Դավիթ Տոնոյանը մանրամասներ է հայտնում, թե ինչու հրդեհի ժամանակ ուշ դիմեցին ՌԴ-ին

«Մենք գործում էինք, ռազմական լեզվով ասած, երկու թատերաբեմում: Երկու օր զուգահեռ աշխատանքն էր տարվում եւ Արտավանի անտառներում, եւ Խոսրովի արգելոցում: Իհարկե, տեխնիկական միջոցները, ամենագնաց մեքենաները, որոնք կարող էին եւ անձնակազմ տեղափոխեին, եւ ուղղաթիռները, որոնք Զինված ուժերի կողմից կիրառվում էին, թույլ չէին տալիս արձագանքել պատշաճ ձեւով»,- այս մասին կառավարության  մամուլի սրահում այսօր հրավիրված ասուլիսի ժամանակ ասաց ՀՀ արտակարգ իրավիճակների նախարար Դավիթ Տոնոյանը՝ խոսելով Խոսրովի արգելոցի եւ Արտավանի հրդեհների մարման գործընթացին:

Նշենք, որ ասուլիսին մասնակցում էին նաեւ բնապահպանության նախարար Արծվիկ Մինասյանն ու գյուղատնտեսության նախարարի տեղակալ Աշոտ Հարությունյան:

Հրդեհի մարման բարդությունների մասին խոսելիս Դավիթ Տոնոյանը առանձնացրեց նաեւ ռելիեֆի կտրտված լինելու եւ ուժեղ քամու հանգամանքը: «Որոշ եզրակացություններ արվել են, ներկայացվել են հանրապետության նախագահին եւ վարչապետին, մեր հագեցվածությունը բարձրացնելու առումով: Ժամանակի առումով հաշվարկներն իրականացվել են եւ այդ պահին էլ դիմել ենք, եւ շատ կարճ ժամանակահատվածում ստացել ենք աջակցությունը, որովհետեւ իրավիճակի գնահատականը թույլ չէր տալիս այդպիսի ինքնաթիռ խնդրելու: Երբ որ սկսվեցին այրվել անտառները, այլ ոչ թե խոտածածկ տարածքները, միանգամից դիմեցինք»,- մանրամասնեց արտակարգ իրավիճակների նախարարը:

Հարցին՝ աղետից հետո՞ եք մտածում տեխնիկական հագեցվածությունը բարձրացնելու մասին, ԱԻ նախարարն ասաց, որ արվում է ամեն ինչ, որ տեխնիկական հագեցվածությունը բարձրացվի: «Անտառների հրդեհաշիջման տեխնիկայի հագեցվածությունն այլ է, քաղաքում հրդեհների մարման մարտավարությունն՝ այլ: Այլ տեխնիկաներ են օգտագործվում: Այն ինչ մենք ունենք, օգտագործվել է ամբողջովին: Ծավալը մեծ է եղել, մեր համար անհաղթահարելի, դիմել ենք ռուսաստանյան մեր գործընկերներին»,- պատասխանեց Դավիթ Տոնոյանը:

Նախարարը հիշեցրեց, որ հրդեհաշիջման աշխատանքների ժամանակ օգտագործվել են զինված ուժերի տեխնիկական միջոցներն ու անձնակազմը, եւ ինքը նախընտրում է, որպեսզի պաշտպանության նախարարությունում ձեռք բերվեն տեխնիկական միջոցներ, որոնք կօգտագործվեն նաեւ արտակարգ իրավիճակների նախարարության խնդիրները լուծելու համար:

«Խոսրովի անտառ» արգելոցում հեռահաղորդակցության ցանցի բացակայության վերաբերյալ հարցին ի պատասխան էլ նախարարն ասաց, որ վարչապետի եւ նախագահի հանձնարարությամբ բնապահպանության նախարարը մեկ անգամ արդեն խոսել է բջջային կապի օպերատորների հետ, որոնք լուծումներ առաջարկում են եւ մոտ ժամանակներում հնարավոր է կապն ապահովվի:

Բնապահպանության նախարար Արծվիկ Մինասյանն էլ հայտարարեց, որ այժմ բանակցություններ են ընթանում, եւ փնտրում են այն վայրերը, որտեղ պետք է տեղակայվեն համապատասխան կայանները: Արծվիկ Մինասյանի խոսքով՝ հույս ունեն, որ առաջիկա 20 օրվա ընթացքում այդ խնդիրը կլուծվի: Նախարարությունը ցանկանում է արգելոցում Wi-Fi սարքավորումներ տեղադրել, որը կօգնի նաեւ մոնիտորինգային աշխատանքներին, որսագողության դեմ պայքարին:

Դավիթ Տոնոյանը խոսելով վնասի նախնական չափի մասին ասաց, որ արգելոցի տարածքում այրվել է 1600 հա տարածք, որից անտառածածկ տարածքը կազմել է 250 հա: Բնապահպանության նախարարն էլ հավելեց, որ լրագրողները կարող են վստահ լինել, որ վնասի վերաբերյալ նախարարությունը որեւէ բան թաքցնելու նպատակ չունի: «Մենք մի քանի աղբյուրներ ենք համադրելու, որպեսզի ունենանք առավելագույն ճշգրիտ պատկեր: Այն ինչ այս պահին ներկայացվեց անտառի մոնիտորինգի նախնական տվյալներն են: Ուզում եմ նաեւ վստահեցնել ձեզ, որ չի լինելու որեւէ բան, որ կմտածեք կարող է թաքցնում ենք: Ոչ, այդպիսի խնդիր չկա, ավելին, մենք ուզում ենք ավելի պարզ, տեսանելի, հասկանալի եւ հրապարակային գնահատականներ հնչեցնենք այս մասով, որպեսզի հետագայում վերականգնողական աշխատանքները լինեն ավելի նպատակային եւ ողջ հասարակության ներգրավմամբ»,- ասաց Արծվիկ Մինասյանը՝ նշելով, որ կա հարուցված քրեական գործ եւ սպասում են իրավապահների գնահատականին: