Կրթության եւ գիտության նախարարությունում սպասվում է հաստիքների 20 տոկոս կրճատում

ՀՀ վարչապետ Կարեն Կարապետյանն իր պաշտոնում նշանակվելուց կարճ ժամանակ անց, ըստ էության, հայտարարեց գործազուրկների շարքերն ընդլայնելու իր վճռական մտադրության մասին, նաեւ դիմեց գործնական քայլերի` գերատեսչությունների ղեկավարներին հանձնարարելով առաջարկներ ներկայացնել համակարգում կառուցվածքի եւ հաստիքացուցակի օպտիմալացման վերաբերյալ:

Գերատեսչություններն աշխատում են այդ ուղղությամբ, բայց առայժմ ոչինչ չի վկայում այն մասին, որ օպտիմալացման հիմքում պետական ապարատի ուռճացվածության փաստն է: Նախ եղել է կրճատման հանձնարարականը, որից հետո միայն վերլուծություն է իրականացվել` հասկանալու համար, թե ինչ փոփոխությունների միջոցով կարելի է դա իրականացնել: Այնինչ, պետք է որ հակառակը լիներ. վերլուծեին, համոզվեին ու համոզեին, որ տվյալ գերատեսչությունն ունի անհրաժեշտից մեծ թվաքանակով աշխատակիցներ, հետո միայն նրանց հաջողություն մաղթելով ճանապարհ դնեին` շատերին, վստահաբար, արտագաղթի ուղին ցույց տալով: 

Իսկ որ վարչապետը խնդրին հակառակ կողմից է մոտեցել` նախ  ելնելով ֆինանսական միջոցներ խնայելու մտայնությունից, համոզվում ենք տվյալ դեպքում կրթության եւ գիտության նախարարության օրինակով (ի դեպ, այդ առաջնահերթության մասին է վկայում նաեւ կառավարության ծրագիրը):

ԿԳՆ աշխատակազմի ղեկավար Նաիրի Հարությունյանից տեղեկացանք, որ նախարարության աշխատակազմում, այդ թվում` առանձնացված ստորաբաժանումներում, որոնք են` Բարձրագույն որակավորման հանձնաժողովը եւ Լիցենզավորման գործակալությունը, ներկայումս աշխատում են 178 մարդ: Համաձայն նախարարության առաջարկի, որն, իհարկե, դեռեւս ընդունված ու վերջնական չէ, պետք է կրճատվեն այդ աշխատակիցների 20 տոկոսը կամ 36 հաստիքային միավոր: Բոլորը, մեկ բացառությամբ, քաղծառայողներ են: Նաիրի Հարությունյանը մանրամասնեց, որ նաեւ կառուցվածքային փոփոխություններ են առաջարկել, ինչը նախատեսում է, որ նախարարությունում, որոշ բացառություններով, այլեւս բաժիններ չեն լինի, եւ կշարունակեն գործել միայն վարչությունները: «Օրինակ այս պահին հանրակրթության վարչությունում կա երկու բաժին` նախադպրոցական եւ միջնակարգ կրթության, ինչպես նաեւ նախադպրոցական եւ միջնակարգ կրթության քաղաքականության մշակման եւ վերլուծության: Փոփոխությունները հաստատվելուց հետո կլինի մեկ ընդհանուր վարչություն, որտեղ 16 աշխատակիցների փոխարեն կմնան 11-ը»,- ասաց նա:

Բայց դա չի նշանակում, որ բաժնի պետերն առանց աշխատանքի են մնալու, որովհետեւ «Քաղաքացիական ծառայության մասին» օրենքով նրանք կարող են առավելություն ունենալ, եւ այս դեպքում ուղղակի պաշտոնի իջեցում լինի: Այսինքն` աշխատանքից ազատվեն ավելի ցածր դասային աստիճան ու ստաժ ունեցող աշխատակիցները: «Բաժնի պետերը կարող են, օրինակ, որպես գլխավոր մասնագետ աշխատել: Դա կարգավորում է «Քաղծառայության մասին» օրենքը` սահմանելով, որ երբ վերակազմակերպում, լուծարում կամ անվանափոխություն է տեղի ունենում, որոնք զուգորդվում են հաստիքների կրճատմամբ, դա ինչ առաջնահերթությամբ պետք է տեղի ունենա»,- ասաց Հարությունյանը:

Նաեւ պատասխանեց, որ հաստիքները 20 տոկոսով կրճատելու հանձնարարական չի եղել: «Մենք ելել ենք մեր հնարավորություններից. վերլուծության, օպտիմալացման, կառուցվածքի փոփոխության արդյունքում տեսել ենք, որ կարող ենք 36 հաստիք կրճատել: ...Բնականաբար սրա արդյունքում մնացող կադրերի վրա ծանրաբեռնվածությունը կմեծանա: Այնպես չէ, որ այս 36 հաստիքը զբաղեցնող մարդիկ աշխատանք չէին կատարում»,- շարունակեց Նաիրի Հարությունյանը` վստահեցնելով, որ պահպանվող հաստիքների դեպքում ծանրաբեռնվածությունը թերի չի եղել: «Տարբեր մոդելների դեպքում աշխատանքը տարբեր կերպ է կառավարվում: Հիմա մեր ընտրած մոդելում հնարավորություն ենք ստանում ծանրաբեռնվածությունը բաշխել: Օրինակի համար` եթե առայժմ վարչության պետը հանձնարարականը տալիս է բաժնի պետին, բաժնի պետը համակարգում է, փոփոխություններից հետո վարչության պետի ծանրաբեռնվածությունը կմեծանա, այն իմաստով, որ արդեն բոլոր աշխատակիցների աշխատանքը ինքը պետք է համակարգի»,- ասաց Հարությունյանը` հաստատելով, որ վարչության պետի հանձնարարություններն ավելի փոքրաթիվ աշխատակիցների վրա պետք է տարածվեն: Նախարարության աշխատակազմում հաստիքների կրճատման հետեւանքով տարեկան կտնտեսվի 74 միլիոն դրամ:

Որոշակի կրճատումներ են նախատեսվում նաեւ ԿԳՆ գիտության պետական կոմիտեում: Վերջինիս աշխատակազմի ղեկավար Լեւոն Մարդոյանի փոխանցմամբ, կոմիտեի աշխատակազմի ընդհանուր թիվը 39 է, որից 34-ը՝ քաղծառայող: Վերջիններից էլ նախատեսվում է կրճատել 4 հաստիք: «Ուղղակի վարչապետի հանձնարարականով կրճատումներ են իրականացվում, մենք էլ ինչքան կարող ենք, կկրճատենք: Մեր թվաքանակը քիչ է, իսկ աշխատանքի ընդգրկումը` բավականին մեծ, դրա համար կարողացանք կանգ առնել 4-ի վրա: Մյուս աշխատակիցների գործառույթները ավելի շատացրինք, իրենց ավելի ծանրաբեռնեցինք»,- ասաց Լեւոն Մարդոյանը: Նա նույնպես պնդեց, որ չկրճատվող հաստիքներում ծանրաբեռնվածությունը թերի չի եղել, որ մարդիկ ստանձնեն այլ գործառույթներ եւս: «Բոլորն էլ աշխատել են ըստ իրենց պաշտոնի անձնագրով նախատեսված գործառույթների եւ բոլորն էլ իրականացրել են: Հիմա պետք է պաշտոնի անձնագրերում  փոփոխություններ լինեն եւ նրանց վրա դրվեն եւս մի քանի գործառույթ, որ կարողանանք այդ բոլոր գործառույթները իրականացնել»,- մանրամասնեց Մարդոյանը:

Հ.Գ. -1. ԿԳ նախարարության (ու ոչ միայն) տեսչությունների օպտիմալացման հերթը կհասնի ավելի ուշ:  

Հ.Գ. -2. ՀՀ վարչապետ Կարեն Կարապետյանի որոշմամբ ընդամենը վերջերս նշանակվեց ՀՀ կրթության եւ գիտության նախարարի նոր տեղակալ` 3-րդը: Տարիներ շարունակ ԿԳ փոխնախարարները 2-ն էին: