Մենք ուզում ենք, որ Հայաստանը ոչ թե ուրիշ, այլ Հայաստանի նման երկիր լինի. Փաշինյան

Վարչապետի թեկնածության հարցը քննարկելիս Ազգային ժողովում հարց ու պատասխանի ժամանակ պատգամավոր Տիգրան Ուրիխանյանը Նիկոլ Փաշինյանին հիշեցրեց, որ տարիներ առաջ իրենք սրճարանում նստած են եղել, եւ ինքը Փաշինյանին ասել է, որ կիսում է վերջինիս դիրքորոշումները, միաժամանակ նշելով, որ ինքն այսպիսով՝ տարբերվում է այն պատգամավորներից, որոնք ձեւացնելու են, թե ամբողջ կյանքում են Փաշինյանի դիրքորոշումների կողմնակիցը եղել.

«Ուզում եմ ասել մեկ բան, որը հեղափոխական ու հետհեղափոխական ընթացքում կոռեկտությունից ելնելով գրեթե չեմ ասել: Հիմա շատերն էստեղ Ձեզ հարցեր են տալու, ձեւացնելով, թե ամբողջ կյանքում միշտ համոզված կողմնակից են եղել Ձեր դիրքորոշումների: Իմ տարբերությունը նրանցից լինելու է մեկը: Հիշո՞ւմ եք, տարիներ առաջ սրճարաններից մեկում նստած էինք, ես հայտարարեցի, որ ամբողջությամբ կիսում եմ Ձեր դիրքորոշումները, եւ միշտ պատրաստ եմ անել ամեն ինչ, որ երկրում ընտրություններ չկեղծվեն, որպեսզի կոռուպցիայի հայրն անիծվի, որպեսզի համակարգը փոխվի եւ այլն: Այսինքն, նիստին հետեւող սիրելի հայրենակիցներ, թույլ տվեք տալ հարցեր, որոնք կարող են չար հնարք թվալ, բայց դրանք իրականում նպատակ ունեն ամրապնդել այն, ինչ հիմա դուք անում եք: Ինձ համար շատ կարեւոր է, ուզում եմ հստակեցնել, ընդունում եք արդյո՞ք, որ այս հինգ-վեց ամիսների ընթացքում կադրային քաղաքականության մեջ նոր կառավարության մոտ եղել են ձախողումներ: Տեսնո՞ւմ եք հնարավորություն դրանք փոփոխելու եւ տեսնո՞ւմ եք հնարավորություն՝ որոնելու պիտանի մարդկանց»,- հարցրեց Ուրիխանյանը:

Նրա հարցին ի պատասխան վարչապետի պաշտոնակատար Նիկոլ Փաշինյանն ասաց, որ չի կարող ուրանալ ճշմարտությունը, հիշում է այդ հանդիպումը: Ապա անդրադառնալով կադրային քաղաքականության վերաբերյալ հարցին, ասաց. «Իհարկե, ընդունում եմ, որ կառավարությունը անթերի չէ, եւ սխալներ գործում է եւ գործելու է, ինչպես ՀՀ-ում այսուհետ գոյություն ունեցող բոլոր կառավարությունները, եւ աշխարհի բոլոր կառավարությունները: Պատկերացրեք, ես ասեմ՝ չէ՛, ոչ մի սխալ չենք արել ո՛չ կադրային քաղաքականության հարցում, ո՛չ տնտեսական: Բայց ես ասացի՝ էն, ինչ ուզում ենք անել, եւ ինչ արել ենք, դա աննախադեպ է: Բայց ձեր նշած իդեալական կադրերին էլ մինչեւ վերջ պարզ չեն լինելու պարամետրերը, որովհետեւ նոր Հայաստան ասելով, մենք ուզում ենք, որ Հայաստանը Հայաստանի նման երկիր լինի, Հայաստանը լինի այնպես, ինչպես Հայաստանը, ոչ թե ուրիշ երկիր, եւ թող ուրիշ երկրներում քննարկեն Հայաստանի օրինակը, ինչպես հեղափոխության օրինակն են քննարկում»:

ԵԼՔ խմբակցության պատգամավոր Ալեն Սիմոնյանը Փաշինյանից հետաքրքրվեց տնտեսական քաղաքականության հեռանկարի մասին: Նիկոլ Փաշինյանը պատասխանեց, որ վարչապետի պաշտոնը ստանձնելուց հետո կառավարության առաջին ռեակցիան տնտեսության վերաբերյալ եղել է պահպանողական մոտեցման պահպանումը, որպեսզի հեղափոխությունից անմիջապես հետո ցնցումներ չլինեն.

«Բայց մենք արձանագրում ենք, որ մեր տնտեսության կառուցվածքը, որն ունենք, մեզ համար ընդունելի չէ, որովհետեւ այն, ըստ էության հենված է 3 սյուների վրա՝ ավանդական գյուղատնտեսաության, հանքարդյունաբերության եւ, որքան էլ տարօրինակ թվա, խաղադրույքային ոլորտի: Մենք խնդիր ենք դրել, որ այդ կառուցվածքը պետք է փոխվի: Ավանդական գյուղատնտեսությանը փոխարինի տեխնոլոգիական գյուղատնտեսությունը, խոսքը ոռոգման համակարգի, հակակարկտային պաշտպանության եւ գյուղմթերքի մթերման, բաշխման մասին է: Արդեն երկրորդ սյունը պետք է լինի բարձր տեխնոլոգիական արդյունաբերությունն ու տեքստիլ արդյունաբերությունը: Հիմա անխուսափելիորեն հին համակարգից նորին անցնելու ժամանակ լինելու է մի ժամանակահատված, որ հինն անկման մեջ է լինելու, նորը դեռ կայացած չի լինելու, եւ մենք տնտեսական ցուցանիշների անկում ենք ունենալու: Եւ այս կոնտեքստում էլ արտահերթ խորհրդարանական ընտրությունների կարեւոր են, դրանով է նաեւ, որ ներդրողների համար որոշակի կայուն հեռանկար բացվի: Մենք պետք է այս պրոցեսներին նայենք հանդարտ եւ երկարաժամկետ հեռանկարում»,- ասաց Նիկոլ Փաշինյանը:

Նա նաեւ նշեց, որ իր առաջ խնդիր էր դրել, որ իր հագուստը լինի հայկական արտադրության՝ դրանով իր աջակցությունը հայտնելով հայաստանցի արտադրողներին: Ասաց, որ այս պահի էլ իր հագուստը հայկական արտադրության է: