Պլանային ջրանջատումներ հանրապետությունով մեկ. քաղաքացիների նյարդերը տեղի են տալիս

Արդեն մի քանի օր է՝ ջուր չունենալու խնդրով ՀՀ քաղաքացիները պարբերաբար ահազանգ են հնչեցնում եւ բողոքում «Վեոլիա Ջուր» ՓԲԸ-ի աշխատակիցների անտարբեր վերաբերմունքից ու անպատասխանատու աշխատաոճից: Մեզ ահազանգող քաղաքացիների ճնշող մեծամասնությունը նախ եւ առաջ փորձել է կապ հաստատել «Վեոլիա ջուր»-ի աշխատակիցների հետ, սակայն անպատասխան զանգերից կամ անորոշ պատասխաններ ստանալուց հետո կապ հաստատել մեզ հետ:

«Անընդատ զբաղված ցույց տվող թեժ գիծ ծառայություն եւ կատարյալ անտարբերություն է տիրում, անգամ ջուրն անջատելուց առաջ չեն զգուշացնում»,- այս մասին հաղորդեց քաղաքացիներից Հասմիկ Ջիլավյանը: Երեւանի Շենգավիթ վարչական շրջանի բնակչուհու խոսքով՝ մեկ ամսից ավելի է՝ նորմալ ջուր չունեն: Ամեն անգամ առանց զգուշացնելու են ջրանջատումներ լինում, իսկ միացնելուց հետո էլ երկար ժամանակ ծորակից կեղտաջուր է գալիս:

«Ամենաքիչը կես ժամ ժանգոտ ջուր է գալիս, հետո դա խմել եւ օգտագործել էլ չի լինում, ստիպված առնում ենք: Այսքան ժամանակ զանգում ենք, հեռախոսն էլ չեն վերցնում, միայն մի անգամ, բախտի բերմամբ պատասխանեցին, ասում են՝ վթար է եղել: Ինչպե՞ս է լինում, որ հենց ամառ է գալիս, վթար է լինում, թե՞ հիմա լողավազաններ լցնելը վթար է կոչվում»,- ասաց Շենգավիթ վարչական շրջանի բնկաչուհին, որը բողոքում էր ամբողջ թաղամասի անունից:

ՀԺ են ահազանգում նաեւ հանրապետության տարբեր հատվածներից, մասնավորապես՝ Արարատի եւ Գեղարքունիքի մարզի գյուղերից: Բողոքներից մեկը Գեղարքունիքի Լճաշեն գյուղի բնակչուհուց է, որը մեզ հետ զրույցում ասաց, որ շաբաթներով չեն կարողանում անասուններին ջրել եւ անհնար է անասնագոմի, կենցաղի, գործերի համար անհրաժեշտ ջուրն ապահովել:

«Օրերով ջուր չենք ունենում, ունենալու դեպքում էլ կաթիլ-կաթիլ է գալիս, Սեւանի համապատասխան մարմնի համարներ ոչ մի ձեւով հնարավոր չի լինում գտնել եւ կապ հաստատել, Վեոլիա ջրից էլ ասում են՝ նկատի կունենանք, բայց ոչ մի փոփոխություն»,-ասաց Լճաշեն գյուղի բնակչուհին: Արարատի մարզի Արտաշատ քաղաքից ահազանգած Անահիտ Ավետիսյանը մեզ հետ զրույցում ասաց, որ ահազանգել է նույնիսկ տարածքային կառավարման եւ զարգացման նախարարություն, ասել են՝ դիմում գրեք, կուսումնասիրվի:

«Խեղճ ավանակի պատմությունն են գլխներիս անում՝ Էշ մի սատկի գարուն կգա, հիմա ի՞նչ, ժողովուրդը ծարավ մնա, մինչեւ դուք ձեր քմահաճույքներով դիմումը քննարկեք, հետո նոր ժողովրդին ջուր տա՞ք: Մարդիկ ասում են, որ Հազարաշենում Հովիկ Աբրահամյանի հազարավոր հեկտարներով խնձորի այգիներն է ջրվում, դրա համար էլ Արտաշատը հայտնվել է այս վիճակում: Մեղք ենք էլի, 42 աստիճան տաքություն է, բա նման բան են անո՞ւմ»,- ասաց Արտաշատի քաղաքացին:

Անահիտ Ավետիսյանի խոսքով՝ քաղաքապետին բազմիցս դիմել են. ասել է, որ դա իրենց իրավասությունների մեջ չի մտնում, «Վեոլիա Ջուր»-ը պետք է զբաղվի: «Վեոլիա Ջուր»-ի 185 համարին զանգելով՝ լսում ենք. այսօր պլանային ջրանջատումներ չկան, բայց միշտ լինում են: Հանրային ծառայությունները կարգավորող հանձնաժողովն անբարեխիղճ աշխատանքի համար տուգանի, մեզ էս ի՞նչ են անում»,- ասաց Անահիտ Ավետիսյանը: Ընդգծեց, որ ահավոր վիճակում են, եւ այդ խնդրի առումով ամենաթողություն է տիրում:  

ՀԺ-ն տարատեսակ բողոքների հետ կապված փորձեց կապ հաստատել «Վեոլիա Ջուր» ՓԲԸ-ի հետ: Տեղի հասարակայնության եւ լրատվության հետ կապերի բաժնի պետ Մուրադ Սարգսյանն առաջարկեց յուրաքանչյուր խնդրի հետ կապված գրավոր հարցում ուղարկել, որը կուսումնասիրվի հնգօրյա ժամկետից ոչ շուտ: Իսկ մինչ այդ, սոցիալապես անապահով ՀՀ քաղաքացիներին այլընտրանք չի մնում, քան փողով ջուր առնելը:

Նշենք, որ խմբագրություն ահազանգած քաղաքացիներից շատերը հայտնում էին, որ օրական 2000-ից 3000 դրամ գումար են հատկացնում ջուր գնելու համար: Հիշեցնենք, որ Հանրային ծառայությունները կարգավորող հանձնաժողովը (ՀԾԿՀ) սույն թվականի ապրիլի 4-ի նիստում որոշել էր «Վեոլիա Ջուր» ընկերությանը տուգանել 5 միլիոն դրամով:

Հանձնաժողովի հաղորդագրության համաձայն, տուգանքը նշանակվել է ՀԾԿՀ 2016 թվականի նոյեմբերի 30-ի որոշմամբ հաստատված խմելու ջրի մատակարարման եւ ջրահեռացման (կեղտաջրերի մաքրման) ծառայությունների մատուցման կանոնների 16-րդ կետով սահմանված՝ դիմող անձանց նոր համակարգերը մատակարարի ջրամատակարարման եւ ջրահեռացման համակարգին միացման առավելագույն ժամկետները խախտելու համար: