Որն է Սերժ Սարգսյանի ինքնավստահության աղբյուրը. հանդիպում մեկ տարի անց

Երեկ Սերժ Սարգսյանը թեյի սեղանի շուրջ հանդիպում է ունեցել ԵԱՀԿ անդամ երկրների դեսպանների հետ: Հանդիպումը նվիրված է եղել ապրիլի 2-ին Հայաստանում կայացած խորհրդարանական ընտրություններին: Վերջին անգամ ԵԱՀԿ անդամ երկրների դեսպանների հետ Սերժ Սարգսյանը հանդիպել էր շատ ավելի լարված իրավիճակում` 2016-ի ապրիլի 4-ին: 

Ապրիլյան պատերազմի ամենաթեժ օրը նախագահական նստավայր հրավիրելով ԵԱՀԿ անդամ երկրների` Հայաստանում հավատարմագրված դեսպաններին, Սարգսյանը մի շարք ուղերձներ հղեց նրանց մայրաքաղաքներին, հայտարարեց, որ արտգործնախարարությանը հրահանգել է աշխատել Լեռնային Ղարաբաղի հետ ռազմական փոխօգնության պայմանագիր կնքելու ուղղությամբ եւ սպառնաց` եթե ռազմական գործողությունները շարունակվեն եւ ստանան լայնածավալ մասշտաբ, Հայաստանի Հանրապետությունը ճանաչելու է Լեռնային Ղարաբաղի անկախությունը:

Մինչ օրս պարզ չէ, թե ինչ ճակատագրի արժանացավ Արցախի հետ ռազմական փոխօգնության պայմանագիրը, ԱԳՆ-ն աշխատե՞ց դրա վրա, թե՝ ոչ: Անկախության ճանաչմանը բանը չհասավ, որովհետեւ այդ հանդիպումից ժամեր անց արդեն Մոսկվայում ռազմական գործողությունները դադարեցնելու պայմանավորվածություն ձեռք բերվեց:

Ինչ վերաբերում է ուղերձներին, ապա Սարգսյանը երեք ուղերձ փոխանցեց. 1. ապրիլի լույս 2-ի գիշերը Ադրբեջանն է նախահարձակ եղել, ուստի Հայաստանն ակնկալում է, որ ԵԱՀԿ երկրները ռազմական գործողություններ սկսելու համար հստակ բացատրություններ կպահանջեն Բաքվից: 2. Հայկական կողմը չի հրաժարվում փոխզիջումներից, սակայն դրանք հնարավոր են միայն այն ժամանակ, երբ կլուծվի հակամարտության բուն պատճառը, իսկ Արցախի ժողովրդին ոչ ոք չի կարող պարտադրել ապրել այնպիսի պետության կազմում, որը չի արտացոլում այդ ժողովրդի իղձերն ու արժեքները: 3. Ադրբեջանը պետք է սկսի ուղիղ խոսել Lեռնային Ղարաբաղի իշխանությունների հետ` անկախ նրանից՝ հավանում է ղարաբաղցիներին, թե` ոչ, իսկ զինադադարի խախտման յուրաքանչյուր դեպք պետք է դառնա մանրամասն ուսումնասիրության եւ գնահատականի առարկա:

Այս ուղերձների ճակատագրերի մասով էլ ամեն ինչ հստակ չէ: Համենայնդեպս հայտնի չէ, որ ԵԱՀԿ որեւէ երկիր Ադրբեջանից բացատրություն է պահանջել ապրիլյան պատերազմի ռազմական գործողությունները սկսելու վերաբերյալ: Դեռեւս լուծված չէ նաեւ զինադադարի դեպքերը ուսումնասիրելու համար համապատասխան պայմաններ ստեղծելու խնդիրը, խոսքը հակամարտության գոտում հետաքննության մեխանիզմների տեղադրման մասին է:

Այսինքն, ճիշտ է, ապրիլյան պատերազմի ճգնաժամը ինչ-որ կերպ հաղթահարվեց, սակայն գլոբալ առումով ԵԱՀԿ անդամ երկրների դեսպանների հետ ապրիլի 4-ի հանդիպման ժամանակ հնչած ոչ մի ուղերձ իր նպատակին չի հասել: Սա չի խանգարել, սակայն, որպեսզի Սերժ Սարգսյանը նույն կազմով երեկվա հանդիպման ժամանակ բավական ինքնավստահ արտահայտվի 2016-ի  ապրիլյան պատերազմի եւ դրան հաջորդած իրադարձությունների վերաբերյալ:

«Սերժ Սարգսյանը, հիշելով 2016թ. ապրիլյան պատերազմի օրերին նման ձեւաչափով դեսպանների հետ վերջին հանդիպումը՝ հույս է հայտնել, որ ապրիլյան դասերը ոչ միայն Ադրբեջանի համար են, այլեւ բոլորի՝ որպես ԵԱՀԿ անդամ երկրներ, որպես մեկ միասնական անվտանգային տարածք, որպեսզի բոլորը շատ ավելի աչալուրջ լինեն հնչող ահազանգերին եւ անվտանգության սպառնալիքներին»,- ասվում է երեկվա հանդիպման վերաբերյալ պաշտոնական հաղորդագրության մեջ:

Ի՞նչն է հիմք տալիս Սերժ Սարգսյանին այսպիսի տոնայնության համար, ինչով է ապրիլյան պատերազմը դաս ԵԱՀԿ անդամ երկրների համար: Այն, որ դա դաս էր Ադրբեջանի համար, դեռ ինչ-որ կերպ կարելի է ընկալել: Բայց միայն այն փաստը, որ այդպես էլ ԵԱՀԿ-ն չդատապարտեց այդ երկրին ռազմական գործողություններ սկսելու  համար, բավական էր, որպեսզի մեծ դասեր կատարվածից Ադրբեջանը չքաղի:

Ինչ վերաբերվում է երեկվա հանդիպման թեմային`ապրիլի 2-ի ընտրություններին, Սերժ Սարգսյանը այս հարցում էլ բավական ինքնավստահ է եղել եւ բարձրագոչ հայտարարություններ է արել: Օրինակ, նա ասել է, որ «այս ընտրություններն արձանագրեցին այն կարեւոր առաջընթացը, որին Հայաստանը հասել է ժողովրդավարության եւ պետականաշինության գործում»: Ասել է նաեւ, որ Հայաստանում անշրջելի է դարձել մարդու իրավունքների եւ հիմնարար ազատությունների առաջմղումը, քաղաքական եւ հասարակական կյանքում բազմակարծությունը:

Պաշտոնական հաղորդագրության մեջ նշվում է, որ դեսպանները այս ամենի վերաբերյալ հարցեր են ուղղել Սերժ Սարգսյանին: Մասնավորապես, խորհրդարանական ընտրություններին Սարգսյանի տված գնահատականի հետ կապված են դեսպանները հարցեր ունեցել: Կոնկրետ ինչ հարց, հաղորդագրության մեջ, իհարկե, չի ասվում:

Հարցեր են հնչել նաեւ կառավարության բարեփոխումների օրակարգի, կոռուպցիայի դեմ պայքարի թեմաներով: Այս դեպքում նույնպես չի ասվում, թե ինչ հարց է հնչել է եւ ինչ պատասխան է դրան հետեւել: Բնականաբար, ամենահետաքրքիր եւ ինտրիգային մանրամասների մասին պաշտոնական հաղորդագրությունը լռում է: