Առաջարկելու եմ՝ ստեղծվի հնարավորություն, որ ԱԱԾ-ի եւ ոստիկանության ղեկավարներն ԱԺ-ում հաշվետվություն տան. ԱԺ փոխնախագահ

Հարցազրույց Ազգային ժողովի նախագահի տեղակալ, ՔՊ վարչության անդամ Լենա Նազարյանի հետ:

- Տիկին Նազարյան, ինչպե՞ս եք գնահատում 7-րդ գումարման խորհրդարանի աշխատանքների մեկնարկը եւ ի՞նչ տպավորություններ ունեք:

- Իմ սպասումները գերազանցված են, որովհետեւ այսքան ակտիվ քննարկում վաղուց չէր եղել ԱԺ-ում՝ հանձնաժողովների թեկնածուների հարցերի շուրջ: Այդքան շատ հարցերն ու ելույթները վկայում են, որ մեր պատգամավորներն ունեն շատ լայն օրակարգ: Հնչեցին կարծիքներ՝ ինչու ենք այդքան երկար քննարկումներ անում, եթե ի սկզբանե պարզ էր, որ հանձնաժողովի նախագահների առաջադրված թեկնածուներն ընտրվելու են: Ես այդքան էլ համաձայն չեմ այդ կարծիքի հետ, որովհետեւ դա է խորհրդարանի իմաստը: Շատ կարեւոր է, որ խնդիրներն արձանագրվեն եւ հանրության համար պարզ լինի, որ յուրաքանչյուր պատգամավոր ունի իր օրակարգը:

- Առաջիկայում քննարկվելու է կառավարության կառուցվածքի մասին փոփոխությունների նախագիծն՝ արդեն պա՞րզ է, թե վերջնական ինչ փոփոխություններ են լինելու:

- ԱԺ-ին դեռ չի ներկայացվել նախագիծը, նախնական տարբերակը ինձ հասանելի չէ: Երբ կառավարությունը կհամարի, որ ունի բավարար հիմնավորումներ՝ համախմբումներ անելու եւ նախագիծ կներկայացնի, այդ ժամանակ ես կասեմ իմ կարծիքը: Շատ կարեւոր եմ համարում, որ կառավարությունը ներկայանա բավարար հիմնավորումներով:

- Ընդդիմությունը խոսում է այն մասին, որ կառավարության կառուցվածքի փոփոխություններով չի վերանում «սուպերվարչապետական» համակարգը: Մասնավորապես, պնդում կա, որ ԱԱԾ-ն եւ ոստիկանությունը պետք է հանել վարչապետի վերահսկողությունից: Ի դեպ, նախկինում հենց «Ելք» խմբակցությունն է շրջանառության մեջ դրել «սուպերվարչապետական» համակարգ որակումը: Այս մասով փոփոխություններ սպասվո՞ւմ են:

- Իրավապահ մարմինների հաշվետվողականությունը խորհրդարանի առաջ շատ կարեւոր եմ համարում եւ ես կարծում եմ, որ կարող ենք սահմանել մեխանիզմներ, որ ինչպես գլխավոր դատախազն է ամեն տարի հաշվետվություն ներկայացնում իր գերատեսչության գործունեության վերաբերյալ, այնպես էլ մյուս իրավապահ մարմինները ներկայացնեն: Այս դեպքում պատգամավորները հնարավորություն կունենան հարցեր ուղղել ուղիղ այդ ղեկավարներին, բայց եթե անգամ մնա նույն կառուցվածքը, պատգամավորները կարող են իրենց հարցերն ուղղել վարչապետին:

- Դուք ի՞նչ եք կարծում՝ պե՞տք է այդ երկու ուժային կառույցերը հանել վարչապետի ենթակայությունից:

- Ես կարծում եմ, որ մենք պետք է քայլ առ քայլ գնանք այդ ուղղությամբ, բայց քանի որ մեր որոշումները մի քանի տարվա չեն, պետք է լավ մտածված լինեն: Միեւնույն ժամանակ վարչապետը հնարավորություն ունենա շատ արագ որոշում կայացնելու, այսինքն, այդ որոշումներն էլ չպետք է վերացվեն, պետք է հավասարակշռությունը պահպանվի:

- Այս փուլում, եթե ԱԱԾ-ն եւ ոստիկանությունը շարունակեն մնալ վարչապետի ենթակայության տակ, չե՞ք կարծում, որ դա կլինի ՔՊ-ականների սկզբունքների շեղում:

- Ոչ: Մասնավորապես, ես մեր խմբակցությունում այս հարցի քննարկման ժամանակ առաջարկելու եմ՝ ստեղծվի հնարավորություն, որ նշված իրավապահ մարմինների ղեկավարներն ԱԺ-ում հաշվետվություն տան, ինչպես մյուս կառույցների ղեկավարները:

- Վաղը եւ առաջիկա մի քանի օրերին նախատեսված էին ԱԺ նիստեր: Դրանք չեն գումարվում կառավարության կառուցվածքի փոփոխությունների նախագծի պատրաստ չլինելո՞ւ պատճառով:

- Կառավարության 2/3-ն արդեն ձեւավորված է եւ կառավարությունը պետք է աշխատի ծրագրի վրա եւ վարչապետի նշանակումից 20 օր անց պետք է այն ներկայացնի խորհրդարանին: Կառավարության կառուցվածքի փոփոխությունների վերաբերյալ նախագիծը կառավարությունը կարող է ներկայացնել, երբ ցանկանա:

- Արտախորհրդարանական ընդդիմությունը եւս քննադատում է օրվա իշխանություններին, մասնավորապես, ՀՅԴ Բյուրոյի ներկայացուցիչ Հրանտ Մարգարյանը հայտարարել էր, որ 5 տարի անց ձեր քաղաքական թիմին տուն են ուղարկելու եւ իրենք են զբաղեցնելու իշխանությունը: Այս հայտարարությունն ինչպե՞ս եք մեկնաբանում:

- Ոչինչ չեմ մեկնաբանում: Ես ընդդիմության տեղի եւ դերի հետ կապված զերծ եմ մնում մեկնաբանություններից: Իմ կարգավաիճակում կարեւոր է, որ կառավարող ուժն է իր տեղում, իսկ թե որտեղ է ընդդիմությունը՝ խորհրդարանում, թե՝ դրսում եւ ինչով է զբաղված, դա իրենց անելիքն է: Ես նման խոսակցություններին ուշադրություն չեմ դարձնում, ես ուշադրություն եմ դարձնում այն խնդիրներին, որոնք հուզում են հանրությանը:

- Տիկին Նազարյան, սոցիալական ցանցերում ձեր քաղաքական ուժի տարբեր ներկայացուցիչներ ենթարկվում են օգտատերերի քննադատություններին: Առողջ քննադատությունների կողքին կան նաեւ ապատեղեկատվություններ, որոնք տարածվում են րոպեների ընթացքում: Այս ամենի դեմ ինչպե՞ս պետք է պայքարել:

- Դրա լուծումը պրոակտիվ լինելն է՝ ավելի շատ ինֆորմացիա տրամադրելը, հանրության հետ անխափան կապի պայմաններ ստեղծելը: Օրինակ, վարչապետը սիրված մի ֆորմատ ունի՝ զրույց քաղաքացու հետ: Ամեն մի գործիչ կարող է մի մեթոդ ընտրել: Ես, օրինակ, պատրաստվում եմ շատ ավելի հաճախ ճեպազրույցներ անել ԱԺ-ում եւ տրամադրել օրվա հրատապ տեղեկությունները, որոշումները, որպեսզի հանրությունը տեղեկատվությունը ստանա անմիջապես մասնակցից: Ես կարծում եմ, որ պատգամավորները լրագրողների հետ պետք է միշտ հանդիպումներ ունենան եւ տեղեկացնեն, որ մենք այս որոշումն ենք ընդունել, մենք քննարկում ենք այս հարցերը, ունենք առաջարկություններ, տարբերակներ եւ այլն: Պարտադիր չէ, որ մենք միայն պատրաստի որոշումների մասին խոսնեք:

Տպել
1962 դիտում

Վրաստանի նախկին նախագահը վերադառնում է քաղաքականություն՝ որպես ընդդիմադիր

Է. Ղազարյանի ՀՀԿ-ական անցյալը հայտնի էր. բայց նա ապացուցեց այն, ինչ պահանջվում էր հանրաքվեն նախաձեռնողներից. Ռ.Ռուբինյան

Գեղարքունիքում ավարտվել է անասնագլխաքանակի հաշվառումը. նվազել է խոշոր, ավելացել մանր եղջերավոր անասունների գլխաքանակը

Կառավարության անդամները գրքեր են նվիրել Արմաշի գրադարանին

Ժամը 22:35-ի դրությամբ Սարավան-«Զանգեր» հատվածում 10-15 մ հորիզոնական տեսանելիությամբ մառախուղ է. ԱԻՆ

ԱՄՆ-ը պատրաստ է Իրանի հետ երկխոսության, եթե վերջինս փոխի իր քաղաքականությունը

Արմավիրում 21 և 60 տարեկան կանայք դրամապանակ են գողացել եւ դրանում առկա բանկային քարտով գումար կանխիկացրել

ՄԱԿ-ը 2020 թվականը հայտարարել է բույսերի առողջության պահպանման միջազգային տարի. չկա բույսերի առողջություն՝ չկա կյանք

Անհասկանալի է ռեժիսորի հրապարակ բերած արհեստական օրակարգը. ԿԳՄՍ-ն պատասխանել է Գալստյանի ահազանգին

Հրդեհաշիջման ժամանակ զոհված հրշեջն այսօր կդառնար 23 տարեկան. ծառայակից հրշեջները հուշաքար են տեղադրել

«Նուբարաշեն» ՔԿՀ աշխատակիցները կալանավորված անձի պայուսակից կասկածելի փաթեթ են հայտնաբերվել

Եվրամիության կարեւոր ծրագրերի ֆինանսավորումը կարող է սառեցվել. բյուջեի շուրջ համաձայնություն չկա

Երևանում ՃՈ-ն ուժեղացված ծառայություն է իրականացրել. (տեսանյութ)

Ստեփանծմինդա-Լարս ավտոճանապարհը բացվել է. ԱԻՆ

Հափշտակել են Դադիվանքում տեղադրված գանձանակը. ԱՀ ոստիկանություն

Հայկ Մարությանն այսօր ներկայացրել է Նոր Նորք եւ Աջափնյակ վարչական շրջանների նոր ղեկավարներին

«ՀԿԵ» ՓԲԸ տնօրենը Շիրակի մարզպետին առաջարկել է քննարկել Գյումրու ավտոկայանը երկաթուղային կայարան տեղափոխելու հարցը

Հայաստանը ունեցել է կապեր Եվրոպայի հետ, իսկ Ադրբեջանը՝ ոչ, այն պատճառով, որ նման երկիր գոյություն չի ունեցել. Զատուլին

Դիլիջանի ոստիկանները պետական-հասարակական ունեցվածքի գողության դեպք են բացահայտել

Իրանում կորոնավիրուսի հետեւանքով 2 քաղաքացի է մահացել