2016 թվականի լավագույն մարզիկ է ճանաչվել աշխարհի ամենարագ մարդը՝ ատլետ Ուսեյն Բոլտը

Համաշխարհային ճանաչում ունեցող «Laureus World Sports» եւ «World Press Photo» մրցանակաբաշխություններում աշխարհի ամենաարագ մարդը՝ ճամայկացի ատլետ Ուսեյն Բոլտը նվաճել է գլխավոր մրցանակները: Նախ օրեր առաջ ամփոփվել է 2016 թվականի լավագույն լուսանկարների «World Press Photo» մրցանակաբաշխության արդյունքները, եւ «Սպորտ» բաժնում հաղթող է ճանաչվել Ռիո դե Ժանեյրոյում կայացած Օլիմպիական խաղերի ատլետիկայի 100 մետր վազքի եզրափակիչ հատվածում կատարված լուսանկարը. Ուսեյն Բոլտը հատում է եզրագիծը եւ ժպտալով նայում է իրենից այդ տարածության համար բավական ետ մնացած մյուս վազորդներին:

Բոլտը պատմության մեջ միակ մարդն է, որ կարողացել է 100 մետր տարածությունը անցնել 9,7 վայրկյանից արագ եւ հիմա աշխարհի ռեկորդը այս մրցաձեւում հավասար է 9,58-ի: Ընդ որում, գրեթե մշտապես վերջնագծի հատվածում Բոլտը նայում է մրցակիցների ուղղությամբ՝ համոզվելու համար, որ ինքն է առաջինը եւ այս ընթացքում կորցնում է մի քանի հարյուրերորդական վայրկյաններ: Համակարգչային վերլուծությունները ցույց են տվել, որ եթե Բոլտը մինչեւ վերջ պահպաներ կոնցենտրացիան եւ չնայեր մրցակիցներին, ապա կարող էր ցույց տալ անգամ անհավատալի՝ 9,5 վայրկյանից քիչ ժամանակ: Ամեն դեպքում եզրագծի հատվածում Բոլտի ժպիտը դարձել է նրա ամենաբնորոշ ժեստերից մեկը եւ այն պատկերող Ռիոյում կատարված լուսանկարը դարձել է «World Press Photo 2017» մրցանակաբաշխության դափնեկիր:

Իսկ երեկ Մոնակոյում հրապարակվել են մարզաշխարհում ամենահեղինակավոր՝ «Laureus World Sports Awards» մրցանակաբաշխության 2016թ. հաղթողների անունները: Սպորտային «Օսկար» համարվող այս մրցանակաբաշխությունն անցկացվում է 2000 թվականից. աշխարհի գրեթե բոլոր երկրների լրագրողների, նաեւ հատուկ պրոֆեսիոնալ հանձնաժողովի քվեարկության արդյունքում, որոշվում են տարվա լավագույն մարզիկը, մարզուհին, թիմը եւ այլն: Պրոֆեսիոնալ հանձնախմբի մեջ ընդգրկվում են կարիերան ավարտած հանրահայտ մարզիկներ. այս անգամ աշխարհի լավագույն մարզիկի ընտրությանը մասնակցել են նախկինում հանրահայտ ֆուտբոլիստներ Ֆրանց Բեկենբաուերը, Բոբի Չարլթոնը, Լուիշ Ֆիգուն, Ռաուլը, Կառլես Պույոլը, թենիսիստներ Բորիս Բեկերը, Մոնիկա Սելեշը, Մարտինա Նավրատիլովան, լողորդ Մարկ Սպիտցը, գեղասահորդուհի Կատերինա Վիտը, մարմնամարզուհի Նադյա Կոմանեչին, ատլետներ Սեբաստիան Կոուն, Սերգեյ Բուբկան եւ այլ հայտնի մարզիկներ:

Լրագրողների եւ պրոֆեսիոնալ հանձնախմբի անդամների քվեարկության արդյունքում 2016 թվականի լավագույն մարզիկ է ճանաչվել Ռիո դե Ժանեյրոյում կայացած Օլիմպիական խաղերում 3 ոսկե մեդալներ նվաճած Ուսեյն Բոլտը, իսկ լավագույն մարզուհին՝ նույն խաղերի քառակի չեմպիոն, մարմնամարզության բացարձակ հաղթող ամերիկուհի Սիմոնե Բայլսը: Բոլտը լավագույն մարզիկի քվեարկությունում առաջ է անցել բասկետբոլիստ Ստեֆեն Կարիից (ԱՄՆ), ատլետ Մո Ֆարայից (Մեծ Բրիտանիա), բասկետբոլիստ Լեբրոն Ջեյմսից (ԱՄՆ), թենիսիստ Էնդի Մարեյից (Մեծ Բրիտանիա), ֆուտբոլիստ Կրիշտիանու Ռոնալդուից (Պորտուգալիա): Հետաքրքիր է, որ վերջին 2 տարիներին աշխարհի լավագույն մարզիկ ճանաչված սերբ թենիսիստ Նովակ Ջոկովիչը այս անգամ տեղ չի գտել լավագույնների մեջ:

Իսկ Բոլտը աշխարհի լավագույն մարզիկ է ճանաչվում արդեն 4-րդ անգամ եւ այս ցուցանիշով հավասարվում ռեկորդակրին՝ շվեյցարացի թենիսիստ Ռոջեր Ֆեդերերին: Ընդ որում, 2009 թվականից հետո Բոլտը 4 անգամ դարձել է աշխարհի լավագույն մարզիկ, 3 անգամ էլ զբաղեցրել է 3-րդ տեղը, եւ կարելի է վստահորեն ասել, որ նա աշխարհի վերջին տասնամյակի լավագույն մարզիկն է: Նշեմ նաեւ, որ 18 տարվա պատմություն ունեցող «Laureus World Sports Awards» մրցանակաբաշխությունում լավագույն մարզիկ-մարզուհիներ են առայժմ ճանաչվել բացառապես անհատական մարզաձեւերի ներկայացուցիչներ:

«Laureus World Sports Awards 2017» մրցանակաբաշխությանը հրապարակվել են այլ անվանակարգերում հաղթողների անունները: 108 տարվա ընթացքում առաջին անգամ չեմպիոն դարձած ԱՄՆ-ի բեյսբոլի «Չիկագո Կաբսը» արժանացել է «Տարվա թիմ» մրցանակին, ամերիկացի լեգենդար լողորդ, Օլիմպիական խաղերում նվաճած մեդալների քանակով բացարձակ ռեկորդակիր Մայքլ Ֆելպսը հաղթել է «Տարվա վերադարձ» անվանակարգում, իսկ «Սպորտի ոգի» մրցանակին է արժանացել առաջին անգամ պատմության ընթացում ֆուտբոլի Անգլիայի չեմպիոնի կոչումը նվաճած «Լեսթեր» թիմը: