Լրագրողներին վիրավորելիս չեն կաշկանդվում, բայց նրանց առաջ հարց քննարկելիս կաշկանդվո՞ւմ են

Փետրվարի 1-ին կառավարության նիստում հավանության արժանացավ «Կառավարության կառուցվածքի եւ գործունեության մասին» օրինագիծը եւ ուղարկվեց Ազգային ժողով: Նախագծի համաձայն՝ կառավարության նիստերն ապրիլից դառնալու են դռնփակ: Արդարադատության նախարար Դավիթ Հարությունյանը «Հայկական ժամանակ»-ի լրագրողի հետ զրույցում նշել էր, որ դռնփակ նիստերի ժամանակ նախարարներն ավելի ազատ կլինեն կարծիքներ հայտնելու, հարցեր քննարկելու առումով: Ստացվում է, որ կառավարության չինովնիկները լրագրողներից կաշկանդվում են, չեն կարողանում ազատ արտահայտվել, թեեւ միմյանց վիրավորելու, խոսքերով խայթելու համար որոշ նախարարներ ԱԺ ամբիոնից իրենց բավական ազատ են զգում՝ հատկապես ընդդիմադիր պատգամավորներին պատասխանելիս:

«Հայկական ժամանակ»-ը մի քանի նախարարից հետաքրքրվեց՝ արդյո՞ք կաշկանդվում են լրագրողների ներկայությունից, եղե՞լ են կարծիքներ, մտքեր, որոնք չեն ասել միայն այն պատճառով, որ նիստին լրագրողներ են հետեւում: Պարզվում է, այս որոշման նախագիծը դեռ ԱԺ չմտած, լիագումար նիստերում չքննարկված, արդեն կան նախարարներ, որոնք դարձել են զգուշավոր եւ նախընտրում են սույն թեմայով հարցերին չպատասխանել, թերեւս, նախագիծը ներկայացրած արդարադատության նախարար Դավիթ Հարությունյանի հետ վատամարդ չլինելու համար:

Պատահականության սկզբունքով վերոնշյալ հարցը ուղղել էինք գյուղատնտեսության նախարար Իգնատի Առաքելյանին, բնապահպանության նախարար Արծվիկ Մինասյանին, կրթության եւ գիտության նախարար Լեւոն Մկրտչյանին եւ ֆինանսների նախարար Վարդան Արամյանին: Թեմայի շուրջ իր կարծիքը հայտնեց միայն ֆինանսների նախարար Վարդան Արամյանը եւ բնապահպանության նախարար Արծվիկ Մինասյանը:

«Ես ասելիքս ներկայացնելու բարդույթներ երբեւէ չեմ ունեցել: Սակայն հարցն այստեղ միայն իմ կաշկանդված լինել-չլինելու մասին չէ: Խոսքը կառավարության ամբողջ կազմի աշխատանքային քննարկման պահը բաց եւ հրապարակային ներկայացնելու նպատակահարմարության մասին է: Քննարկումները ենթադրում են ակտիվ հարցուպատասխան, անգամ բանավեճ՝ լավագույն որոշումներին հասնելու համար: Անվիճելին այն է, որ այդ քննարկումների արդյունքները պետք է հանրայնացվեն մաքսիմալ՝ հանրությանը իրազեկելով կառավարության որոշումների մասին»,- ասաց ֆինանսների նախարար Վարդան Արամյանը:

ԲՆ Արծվիկ Մինասյանն էլ կարծում է, որ նիստերի լուսաբանումը ձեւական բնույթ է երբեմն կրում:

«Երբևիցե չեմ կաշկանդվել: Ցանկալի կլիներ, որ լրատվամիջոցները կառավարության նիստերը լուսաբանեին ըստ էության․ հաճախ է պատահում, որ լուսաբանումը ձևական բնույթ է կրում և կառավարության նիստերին ներկայացված հարցերն ընթերցողին կամ հեռուստադիտողին չեն ներկայացվում ըստ էության»,- մեր հարցին ի պատասխան ասաց Արծվիկ Մինասյանը։

Օրենքի նախագծի 10-րդ հոդվածով սահմանվում է, որ կառավարության նիստերը դռնփակ են: Վարչապետի որոշմամբ՝ նիստի մի մասը կարող է անցկացվել դռնբաց: Կառավարության անդամն իրավունք չունի առանց վարչապետի թույլտվության տեղեկատվություն հրապարակել կառավարությունում քննարկված որեւէ հարցի քննարկման ընթացքի մասին: Կառավարության նիստերն արձանագրվում են վարչապետի աշխատակազմի կողմից: Նիստի արձանագրությունը կամ դրա մի մասը վարչապետի հանձնարարությամբ կարող է հրապարակվել:

«Հայկական ժամանակ»-ը մամուլի տարբեր տարիների հրապարակումներից փոքրիկ ծաղկաքաղ է արել՝ եւս մեկ անգամ արձանագրելով, որ Հայաստանում կան պաշտոնյաներ, որոնք կառավարության, իշխանության մաս են կազմել, բայց երբեւէ չեն կաշկանդվել լրագրողներից, նրանց վիրավորել, հայհոյել են տեսախցիկի առջեւ:

Ոչ վաղ անցյալում պաշտպանության նախարար Վիգեն Սարգսյանը խորհրդարանում լրագրողներին անտակտ անվանեց, երբ վերջիններս փորձում էին նրանից ճշտել՝ տվյալ պահին հակամարտության շփման գծում ի՞նչ իրավիճակ է տիրում:

«Դուք անտակտ եք»,- այսպես պատասխանեց Սարգսյանը լրագրողի հարցին, թե  «Ինչու՞ են Ձեր ախրանիկները մեզ հրում»:

2016 թվականի դեկտեմբերի 23-ի ԱԺ արտահերթ նիստի ընթացքում լրագրողների հասցեին հնչեցրած իր հայհոյանքներով լի արտահայտությամբ աչքի ընկավ հերթական ՀՀԿ-ականը: ՀՀԿ-ական պատգամավոր Առաքել Մովսիսյանը` Շմայսը, նիստի ընթացքում ակցիա իրականացնող լրագրողներին մատնացույց անելով` գոռում էր. «ս...արեք դրանց»:

2011-ին «Հետք»-ի լրագրողին հայհոյել էր ՀՀԿ-ական, արդեն նախկին պատգամավոր, ֆուտբոլի ֆեդերացիայի նախագահ Ռուբեն Հայրապետյանը, երբ վերջինս զանգահարել էր նրան եւ փորձել հարց տալ: Հայրապետյանը սեռական բնույթի հայհոյանքներ էր տվել լրագրողին: