 2015թ. մայիսից մինչեւ 2018թ. հունիս ամիսն ընկած ժամանակահատվածում տարբեր հաստիքներում աշխատանքի է ընդունել իր ծանոթներին եւ մտերիմներին, ովքեր փաստացի աշխատանքի չեն հաճախել, իսկ նրանց անվամբ դուրս գրված առանձնապես խոշոր չափերի աշխատավարձի գումարները յուրացվել են: Հովհաննիսյանն այս դրվագով որեւէ դիրքորոշում հայտնե՞լ է, թե՝ ոչ եւ ի՞նչ ծանոթերի ու մտերիմների մասին է խոսքը:

- Բարեկամականի կապը երկու հարսների մասով է. մեկը որպես հաշվապահ, մյուսի հաստիքը չգիտեմ: Իրենք կարճ ժամանակահատվածում են աշխատել, եթե չեմ սխալվում 6 ամիսը չի էլ գերազանցել, ներկայումս չեն աշխատել, աշխատել են մեկ տարի առաջ: Տնօրենի ուրիշ բարեկամներ մանկապարտեզում չկան, որոնք ներկայումս կամ նախկինում աշխատել են, միայն երկու հարսներն են եղել, որոնք շատ կարճ են աշխատել:

- Բայց հարսների աշխատավարձերը յուրացվե՞լ են:

- Ոչ, աշխատավարձերը հարսները ստացել են:

- Պաշտոնական հաղորդագրության համաձայն՝ Հովհաննիսյանը 2014թ. սկզբներից մինչեւ 2019թ. հունվարի 17-ն ընկած ժամանակահատվածում, յուրացման եղանակով հափշտակել է մանկապարտեզի սաներին հատկացված եւ իրեն վստահված սննդամթերքից: Նշվում է նաեւ, որ խուզարկության արդյունքում մանկապարտեզի տնօրենի աշխատասենյակից հայտնաբերվել եւ առգրավվել է 2019թ. հունվարի 15-17-ն ընկած ժամանակահատվածում խոհարարի օժանդակությամբ առանձնացված սննդամթերքը: Մամուլում շրջանառվող տեղեկությունների համաձայն՝ այս սննդամթերքը ուղարկվել է իր ընտանիքին պատկանող ռեստորան, ճի՞շտ են այս տեղեկությունները:

- Դա բացարձակ իրականությանը չի համապատասխանում, իրենց ընտանիքը ռեստորան չունի, բամբասանքի մակարդակի են այդ տեղեկությունները:

- Իսկ ինչո՞ւ է այդ սննդամթերքը պահվել իր աշխատասենյակում:

- Դրանք մենք չգիտենք, մեզ չեն ասել:

- Այսինքն՝ տնօրենն էլ չգիտի՝ ինչո՞ւ է իր աշխատեսնյակում պահվել այս սննդամթերքը:

- Տնօրենը արձակուրդում է եղել դեկտեմբերի 25-ից մինչեւ փետրվարի սկիզբը, տնօրենը չի հաճախել աշխատանքի վայր, դրա համար չի կարող իմանալ:

- Այսինքն՝ նա չի իմացե՞լ, որ իր աշխատասենյակում սննդամթերք կա:

- Բնականաբար, եթե աշխատանքի չի գնացել, չեմ կարծում՝ իմացել է թե՝ ոչ, որտեղի՞ց պետք է իմանար:

- Ի վերջո Հովհաննիսյանը խոհարարից պահանջե՞լ է, որ մանկապարտեզ հաճախած երեխաների կերակրման համար նախատեսված սննդամթերքից որոշակի չափաբաժին առանձնացվի:

- Տեսեք, մեզ նույնիսկ մեղադրանք առաջադրված չի:

- Բայց կասկածանք է չէ՞ առաջադրված:

- Մենք ընդհանրապես չգիտենք սննդի մասով ասված ձեր դրվագները մեզ մեղադրանք առաջադրվելու է, թե՝ ոչ: Առանձանպես խոշոր չափերի յուրացում կատարելու կասկածով մեզ ձերբակալել են, էս պահի դրությամբ ունենք կասկածյալի կարգավիճակ: Հիմա ես չեմ կարող ասել սննդի մասով մեզ մեղադրում են՝ չեն մեղադրում: Իմ պաշտպանյալը սննդի մասով հայտարարել է, որ ինքը որեւէ կապ չունի այդ սննդի հետ, այդքանը կարող եմ ասել, բայց ավել բան չեմ կարող ասել, երբ կոնկրետ մեղադրանք, փաստեր կլինեն, նոր արդեն մենք կորոշենք՝ ինչ ցուցմունք կտանք:

- Այսինքն՝ պնդում է, որ ինքը չի՞ հափշտակել մանկապարտեզի սաներին հատկացված եւ իրենց վստահված սննդամթերքը:

- Նորից եմ կրկնում՝ մեզ մեղադրանք առաջադրված չէ սննդամթերք հափշտակելու մասով:

- Բայց ՔԿ-ն հղում կատարելով քննությամբ ձեռք բերված տվյալներին՝ նշում է, որ տնօրենը, օգտագործելով իր պաշտոնեական դիրքը, 2014-ից յուրացրել է մանկապարտեզի սաներին հատկացված եւ իրենց վստահված սննդամթերքը:

- Դա իրենց նախնական տվյալներն է, որով մեղադրանք առաջադված չէ: Նոյեմբերի 6-ին նույն ձեւ բոլոր կայքերը հայտարարեցին, որ մանկապարտեզի տնօրենը յուրացում է կատարել 3,6 միլիոնի չափով, բայց այդ ժամանակ մենք նույնիսկ վկայի կարգավիճակ չունեինք: Եթե մենք զուտ հրապարակումներին ենք նայում, դա այլ բան ա, բայց կոնկրետ մեղադրանքը այլ բան է, ես կարող եմ խոսել, երբ կոնկրետ մեղադրանք լինի:

- Քրեական գործը հարուցվել է 2018-ին, այդ ժամանակ ձեր վստահորդը հարցաքննվե՞լ է, որեւէ դատավարական կարգավիճակ ունեցե՞լ է:

- Մեզ առաջին անգամ հրավիրվել են եւ ձերբակալել հունվարի 21-ին:

- Պարոն Մնացականյան, ձեր վստահորդի բնակարանում խուզարկություններ կատարվե՞լ են, եւ որեւէ բան հայտնաբերվե՞լ է:

- Խուզարկություն կատարվել է, բայց ոչինչ չի հայտնաբերվել:

Ավելի վաղ տեղեկացրել էինք, որ մեր տեղեկություններով, Գայանե Հովհաննիսյանի որդին աշխատում է Երեւանի քաղաքապետարանի աուդիտի բաժնում, որպես տեսուչ: Իսկ ամուսինը ՀՀ վերահսկիչ պալատի չորրորդ վարչության պետն է: