Թող գրավոր դիմեն, որ իշխանության մաս են ուզում կազմեն. Բաղդասարյանը՝ Էդմոն Մարուքյանին

Խորհրդարանում ՀՀԿ խմբակցության ղեկավար Վահրամ Բաղդասարյանը այսօր լրագրողների հետ զրույցում անդրադարձել է Ազգային ժողովի մուտքերը փակելու մասին Նիկոլ Փաշինյանի հայտարարությանը եւ իշխանությունից պաշտոններ ստանալու մասին Էդմոն Մարուքյանի հոդվածին: Ըստ էության, իշխանությունն ընդդիմության երկու քայլերն էլ անիրատեսական է համարում: 

- Պարոն Բաղդասարյան, ապրիլի 17-ին ընդդիմությունը պատրաստվում է փակել փողոցները, ինչպես նաեւ շրջափակել Ազգային ժողովի շենքի բոլոր մուտքերը, որպեսզի դուք չկարողանաք գալ եւ ընտրել վարչապետի ձեր թեկնածուին: Դուք սա հնարավոր համարում ե՞ք, եւ եթե փակեն, ի՞նչ եք անելու:

- Ես խոստանում եմ, որ իմ աշխատանքի ժամին կգամ աշխատանքի: Այն, ինչն օրենքի սահմաններում է, կլինի անարգելք: 

- Իսկ եթե գաք աշխատանքի ու տեսնենք, որ ԱԺ մուտքը հարյուր հազարավոր մարդկանցով փակված է:

- Դա իմ խնդիրը չէ, դա համապատասխան մարմինների խնդիրն է, որ կարգ ու կանոն պահպանեն, որպեսզի մենք կարողանանք մեր աշխատանքային օրն անցկացնենք:

- Ընդդիմությունը փողոց փակելու իրավունք չունի՞:

- Դա ինձ չպետք է ասեք: Կրկնում եմ՝ ինչն օրենքի սահամաններում է, ցանկացած ընդդիմադիր կարող է իր սահմանադրական իրավունքներից օգտվել:

- Հնարավոր համարո՞ւմ եք այնպիսի իրավիճակ լինի, որ չկարողանաք մտնել ԱԺ:

- Ժամանակից առաջ մի ընկեք, համբերեք եւ ամեն ինչ իր հունով կընթանա: Ընդդիմադիրներն իրենց գործն են կատարում, որը նորմալ է բոլոր խորհրդարանական երկրներում:

- Ինչպե՞ս եք գնահատում քայլերթի գաղափարը:

- Շատ նորմալ, ու՞մ է արգելված քայլել: Ես էլ ամեն առավոտյան 2-3 կմ քայլում եմ:

- Իսկ հետեւո՞ւմ եք ընթացքին, քանի որ թիրախում ձեր կուսակցությունն է:

- Անկեղծ ասած, չեմ հետեւում: Ես Փաշինյանին երկար տարիներ լսել եմ եւ ինձ թվում է, որ նոր բան լինի, նորից կլսեմ:

- Պարոն Բաղդասարյան, ԵԼՔ-ից Էդմոն Մարուքյանը նշել է, որ իշխանությունները իրենց պետք է զիջեն ԱԺ երկու հանձնաժողովի նախագահի պաշտոն, ինչպես նաեւ նրանք անդամներ պետք է ունենան Բարձրագույն դատական խորհրդում, ՍԴ-ում, ԿԸՀ-ում, Կենտրոնական բանկում, ՏՄՊՊՀ-ում, բացի այս նրանց պետք է պատկանի ՄԻՊ նշանակելու իրավունքը: Դուք սա իրատեսական համարու՞մ եք:

- Այսինքն, պաշտոններ առանց պատասխանատվությա՞ն: Ցանկացած քաղաքական ուժ, երբ պատրաստ կլինի պատասխանատվություն կիսելու եւ իրենք գրավոր կդիմեն, մենք այդ հարցը կքննարկենք: Մենք քննարկման որեւէ ֆորմատի դեմ չենք: Ես միանձնյա չեմ կարող պատասխան տալ: Թող գրավոր դիմեն, որ մաս են ուզում կազմեն մեր պատասխանատվության:

- Պարոն Բաղդասարյան, բայց Էդմոն Մարուքյանի հոդվածից ենթադրելի է, որ նրանք չեն ուզում իշխանության մաս կազմել, այլ՝ ունենան այդ պորտֆելները եւ մնան ընդդիմություն:

- Այսինքն, ունենան ամեն ինչ, բացի պատասխանատվությունի՞ց:

- Ուզում եք ասել, որ նրանք այդ պաշտոններն ունենալով՝ իշխանության մաս են դառնալո՞ւ:

- Բնականաբար, իշխանության մաս պետք է դառնան, որ կրեն պատասխանատվություն:

- Պարոն Բաղդասարյան, իշխանության սրտով չէ ընդդիմությանը պաշտոններ տալը, իսկ մյուս կողմից էլ դեմ եք նրանց փողոց փակելուն: Մարուքյանի առաջարկածը կարո՞ղ է խորհրդարանական պայքարի տարբերակ լինել:

- Ես չեմ կարդացել հոդվածը, բայց պաշտոնները չեն զիջում, պաշտոնները պետք է ձեռք բերեն: Մենք 2017 թվականի Ազգային ժողովի ընտրությունների ժամանակ ստացել ենք մեծամասնություն եւ կազմել ենք իշխանություն: 2022 թվականին նոր ընտրությունների ժամանակ նոր կխոսենք պաշտոնների վերաբաժանման մասին:

- Լուսավոր Հայաստանն ասում է, որ ՀՀԿ-ն պառլամենտական համակարգից է խոսում, բայց ընդդիմությանը իրենց թվարկած լծակներից ոչ մեկը տրված չէ:

- Կանոնակարգով ԲՀԿ-ն, որպես ամենամեծ ընդդիմադիր խմբակցություն, ունի քաղաքական պաշտոններ՝ ԱԺ նախագահի տեղակալ եւ հանձնաժողովի նախագահներ: Այսինքն, պետք է մտածել ռեսուրսի մասին, որ շատ տոկոսներ հավաքեն՝ այդ բաշխումներին մաս կազմելու համար:

- Դուք գուշակել էիք, որ ապրիլին ԵԼՔ դաշինքը լուծարվելու է եւ հաշվի առնելով այն հակասությունները, որ այժմ առկա են դաշինքում, Ձեր գուշակությունները իրականությու՞ն են դառնում: Դուք գուշակելու ունակություններ ունե՞ք, թե՞ ԵԼՔ-ը ներսից լավ գիտեք:

- Ես գուշակություններով չեմ զբաղվում, բազմիցս նշել ենք, որ մեկ նպատակի համար միավորված ցանկացած դաշինք, որտեղ չկան գաղափարական մոտեցումներ եւ նպատակը միայն Ազգային ժողով գալն է, ուրեմն դրանք դատապարտված են քայքայման: Ընդդիմությունը որքան ամուր լինի, իշխանության համար ավելի հեշտ պայմաններ է ստեղծում աշխատելու համար: Մեզ ձեռնտու է, որ լինի կայուն ընդդիմություն: